| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২. ৰেদনাসংযুত্তং
2. Vedanāsaṃyuttaṃ
১. সগাথাৰগ্গো
1. Sagāthāvaggo
১. সমাধিসুত্তৰণ্ণনা
1. Samādhisuttavaṇṇanā
২৪৯. ৰেদনা চ পজানাতীতি সচ্চাভিসম্বোধৰসেন ৰুচ্চমানৰেদনানং পজাননং সাতিসযসমাধানপুব্বকন্তি ভগৰতা ‘‘সমাহিতো’’তি ৰুত্তন্তি আহ ‘‘উপচারেন ৰা অপ্পনায ৰা সমাহিতো’’তি। ৰেদনাতি তিস্সোপি ৰেদনা। দুক্খসচ্চৰসেনাতি দুক্খসচ্চভাৰেন, পরিজাননৰসেনাতি অত্থো। সম্ভৰন্তি সমুদযং তণ্হাৰিজ্জাকম্মফস্সাদিপ্পভেদং উপ্পত্তিকারণং। তেনাহ ‘‘সমুদযসচ্চৰসেন পজানাতী’’তি। যত্থাতি যংনিমিত্তং, যং আগম্ম কামতণ্হাৰিজ্জাদিনিরোধা ৰেদনানিরোধো, তেসং অযং নিরোধো। নিব্বানং আরব্ভ অরিযমগ্গপ্পৰত্তিযা হি নিব্বানং ৰেদনানিরোধোতি ৰুত্তো। খযং গমেতীতি খযগামী, তং খযগামিনং। ছাতং ৰুচ্চতি তণ্হা কামানং পাতুকামতাৰসেন পৰত্তনতো, অচ্চন্তমেৰ সমুচ্ছিন্নত্তা নত্থি এতস্মিং ছাতন্তি নিচ্ছাতো। তেনাহ ‘‘নিত্তণ্হো’’তি। সম্মসনচারৰেদনাতি সম্মসনূপচারৰেদনা। দ্ৰীহি পদেহীতি ‘‘সমাহিতো সম্পজানো’’তি ইমেহি দ্ৰীহি। ‘‘সতো’’তি পন ইদং সম্পজানপদস্সেৰ উপব্রূহনন্তি অধিপ্পাযো। সেসেহি চতূহি চতুসচ্চং কথিতং, ইতরেহি পন দ্ৰীহি চতুসচ্চবুজ্ঝনমেৰ কথিতং। সব্বসঙ্গাহিকোতি সব্বসভাৰধম্মানং সঙ্গণ্হনকো। তেনাহ ‘‘চতুভূমকধম্মপরিচ্ছেদো ৰুত্তো’’তি।
249.Vedanāca pajānātīti saccābhisambodhavasena vuccamānavedanānaṃ pajānanaṃ sātisayasamādhānapubbakanti bhagavatā ‘‘samāhito’’ti vuttanti āha ‘‘upacārena vā appanāya vā samāhito’’ti. Vedanāti tissopi vedanā. Dukkhasaccavasenāti dukkhasaccabhāvena, parijānanavasenāti attho. Sambhavanti samudayaṃ taṇhāvijjākammaphassādippabhedaṃ uppattikāraṇaṃ. Tenāha ‘‘samudayasaccavasena pajānātī’’ti. Yatthāti yaṃnimittaṃ, yaṃ āgamma kāmataṇhāvijjādinirodhā vedanānirodho, tesaṃ ayaṃ nirodho. Nibbānaṃ ārabbha ariyamaggappavattiyā hi nibbānaṃ vedanānirodhoti vutto. Khayaṃ gametīti khayagāmī, taṃ khayagāminaṃ. Chātaṃ vuccati taṇhā kāmānaṃ pātukāmatāvasena pavattanato, accantameva samucchinnattā natthi etasmiṃ chātanti nicchāto. Tenāha ‘‘nittaṇho’’ti. Sammasanacāravedanāti sammasanūpacāravedanā. Dvīhi padehīti ‘‘samāhito sampajāno’’ti imehi dvīhi. ‘‘Sato’’ti pana idaṃ sampajānapadasseva upabrūhananti adhippāyo. Sesehi catūhi catusaccaṃ kathitaṃ, itarehi pana dvīhi catusaccabujjhanameva kathitaṃ. Sabbasaṅgāhikoti sabbasabhāvadhammānaṃ saṅgaṇhanako. Tenāha ‘‘catubhūmakadhammaparicchedo vutto’’ti.
সমাধিসুত্তৰণ্ণনা নিট্ঠিতা।
Samādhisuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. সমাধিসুত্তং • 1. Samādhisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. সমাধিসুত্তৰণ্ণনা • 1. Samādhisuttavaṇṇanā
