| Library / Tipiṭaka / තිපිටක • Tipiṭaka / ඉතිවුත්‌තක-අට්‌ඨකථා • Itivuttaka-aṭṭhakathā |
4. සමණබ්‍රාහ්‌මණසුත්‌තවණ්‌ණනා
4. Samaṇabrāhmaṇasuttavaṇṇanā
103. චතුත්‌ථෙ යෙ හි කෙචීති යෙ කෙචි. ඉදං දුක්‌ඛන්‌ති යථාභූතං නප්‌පජානන්‌තීති ‘‘ඉදං දුක්‌ඛං, එත්‌තකං දුක්‌ඛං, න ඉතො භිය්‍යො’’ති අවිපරීතං සභාවසරසලක්‌ඛණතො විපස්‌සනාපඤ්‌ඤාසහිතාය මග්‌ගපඤ්‌ඤාය දුක්‌ඛසච්‌චං න ජානන්‌ති න පටිවිජ්‌ඣන්‌ති. සෙසෙසුපි එසෙව නයො. න මෙ තෙ, භික්‌ඛවෙතිආදීසු අයං සඞ්‌ඛෙපත්‌ථො – භික්‌ඛවෙ, චතුසච්‌චකම්‌මට්‌ඨානං අනනුයුත්‌තා පබ්‌බජ්‌ජාමත්‌තසමණා චෙව ජාතිමත්‌තබ්‍රාහ්‌මණා ච න මයා තෙ සමිතපාපසමණෙසු සමණොති, බාහිතපාපබ්‍රාහ්‌මණෙසු බ්‍රාහ්‌මණොති ච සම්‌මතා අනුඤ්‌ඤාතා. කස්‌මා? සමණකරණානං බ්‍රාහ්‌මණකරණානඤ්‌ච ධම්‌මානං අභාවතොති. තෙනෙවාහ ‘‘න ච පන තෙ ආයස්‌මන්‌තො’’තිආදි. තත්‌ථ සාමඤ්‌ඤත්‌ථන්‌ති සාමඤ්‌ඤසඞ්‌ඛාතං අත්‌ථං, චත්‌තාරි සාමඤ්‌ඤඵලානීති අත්‌ථො. බ්‍රහ්‌මඤ්‌ඤත්‌ථන්‌ති තස්‌සෙව වෙවචනං. අපරෙ පන ‘‘සාමඤ්‌ඤත්‌ථන්‌ති චත්‌තාරො අරියමග්‌ගා, බ්‍රහ්‌මඤ්‌ඤත්‌ථන්‌ති චත්‌තාරි අරියඵලානී’’ති වදන්‌ති. සෙසං වුත්‌තනයමෙව. සුක්‌කපක්‌ඛො වුත්‌තවිපරියායෙන වෙදිතබ්‌බො. ගාථාසු අපුබ්‌බං නත්‌ථි.
103. Catutthe ye hi kecīti ye keci. Idaṃ dukkhanti yathābhūtaṃ nappajānantīti ‘‘idaṃ dukkhaṃ, ettakaṃ dukkhaṃ, na ito bhiyyo’’ti aviparītaṃ sabhāvasarasalakkhaṇato vipassanāpaññāsahitāya maggapaññāya dukkhasaccaṃ na jānanti na paṭivijjhanti. Sesesupi eseva nayo. Na me te, bhikkhavetiādīsu ayaṃ saṅkhepattho – bhikkhave, catusaccakammaṭṭhānaṃ ananuyuttā pabbajjāmattasamaṇā ceva jātimattabrāhmaṇā ca na mayā te samitapāpasamaṇesu samaṇoti, bāhitapāpabrāhmaṇesu brāhmaṇoti ca sammatā anuññātā. Kasmā? Samaṇakaraṇānaṃ brāhmaṇakaraṇānañca dhammānaṃ abhāvatoti. Tenevāha ‘‘na ca pana te āyasmanto’’tiādi. Tattha sāmaññatthanti sāmaññasaṅkhātaṃ atthaṃ, cattāri sāmaññaphalānīti attho. Brahmaññatthanti tasseva vevacanaṃ. Apare pana ‘‘sāmaññatthanti cattāro ariyamaggā, brahmaññatthanti cattāri ariyaphalānī’’ti vadanti. Sesaṃ vuttanayameva. Sukkapakkho vuttavipariyāyena veditabbo. Gāthāsu apubbaṃ natthi.
චතුත්‌ථසුත්‌තවණ්‌ණනා නිට්‌ඨිතා.
Catutthasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / ඉතිවුත්‌තකපාළි • Itivuttakapāḷi / 4. සමණබ්‍රාහ්‌මණසුත්‌තං • 4. Samaṇabrāhmaṇasuttaṃ
