| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
5-6. සමජීවීසුත්‌තද්‌වයවණ්‌ණනා
5-6. Samajīvīsuttadvayavaṇṇanā
55-56. පඤ්‌චමෙ තෙනුපසඞ්‌කමීති කිමත්‌ථං උපසඞ්‌කමි? අනුග්‌ගණ්‌හනත්‌ථං. තථාගතො හි තං රට්‌ඨං පාපුණන්‌තො ඉමෙසංයෙව ද්‌වින්‌නං සඞ්‌ගණ්‌හනත්‌ථාය පාපුණාති. නකුලපිතා කිර පඤ්‌ච ජාතිසතානි තථාගතස්‌ස පිතා අහොසි, පඤ්‌ච ජාතිසතානි මහාපිතා, පඤ්‌ච ජාතිසතානි චූළපිතා. නකුලමාතාපි පඤ්‌ච ජාතිසතානි තථාගතස්‌ස මාතා අහොසි, පඤ්‌ච ජාතිසතානි මහාමාතා, පඤ්‌ච ජාතිසතානි චූළමාතා. තෙ සත්‌ථු දිට්‌ඨකාලතො පට්‌ඨාය පුත්‌තසිනෙහං පටිලභිත්‌වා ‘‘හන්‌තාත, හන්‌තාතා’’ති වච්‌ඡකං දිස්‌වා වච්‌ඡගිද්‌ධිනී ගාවී විය විරවමානා උපසඞ්‌කමිත්‌වා පඨමදස්‌සනෙනෙව සොතාපන්‌නා ජාතා. නිවෙසනෙ පඤ්‌චසතානං භික්‌ඛූනං ආසනානි සදා පඤ්‌ඤත්‌තානෙව හොන්‌ති. ඉති භගවා තෙසං අනුග්‌ගණ්‌හනත්‌ථාය උපසඞ්‌කමි. අතිචරිතාති අතික්‌කමිතා. අභිසම්‌පරායඤ්‌චාති පරලොකෙ ච. සමසද්‌ධාති සද්‌ධාය සමා එකසදිසා. සීලාදීසුපි එසෙව නයො. ඡට්‌ඨං කෙවලං භික්‌ඛූනං දෙසිතං. සෙසමෙත්‌ථ තාදිසමෙව.
55-56. Pañcame tenupasaṅkamīti kimatthaṃ upasaṅkami? Anuggaṇhanatthaṃ. Tathāgato hi taṃ raṭṭhaṃ pāpuṇanto imesaṃyeva dvinnaṃ saṅgaṇhanatthāya pāpuṇāti. Nakulapitā kira pañca jātisatāni tathāgatassa pitā ahosi, pañca jātisatāni mahāpitā, pañca jātisatāni cūḷapitā. Nakulamātāpi pañca jātisatāni tathāgatassa mātā ahosi, pañca jātisatāni mahāmātā, pañca jātisatāni cūḷamātā. Te satthu diṭṭhakālato paṭṭhāya puttasinehaṃ paṭilabhitvā ‘‘hantāta, hantātā’’ti vacchakaṃ disvā vacchagiddhinī gāvī viya viravamānā upasaṅkamitvā paṭhamadassaneneva sotāpannā jātā. Nivesane pañcasatānaṃ bhikkhūnaṃ āsanāni sadā paññattāneva honti. Iti bhagavā tesaṃ anuggaṇhanatthāya upasaṅkami. Aticaritāti atikkamitā. Abhisamparāyañcāti paraloke ca. Samasaddhāti saddhāya samā ekasadisā. Sīlādīsupi eseva nayo. Chaṭṭhaṃ kevalaṃ bhikkhūnaṃ desitaṃ. Sesamettha tādisameva.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya
5. පඨමසමජීවීසුත්‌තං • 5. Paṭhamasamajīvīsuttaṃ
6. දුතියසමජීවීසුත්‌තං • 6. Dutiyasamajīvīsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5-6. සමජීවීසුත්‌තාදිවණ්‌ණනා • 5-6. Samajīvīsuttādivaṇṇanā
