| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
8. ஸமணமுண்டி³காபுத்தஸுத்தவண்ணனா
8. Samaṇamuṇḍikāputtasuttavaṇṇanā
260. உக்³க³ஹிதுந்தி ஸிக்கி²துங். உக்³கா³ஹேதுந்தி ஸிக்கா²பேதுங், பாட²தோ அத்தனா யதா²உக்³க³ஹிதமத்த²ங் தப்³பி³பா⁴வனத்தா²ய உச்சாரணவஸேன பரேஸங் கா³ஹேதுந்தி அத்தோ². ஸமயந்தி தி³ட்டி²ங். ஸா ஹி ஸங்யோஜனபா⁴வதோ ஸமேதி ஸம்ப³ந்தா⁴ ஏதி பவத்ததி, த³ள்ஹக்³க³ஹணபா⁴வதோ வா ஸங்யுத்தா அயந்தி பவத்தந்தி ஸத்தா யதா²பி⁴னிவேஸங் ஏதேனாதி ஸமயோதி வுச்சதி. தி³ட்டி²ஸங்யோஜனேன ஹி ஸத்தா அதிவிய ப³ஜ்ஜ²ந்தீதி. ஸூரியஸ்ஸ உக்³க³மனதோ அத்த²ங்க³மா அயங் எத்தகோ காலோ ரத்தந்த⁴காரவித⁴மனதோ தி³வா நாம, தஸ்ஸ பன மஜ்ஜி²மபஹாரஸஞ்ஞிதோ காலோ ஸமுஜ்ஜலிதபபா⁴தேஜத³ஹனபா⁴வேன தி³வா நாம. தேனாஹ ‘‘தி³வஸஸ்ஸபி தி³வாபூ⁴தே’’தி. படிஸங்ஹரித்வாதி நிவத்தெத்வா. ஏவங் சித்தஸ்ஸ படிஸங்ஹரணங் நாம கோ³சரக்கெ²த்தே ட²பனந்தி ஆஹ ‘‘ஜா²னரதிஸேவனவஸேன ஏகீபா⁴வங் க³தோ’’தி. ஏதேன காயவிவேகபுப்³ப³கங் சித்தவிவேகமாஹ. ஸீலாதி³கு³ணவிஸேஸயோக³தோ மனஸா ஸம்பா⁴வனீயா, தே பன யஸ்மா அத்தனோ ஸீலாதி³கு³ணேஹி விஞ்ஞூனங் மனாபா ஹொந்தி (கிலேஸஅனிக்³க³ஹஸ்ஸ பஞ்சபஸாதா³யத்தத்தா,) தஸ்மா ஆஹ ‘‘மனவட்³ட⁴னகான’’ந்திஆதி³. தத்த² உன்னமதீதி உத³க்³க³ங் ஹோதி. வட்³ட⁴தீதி ஸத்³தா⁴வஸேன வட்³ட⁴தி. தேனாஹ ப⁴க³வா – ‘‘அனுஸ்ஸரணம்பஹங், பி⁴க்க²வே, தேஸங் பி⁴க்கூ²னங் ப³ஹூபகாரங் வதா³மீ’’தி (இதிவு॰ 104; ஸங்॰ நி॰ 5.184).
260.Uggahitunti sikkhituṃ. Uggāhetunti sikkhāpetuṃ, pāṭhato attanā yathāuggahitamatthaṃ tabbibhāvanatthāya uccāraṇavasena paresaṃ gāhetunti attho. Samayanti diṭṭhiṃ. Sā hi saṃyojanabhāvato sameti sambandhā eti pavattati, daḷhaggahaṇabhāvato vā saṃyuttā ayanti pavattanti sattā yathābhinivesaṃ etenāti samayoti vuccati. Diṭṭhisaṃyojanena hi sattā ativiya bajjhantīti. Sūriyassa uggamanato atthaṅgamā ayaṃ ettako kālo rattandhakāravidhamanato divā nāma, tassa pana majjhimapahārasaññito kālo samujjalitapabhātejadahanabhāvena divā nāma. Tenāha ‘‘divasassapi divābhūte’’ti. Paṭisaṃharitvāti nivattetvā. Evaṃ cittassa paṭisaṃharaṇaṃ nāma gocarakkhette ṭhapananti āha ‘‘jhānaratisevanavasena ekībhāvaṃ gato’’ti. Etena kāyavivekapubbakaṃ cittavivekamāha. Sīlādiguṇavisesayogato manasā sambhāvanīyā, te pana yasmā attano sīlādiguṇehi viññūnaṃ manāpā honti (kilesaaniggahassa pañcapasādāyattattā,) tasmā āha ‘‘manavaḍḍhanakāna’’ntiādi. Tattha unnamatīti udaggaṃ hoti. Vaḍḍhatīti saddhāvasena vaḍḍhati. Tenāha bhagavā – ‘‘anussaraṇampahaṃ, bhikkhave, tesaṃ bhikkhūnaṃ bahūpakāraṃ vadāmī’’ti (itivu. 104; saṃ. ni. 5.184).
