| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
9. සමණබ්‍රාහ්‌මණසුත්‌තං
9. Samaṇabrāhmaṇasuttaṃ
29. සාවත්‌ථියං විහරති…පෙ.… ‘‘තත්‍ර ඛො…පෙ.… යෙ හි කෙචි, භික්‌ඛවෙ, සමණා වා බ්‍රාහ්‌මණා වා ජරාමරණං න පරිජානන්‌ති, ජරාමරණසමුදයං න පරිජානන්‌ති, ජරාමරණනිරොධං න පරිජානන්‌ති, ජරාමරණනිරොධගාමිනිං පටිපදං න පරිජානන්‌ති, ජාතිං න පරිජානන්‌ති…පෙ.… භවං… උපාදානං… තණ්‌හං… වෙදනං… ඵස්‌සං… සළායතනං… නාමරූපං… විඤ්‌ඤාණං… සඞ්‌ඛාරෙ… සඞ්‌ඛාරසමුදයං… සඞ්‌ඛාරනිරොධං… සඞ්‌ඛාරනිරොධගාමිනිං පටිපදං න පරිජානන්‌ති. න මෙතෙ, භික්‌ඛවෙ, සමණා වා බ්‍රාහ්‌මණා වා සමණෙසු වා සමණසම්‌මතා බ්‍රාහ්‌මණෙසු වා බ්‍රාහ්‌මණසම්‌මතා. න ච පනෙතෙ ආයස්‌මන්‌තො සාමඤ්‌ඤත්‌ථං වා බ්‍රහ්‌මඤ්‌ඤත්‌ථං වා දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරන්‌ති’’.
29. Sāvatthiyaṃ viharati…pe… ‘‘tatra kho…pe… ye hi keci, bhikkhave, samaṇā vā brāhmaṇā vā jarāmaraṇaṃ na parijānanti, jarāmaraṇasamudayaṃ na parijānanti, jarāmaraṇanirodhaṃ na parijānanti, jarāmaraṇanirodhagāminiṃ paṭipadaṃ na parijānanti, jātiṃ na parijānanti…pe… bhavaṃ… upādānaṃ… taṇhaṃ… vedanaṃ… phassaṃ… saḷāyatanaṃ… nāmarūpaṃ… viññāṇaṃ… saṅkhāre… saṅkhārasamudayaṃ… saṅkhāranirodhaṃ… saṅkhāranirodhagāminiṃ paṭipadaṃ na parijānanti. Na mete, bhikkhave, samaṇā vā brāhmaṇā vā samaṇesu vā samaṇasammatā brāhmaṇesu vā brāhmaṇasammatā. Na ca panete āyasmanto sāmaññatthaṃ vā brahmaññatthaṃ vā diṭṭheva dhamme sayaṃ abhiññā sacchikatvā upasampajja viharanti’’.
‘‘යෙ ච ඛො කෙචි, භික්‌ඛවෙ, සමණා වා බ්‍රාහ්‌මණා වා ජරාමරණං පරිජානන්‌ති, ජරාමරණසමුදයං පරිජානන්‌ති, ජරාමරණනිරොධං පරිජානන්‌ති, ජරාමරණනිරොධගාමිනිං පටිපදං පරිජානන්‌ති, ජාතිං පරිජානන්‌ති…පෙ.… භවං… උපාදානං… තණ්‌හං… වෙදනං… ඵස්‌සං… සළායතනං… නාමරූපං… විඤ්‌ඤාණං… සඞ්‌ඛාරෙ පරිජානන්‌ති , සඞ්‌ඛාරසමුදයං පරිජානන්‌ති, සඞ්‌ඛාරනිරොධං පරිජානන්‌ති, සඞ්‌ඛාරනිරොධගාමිනිං පටිපදං පරිජානන්‌ති. තෙ ඛො මෙ, භික්‌ඛවෙ, සමණා වා බ්‍රාහ්‌මණා වා සමණෙසු චෙව සමණසම්‌මතා බ්‍රාහ්‌මණෙසු ච බ්‍රාහ්‌මණසම්‌මතා. තෙ ච පනායස්‌මන්‌තො සාමඤ්‌ඤත්‌ථඤ්‌ච බ්‍රහ්‌මඤ්‌ඤත්‌ථඤ්‌ච දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරන්‌තී’’ති. නවමං.
‘‘Ye ca kho keci, bhikkhave, samaṇā vā brāhmaṇā vā jarāmaraṇaṃ parijānanti, jarāmaraṇasamudayaṃ parijānanti, jarāmaraṇanirodhaṃ parijānanti, jarāmaraṇanirodhagāminiṃ paṭipadaṃ parijānanti, jātiṃ parijānanti…pe… bhavaṃ… upādānaṃ… taṇhaṃ… vedanaṃ… phassaṃ… saḷāyatanaṃ… nāmarūpaṃ… viññāṇaṃ… saṅkhāre parijānanti , saṅkhārasamudayaṃ parijānanti, saṅkhāranirodhaṃ parijānanti, saṅkhāranirodhagāminiṃ paṭipadaṃ parijānanti. Te kho me, bhikkhave, samaṇā vā brāhmaṇā vā samaṇesu ceva samaṇasammatā brāhmaṇesu ca brāhmaṇasammatā. Te ca panāyasmanto sāmaññatthañca brahmaññatthañca diṭṭheva dhamme sayaṃ abhiññā sacchikatvā upasampajja viharantī’’ti. Navamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9. සමණබ්‍රාහ්‌මණසුත්‌තවණ්‌ණනා • 9. Samaṇabrāhmaṇasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 9. සමණබ්‍රාහ්‌මණසුත්‌තවණ්‌ණනා • 9. Samaṇabrāhmaṇasuttavaṇṇanā
