| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৩. অনুত্তরিযৰগ্গো
3. Anuttariyavaggo
১. সামকসুত্তং
1. Sāmakasuttaṃ
২১. একং সমযং ভগৰা সক্কেসু ৰিহরতি সামগামকে পোক্খরণিযাযং। অথ খো অঞ্ঞতরা দেৰতা অভিক্কন্তায রত্তিযা অভিক্কন্তৰণ্ণা কেৰলকপ্পং পোক্খরণিযং ওভাসেত্ৰা যেন ভগৰা তেনুপসঙ্কমি ; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি। একমন্তং ঠিতা খো সা দেৰতা ভগৰন্তং এতদৰোচ –
21. Ekaṃ samayaṃ bhagavā sakkesu viharati sāmagāmake pokkharaṇiyāyaṃ. Atha kho aññatarā devatā abhikkantāya rattiyā abhikkantavaṇṇā kevalakappaṃ pokkharaṇiyaṃ obhāsetvā yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavantaṃ etadavoca –
‘‘তযোমে, ভন্তে, ধম্মা ভিক্খুনো পরিহানায সংৰত্তন্তি। কতমে তযো? কম্মারামতা, ভস্সারামতা , নিদ্দারামতা – ইমে খো, ভন্তে, তযো ধম্মা ভিক্খুনো পরিহানায সংৰত্তন্তী’’তি। ইদমৰোচ সা দেৰতা। সমনুঞ্ঞো সত্থা অহোসি। অথ খো সা দেৰতা ‘‘সমনুঞ্ঞো মে সত্থা’’তি ভগৰন্তং অভিৰাদেত্ৰা পদক্খিণং কত্ৰা তত্থেৰন্তরধাযি।
‘‘Tayome, bhante, dhammā bhikkhuno parihānāya saṃvattanti. Katame tayo? Kammārāmatā, bhassārāmatā , niddārāmatā – ime kho, bhante, tayo dhammā bhikkhuno parihānāya saṃvattantī’’ti. Idamavoca sā devatā. Samanuñño satthā ahosi. Atha kho sā devatā ‘‘samanuñño me satthā’’ti bhagavantaṃ abhivādetvā padakkhiṇaṃ katvā tatthevantaradhāyi.
অথ খো ভগৰা তস্সা রত্তিযা অচ্চযেন ভিক্খূ আমন্তেসি – ‘‘ইমং, ভিক্খৰে, রত্তিং অঞ্ঞতরা দেৰতা অভিক্কন্তায রত্তিযা অভিক্কন্তৰণ্ণা কেৰলকপ্পং পোক্খরণিযং ওভাসেত্ৰা যেনাহং তেনুপসঙ্কমি; উপসঙ্কমিত্ৰা মং অভিৰাদেত্ৰা একমন্তং অট্ঠাসি। একমন্তং ঠিতা খো, ভিক্খৰে, সা দেৰতা মং এতদৰোচ – ‘তযোমে, ভন্তে, ধম্মা ভিক্খুনো পরিহানায সংৰত্তন্তি। কতমে তযো? কম্মারামতা, ভস্সারামতা, নিদ্দারামতা – ইমে খো, ভন্তে, তযো ধম্মা ভিক্খুনো পরিহানায সংৰত্তন্তী’তি। ইদমৰোচ, ভিক্খৰে, সা দেৰতা। ইদং ৰত্ৰা মং অভিৰাদেত্ৰা পদক্খিণং কত্ৰা তত্থেৰন্তরধাযি। তেসং ৰো 1, ভিক্খৰে, অলাভা তেসং দুল্লদ্ধং, যে ৰো দেৰতাপি জানন্তি কুসলেহি ধম্মেহি পরিহাযমানে’’।
Atha kho bhagavā tassā rattiyā accayena bhikkhū āmantesi – ‘‘imaṃ, bhikkhave, rattiṃ aññatarā devatā abhikkantāya rattiyā abhikkantavaṇṇā kevalakappaṃ pokkharaṇiyaṃ obhāsetvā yenāhaṃ tenupasaṅkami; upasaṅkamitvā maṃ abhivādetvā ekamantaṃ aṭṭhāsi. Ekamantaṃ ṭhitā kho, bhikkhave, sā devatā maṃ etadavoca – ‘tayome, bhante, dhammā bhikkhuno parihānāya saṃvattanti. Katame tayo? Kammārāmatā, bhassārāmatā, niddārāmatā – ime kho, bhante, tayo dhammā bhikkhuno parihānāya saṃvattantī’ti. Idamavoca, bhikkhave, sā devatā. Idaṃ vatvā maṃ abhivādetvā padakkhiṇaṃ katvā tatthevantaradhāyi. Tesaṃ vo 2, bhikkhave, alābhā tesaṃ dulladdhaṃ, ye vo devatāpi jānanti kusalehi dhammehi parihāyamāne’’.
‘‘অপরেপি, ভিক্খৰে, তযো পরিহানিযে ধম্মে দেসেস্সামি। তং সুণাথ, সাধুকং মনসি করোথ; ভাসিস্সামী’’তি। ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং। ভগৰা এতদৰোচ – ‘‘কতমে চ, ভিক্খৰে, তযো পরিহানিযা ধম্মা? সঙ্গণিকারামতা, দোৰচস্সতা, পাপমিত্ততা – ইমে খো, ভিক্খৰে, তযো পরিহানিযা ধম্মা’’।
‘‘Aparepi, bhikkhave, tayo parihāniye dhamme desessāmi. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca – ‘‘katame ca, bhikkhave, tayo parihāniyā dhammā? Saṅgaṇikārāmatā, dovacassatā, pāpamittatā – ime kho, bhikkhave, tayo parihāniyā dhammā’’.
‘‘যে হি কেচি, ভিক্খৰে, অতীতমদ্ধানং পরিহাযিংসু কুসলেহি ধম্মেহি, সব্বেতে ইমেহেৰ ছহি ধম্মেহি পরিহাযিংসু কুসলেহি ধম্মেহি। যেপি হি কেচি, ভিক্খৰে, অনাগতমদ্ধানং পরিহাযিস্সন্তি কুসলেহি ধম্মেহি, সব্বেতে ইমেহেৰ ছহি ধম্মেহি পরিহাযিস্সন্তি কুসলেহি ধম্মেহি। যেপি হি কেচি, ভিক্খৰে, এতরহি পরিহাযন্তি কুসলেহি ধম্মেহি, সব্বেতে ইমেহেৰ ছহি ধম্মেহি পরিহাযন্তি কুসলেহি ধম্মেহী’’তি। পঠমং।
‘‘Ye hi keci, bhikkhave, atītamaddhānaṃ parihāyiṃsu kusalehi dhammehi, sabbete imeheva chahi dhammehi parihāyiṃsu kusalehi dhammehi. Yepi hi keci, bhikkhave, anāgatamaddhānaṃ parihāyissanti kusalehi dhammehi, sabbete imeheva chahi dhammehi parihāyissanti kusalehi dhammehi. Yepi hi keci, bhikkhave, etarahi parihāyanti kusalehi dhammehi, sabbete imeheva chahi dhammehi parihāyanti kusalehi dhammehī’’ti. Paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১-২. সামকসুত্তাদিৰণ্ণনা • 1-2. Sāmakasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-২. সামকসুত্তাদিৰণ্ণনা • 1-2. Sāmakasuttādivaṇṇanā
