| Library / Tipiṭaka / តិបិដក • Tipiṭaka / ឥតិវុត្តក-អដ្ឋកថា • Itivuttaka-aṭṭhakathā |
៤. សមណព្រាហ្មណសុត្តវណ្ណនា
4. Samaṇabrāhmaṇasuttavaṇṇanā
១០៣. ចតុត្ថេ យេ ហិ កេចីតិ យេ កេចិ។ ឥទំ ទុក្ខន្តិ យថាភូតំ នប្បជានន្តីតិ ‘‘ឥទំ ទុក្ខំ, ឯត្តកំ ទុក្ខំ, ន ឥតោ ភិយ្យោ’’តិ អវិបរីតំ សភាវសរសលក្ខណតោ វិបស្សនាបញ្ញាសហិតាយ មគ្គបញ្ញាយ ទុក្ខសច្ចំ ន ជានន្តិ ន បដិវិជ្ឈន្តិ។ សេសេសុបិ ឯសេវ នយោ។ ន មេ តេ, ភិក្ខវេតិអាទីសុ អយំ សង្ខេបត្ថោ – ភិក្ខវេ, ចតុសច្ចកម្មដ្ឋានំ អននុយុត្តា បព្ពជ្ជាមត្តសមណា ចេវ ជាតិមត្តព្រាហ្មណា ច ន មយា តេ សមិតបាបសមណេសុ សមណោតិ, ពាហិតបាបព្រាហ្មណេសុ ព្រាហ្មណោតិ ច សម្មតា អនុញ្ញាតា។ កស្មា? សមណករណានំ ព្រាហ្មណករណានញ្ច ធម្មានំ អភាវតោតិ។ តេនេវាហ ‘‘ន ច បន តេ អាយស្មន្តោ’’តិអាទិ។ តត្ថ សាមញ្ញត្ថន្តិ សាមញ្ញសង្ខាតំ អត្ថំ, ចត្តារិ សាមញ្ញផលានីតិ អត្ថោ។ ព្រហ្មញ្ញត្ថន្តិ តស្សេវ វេវចនំ។ អបរេ បន ‘‘សាមញ្ញត្ថន្តិ ចត្តារោ អរិយមគ្គា, ព្រហ្មញ្ញត្ថន្តិ ចត្តារិ អរិយផលានី’’តិ វទន្តិ។ សេសំ វុត្តនយមេវ។ សុក្កបក្ខោ វុត្តវិបរិយាយេន វេទិតព្ពោ។ គាថាសុ អបុព្ពំ នត្ថិ។
103. Catutthe ye hi kecīti ye keci. Idaṃ dukkhanti yathābhūtaṃ nappajānantīti ‘‘idaṃ dukkhaṃ, ettakaṃ dukkhaṃ, na ito bhiyyo’’ti aviparītaṃ sabhāvasarasalakkhaṇato vipassanāpaññāsahitāya maggapaññāya dukkhasaccaṃ na jānanti na paṭivijjhanti. Sesesupi eseva nayo. Na me te, bhikkhavetiādīsu ayaṃ saṅkhepattho – bhikkhave, catusaccakammaṭṭhānaṃ ananuyuttā pabbajjāmattasamaṇā ceva jātimattabrāhmaṇā ca na mayā te samitapāpasamaṇesu samaṇoti, bāhitapāpabrāhmaṇesu brāhmaṇoti ca sammatā anuññātā. Kasmā? Samaṇakaraṇānaṃ brāhmaṇakaraṇānañca dhammānaṃ abhāvatoti. Tenevāha ‘‘na ca pana te āyasmanto’’tiādi. Tattha sāmaññatthanti sāmaññasaṅkhātaṃ atthaṃ, cattāri sāmaññaphalānīti attho. Brahmaññatthanti tasseva vevacanaṃ. Apare pana ‘‘sāmaññatthanti cattāro ariyamaggā, brahmaññatthanti cattāri ariyaphalānī’’ti vadanti. Sesaṃ vuttanayameva. Sukkapakkho vuttavipariyāyena veditabbo. Gāthāsu apubbaṃ natthi.
ចតុត្ថសុត្តវណ្ណនា និដ្ឋិតា។
Catutthasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / ឥតិវុត្តកបាឡិ • Itivuttakapāḷi / ៤. សមណព្រាហ្មណសុត្តំ • 4. Samaṇabrāhmaṇasuttaṃ
