| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3. அனுத்தரியவக்³கோ³
3. Anuttariyavaggo
1-2. ஸாமகஸுத்தாதி³வண்ணனா
1-2. Sāmakasuttādivaṇṇanā
21-22. ததியஸ்ஸ பட²மே கேவலகப்பந்தி எத்த² கேவல-ஸத்³தோ³ அனவஸேஸத்தோ², கப்ப-ஸத்³தோ³ ஸமந்தபா⁴வத்தோ². தஸ்மா கேவலகப்பங் பொக்க²ரணியந்தி ஏவமத்தோ² த³ட்ட²ப்³போ³. அனவஸேஸங் ப²ரிதுங் ஸமத்த²ஸ்ஸபி ஓபா⁴ஸஸ்ஸ கேனசி காரணேன ஏகதே³ஸப²ரணம்பி ஸியா, அயங் பன ஸப்³ப³ஸோவ ப²ரதீதி த³ஸ்ஸேதுங் ஸமந்தத்தோ² கப்ப-ஸத்³தோ³ க³ஹிதோ. அத்தனோ ஓபா⁴ஸேன ப²ரித்வாதி வத்தா²லங்காரஸரீரஸமுட்டி²தேன ஓபா⁴ஸேன ப²ரித்வா, சந்தி³மா விய ஏகோபா⁴ஸங் ஏகபஜ்ஜோதங் கரித்வாதி அத்தோ². ஸமனுஞ்ஞோதி ஸம்மதே³வ கதமனுஞ்ஞோ. தேனாஹ ‘‘ஸமானசித்தோ’’தி, ஸமானஜ்ஜா²ஸயோதி அத்தோ². து³க்க²ங் வசோ ஏதஸ்மிந்தி து³ப்³ப³சோ, தஸ்ஸ கம்மங் தோ³வசஸ்ஸங், தஸ்ஸ புக்³க³லஸ்ஸ அனாத³ரியவஸேன பவத்தா சேதனா, தஸ்ஸ பா⁴வோ அத்தி²தா தோ³வசஸ்ஸதா. அத² வா தோ³வசஸ்ஸமேவ தோ³வசஸ்ஸதா. ஸா அத்த²தோ ஸங்கா²ரக்க²ந்தோ⁴ ஹோதி. சேதனாபதா⁴னோ ஹி ஸங்கா²ரக்க²ந்தோ⁴. சதுன்னங் வா க²ந்தா⁴னங் அபத³க்கி²ணக்³கா³ஹிதாகாரேன பவத்தானங் ஏதங் அதி⁴வசனந்தி வத³ந்தி. பாபா அஸ்ஸத்³தா⁴த³யோ புக்³க³லா ஏதஸ்ஸ மித்தாதி பாபமித்தோ, தஸ்ஸ பா⁴வோ பாபமித்ததா. ஸாபி அத்த²தோ தோ³வசஸ்ஸதா விய த³ட்ட²ப்³பா³. யாய ஹி சேதனாய புக்³க³லோ பாபமித்தோ பாபஸம்பவங்கோ நாம ஹோதி, ஸா சேதனா பாபமித்ததா. சத்தாரோபி வா அரூபினோ க²ந்தா⁴ ததா³காரப்பவத்தா பாபமித்ததா. து³தியங் உத்தானமேவ.
21-22. Tatiyassa paṭhame kevalakappanti ettha kevala-saddo anavasesattho, kappa-saddo samantabhāvattho. Tasmā kevalakappaṃ pokkharaṇiyanti evamattho daṭṭhabbo. Anavasesaṃ pharituṃ samatthassapi obhāsassa kenaci kāraṇena ekadesapharaṇampi siyā, ayaṃ pana sabbasova pharatīti dassetuṃ samantattho kappa-saddo gahito. Attano obhāsena pharitvāti vatthālaṅkārasarīrasamuṭṭhitena obhāsena pharitvā, candimā viya ekobhāsaṃ ekapajjotaṃ karitvāti attho. Samanuññoti sammadeva katamanuñño. Tenāha ‘‘samānacitto’’ti, samānajjhāsayoti attho. Dukkhaṃ vaco etasminti dubbaco, tassa kammaṃ dovacassaṃ, tassa puggalassa anādariyavasena pavattā cetanā, tassa bhāvo atthitā dovacassatā. Atha vā dovacassameva dovacassatā. Sā atthato saṅkhārakkhandho hoti. Cetanāpadhāno hi saṅkhārakkhandho. Catunnaṃ vā khandhānaṃ apadakkhiṇaggāhitākārena pavattānaṃ etaṃ adhivacananti vadanti. Pāpā assaddhādayo puggalā etassa mittāti pāpamitto, tassa bhāvo pāpamittatā. Sāpi atthato dovacassatā viya daṭṭhabbā. Yāya hi cetanāya puggalo pāpamitto pāpasampavaṅko nāma hoti, sā cetanā pāpamittatā. Cattāropi vā arūpino khandhā tadākārappavattā pāpamittatā. Dutiyaṃ uttānameva.
ஸாமகஸுத்தாதி³வண்ணனா நிட்டி²தா.
Sāmakasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
1. ஸாமகஸுத்தங் • 1. Sāmakasuttaṃ
2. அபரிஹானியஸுத்தங் • 2. Aparihāniyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1-2. ஸாமகஸுத்தாதி³வண்ணனா • 1-2. Sāmakasuttādivaṇṇanā
