| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
3. අනුත්‌තරියවග්‌ගො
3. Anuttariyavaggo
1-2. සාමකසුත්‌තාදිවණ්‌ණනා
1-2. Sāmakasuttādivaṇṇanā
21-22. තතියස්‌ස පඨමෙ කෙවලකප්‌පන්‌ති එත්‌ථ කෙවල-සද්‌දො අනවසෙසත්‌ථො, කප්‌ප-සද්‌දො සමන්‌තභාවත්‌ථො. තස්‌මා කෙවලකප්‌පං පොක්‌ඛරණියන්‌ති එවමත්‌ථො දට්‌ඨබ්‌බො. අනවසෙසං ඵරිතුං සමත්‌ථස්‌සපි ඔභාසස්‌ස කෙනචි කාරණෙන එකදෙසඵරණම්‌පි සියා, අයං පන සබ්‌බසොව ඵරතීති දස්‌සෙතුං සමන්‌තත්‌ථො කප්‌ප-සද්‌දො ගහිතො. අත්‌තනො ඔභාසෙන ඵරිත්‌වාති වත්‌ථාලඞ්‌කාරසරීරසමුට්‌ඨිතෙන ඔභාසෙන ඵරිත්‌වා, චන්‌දිමා විය එකොභාසං එකපජ්‌ජොතං කරිත්‌වාති අත්‌ථො. සමනුඤ්‌ඤොති සම්‌මදෙව කතමනුඤ්‌ඤො. තෙනාහ ‘‘සමානචිත්‌තො’’ති, සමානජ්‌ඣාසයොති අත්‌ථො. දුක්‌ඛං වචො එතස්‌මින්‌ති දුබ්‌බචො, තස්‌ස කම්‌මං දොවචස්‌සං, තස්‌ස පුග්‌ගලස්‌ස අනාදරියවසෙන පවත්‌තා චෙතනා, තස්‌ස භාවො අත්‌ථිතා දොවචස්‌සතා. අථ වා දොවචස්‌සමෙව දොවචස්‌සතා. සා අත්‌ථතො සඞ්‌ඛාරක්‌ඛන්‌ධො හොති. චෙතනාපධානො හි සඞ්‌ඛාරක්‌ඛන්‌ධො. චතුන්‌නං වා ඛන්‌ධානං අපදක්‌ඛිණග්‌ගාහිතාකාරෙන පවත්‌තානං එතං අධිවචනන්‌ති වදන්‌ති. පාපා අස්‌සද්‌ධාදයො පුග්‌ගලා එතස්‌ස මිත්‌තාති පාපමිත්‌තො, තස්‌ස භාවො පාපමිත්‌තතා. සාපි අත්‌ථතො දොවචස්‌සතා විය දට්‌ඨබ්‌බා. යාය හි චෙතනාය පුග්‌ගලො පාපමිත්‌තො පාපසම්‌පවඞ්‌කො නාම හොති, සා චෙතනා පාපමිත්‌තතා. චත්‌තාරොපි වා අරූපිනො ඛන්‌ධා තදාකාරප්‌පවත්‌තා පාපමිත්‌තතා. දුතියං උත්‌තානමෙව.
21-22. Tatiyassa paṭhame kevalakappanti ettha kevala-saddo anavasesattho, kappa-saddo samantabhāvattho. Tasmā kevalakappaṃ pokkharaṇiyanti evamattho daṭṭhabbo. Anavasesaṃ pharituṃ samatthassapi obhāsassa kenaci kāraṇena ekadesapharaṇampi siyā, ayaṃ pana sabbasova pharatīti dassetuṃ samantattho kappa-saddo gahito. Attano obhāsena pharitvāti vatthālaṅkārasarīrasamuṭṭhitena obhāsena pharitvā, candimā viya ekobhāsaṃ ekapajjotaṃ karitvāti attho. Samanuññoti sammadeva katamanuñño. Tenāha ‘‘samānacitto’’ti, samānajjhāsayoti attho. Dukkhaṃ vaco etasminti dubbaco, tassa kammaṃ dovacassaṃ, tassa puggalassa anādariyavasena pavattā cetanā, tassa bhāvo atthitā dovacassatā. Atha vā dovacassameva dovacassatā. Sā atthato saṅkhārakkhandho hoti. Cetanāpadhāno hi saṅkhārakkhandho. Catunnaṃ vā khandhānaṃ apadakkhiṇaggāhitākārena pavattānaṃ etaṃ adhivacananti vadanti. Pāpā assaddhādayo puggalā etassa mittāti pāpamitto, tassa bhāvo pāpamittatā. Sāpi atthato dovacassatā viya daṭṭhabbā. Yāya hi cetanāya puggalo pāpamitto pāpasampavaṅko nāma hoti, sā cetanā pāpamittatā. Cattāropi vā arūpino khandhā tadākārappavattā pāpamittatā. Dutiyaṃ uttānameva.
සාමකසුත්‌තාදිවණ්‌ණනා නිට්‌ඨිතා.
Sāmakasuttādivaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya
1. සාමකසුත්‌තං • 1. Sāmakasuttaṃ
2. අපරිහානියසුත්‌තං • 2. Aparihāniyasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1-2. සාමකසුත්‌තාදිවණ්‌ණනා • 1-2. Sāmakasuttādivaṇṇanā
