| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
២. វេទនាសំយុត្តំ
2. Vedanāsaṃyuttaṃ
១. សគាថាវគ្គោ
1. Sagāthāvaggo
១. សមាធិសុត្តវណ្ណនា
1. Samādhisuttavaṇṇanā
២៤៩. វេទនា ច បជានាតីតិ សច្ចាភិសម្ពោធវសេន វុច្ចមានវេទនានំ បជាននំ សាតិសយសមាធានបុព្ពកន្តិ ភគវតា ‘‘សមាហិតោ’’តិ វុត្តន្តិ អាហ ‘‘ឧបចារេន វា អប្បនាយ វា សមាហិតោ’’តិ។ វេទនាតិ តិស្សោបិ វេទនា។ ទុក្ខសច្ចវសេនាតិ ទុក្ខសច្ចភាវេន, បរិជាននវសេនាតិ អត្ថោ។ សម្ភវន្តិ សមុទយំ តណ្ហាវិជ្ជាកម្មផស្សាទិប្បភេទំ ឧប្បត្តិការណំ។ តេនាហ ‘‘សមុទយសច្ចវសេន បជានាតី’’តិ។ យត្ថាតិ យំនិមិត្តំ, យំ អាគម្ម កាមតណ្ហាវិជ្ជាទិនិរោធា វេទនានិរោធោ, តេសំ អយំ និរោធោ។ និព្ពានំ អារព្ភ អរិយមគ្គប្បវត្តិយា ហិ និព្ពានំ វេទនានិរោធោតិ វុត្តោ។ ខយំ គមេតីតិ ខយគាមី, តំ ខយគាមិនំ។ ឆាតំ វុច្ចតិ តណ្ហា កាមានំ បាតុកាមតាវសេន បវត្តនតោ, អច្ចន្តមេវ សមុច្ឆិន្នត្តា នត្ថិ ឯតស្មិំ ឆាតន្តិ និច្ឆាតោ។ តេនាហ ‘‘និត្តណ្ហោ’’តិ។ សម្មសនចារវេទនាតិ សម្មសនូបចារវេទនា។ ទ្វីហិ បទេហីតិ ‘‘សមាហិតោ សម្បជានោ’’តិ ឥមេហិ ទ្វីហិ។ ‘‘សតោ’’តិ បន ឥទំ សម្បជានបទស្សេវ ឧបព្រូហនន្តិ អធិប្បាយោ។ សេសេហិ ចតូហិ ចតុសច្ចំ កថិតំ, ឥតរេហិ បន ទ្វីហិ ចតុសច្ចពុជ្ឈនមេវ កថិតំ។ សព្ពសង្គាហិកោតិ សព្ពសភាវធម្មានំ សង្គណ្ហនកោ។ តេនាហ ‘‘ចតុភូមកធម្មបរិច្ឆេទោ វុត្តោ’’តិ។
249.Vedanāca pajānātīti saccābhisambodhavasena vuccamānavedanānaṃ pajānanaṃ sātisayasamādhānapubbakanti bhagavatā ‘‘samāhito’’ti vuttanti āha ‘‘upacārena vā appanāya vā samāhito’’ti. Vedanāti tissopi vedanā. Dukkhasaccavasenāti dukkhasaccabhāvena, parijānanavasenāti attho. Sambhavanti samudayaṃ taṇhāvijjākammaphassādippabhedaṃ uppattikāraṇaṃ. Tenāha ‘‘samudayasaccavasena pajānātī’’ti. Yatthāti yaṃnimittaṃ, yaṃ āgamma kāmataṇhāvijjādinirodhā vedanānirodho, tesaṃ ayaṃ nirodho. Nibbānaṃ ārabbha ariyamaggappavattiyā hi nibbānaṃ vedanānirodhoti vutto. Khayaṃ gametīti khayagāmī, taṃ khayagāminaṃ. Chātaṃ vuccati taṇhā kāmānaṃ pātukāmatāvasena pavattanato, accantameva samucchinnattā natthi etasmiṃ chātanti nicchāto. Tenāha ‘‘nittaṇho’’ti. Sammasanacāravedanāti sammasanūpacāravedanā. Dvīhi padehīti ‘‘samāhito sampajāno’’ti imehi dvīhi. ‘‘Sato’’ti pana idaṃ sampajānapadasseva upabrūhananti adhippāyo. Sesehi catūhi catusaccaṃ kathitaṃ, itarehi pana dvīhi catusaccabujjhanameva kathitaṃ. Sabbasaṅgāhikoti sabbasabhāvadhammānaṃ saṅgaṇhanako. Tenāha ‘‘catubhūmakadhammaparicchedo vutto’’ti.
សមាធិសុត្តវណ្ណនា និដ្ឋិតា។
Samādhisuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១. សមាធិសុត្តំ • 1. Samādhisuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១. សមាធិសុត្តវណ្ណនា • 1. Samādhisuttavaṇṇanā