261. பஞ்ஞபேமீதி பஜானநபா⁴வேன ஞாபேமி ததா² வவத்த²பேமி. தேனாஹ ‘‘த³ஸ்ஸேமி ட²பேமீ’’தி. பரிபுண்ணகுஸலந்தி ஸப்³ப³ஸோ புண்ணகுஸலத⁴ம்மங், உத்தமகுஸலந்தி உத்தமபா⁴வங் ஸெட்ட²பா⁴வங் பத்தகுஸலத⁴ம்மங். அயொஜ்ஜ²ந்தி வாத³யுத்³தே⁴ன அயோத⁴னீயங், வாத³யுத்³த⁴ங் ஹோது, தேன பராஜயோ ந ஹோதீதி த³ஸ்ஸேதி, தேனாஹ ‘‘வாத³யுத்³தே⁴னா’’திஆதி³. ஸங்வரப்பஹானந்தி பஞ்சஸு ஸங்வரேஸு யேன கேனசி ஸங்வரேன ஸங்வரலக்க²ணங் பஹானங். படிஸேவனப்பஹானங் வாதி வா-ஸத்³தே³ன பரிவஜ்ஜனப்பஹானாதி³ங் ஸங்க³ண்ஹாதி. ஸேஸபதே³ஸூதி ‘‘ந பா⁴ஸதீ’’திஆதீ³ஸு பதே³ஸு. ஏஸேவ நயோதி இமினா ‘‘அபா⁴ஸனமத்தமேவ வத³தீ’’தி ஏவமாதி³ங் அதிதி³ஸதி.
261.Paññapemīti pajānanabhāvena ñāpemi tathā vavatthapemi. Tenāha ‘‘dassemi ṭhapemī’’ti. Paripuṇṇakusalanti sabbaso puṇṇakusaladhammaṃ, uttamakusalanti uttamabhāvaṃ seṭṭhabhāvaṃ pattakusaladhammaṃ. Ayojjhanti vādayuddhena ayodhanīyaṃ, vādayuddhaṃ hotu, tena parājayo na hotīti dasseti, tenāha ‘‘vādayuddhenā’’tiādi. Saṃvarappahānanti pañcasu saṃvaresu yena kenaci saṃvarena saṃvaralakkhaṇaṃ pahānaṃ. Paṭisevanappahānaṃ vāti vā-saddena parivajjanappahānādiṃ saṅgaṇhāti. Sesapadesūti ‘‘na bhāsatī’’tiādīsu padesu. Eseva nayoti iminā ‘‘abhāsanamattameva vadatī’’ti evamādiṃ atidisati.
நாபி⁴னந்தீ³தி ந ஸம்படிச்சி². ஸாஸனே திண்ணங் து³ச்சரிதானங் மிச்சா²ஜீவஸ்ஸ விவஜ்ஜனங் வண்ணீயதி, அயஞ்ச ஏவங் கதே²தி, தஸ்மா ஸாஸனஸ்ஸ அனுலோமங் விய வத³தி, வத³ந்தோ ச ஸம்மாஸம்பு³த்³தே⁴ த⁴ம்மே சஸ்ஸ அப்பஸாத³ங் ந த³ஸ்ஸேதி, தஸ்மா பஸன்னகாரம்பி வத³தீதி மஞ்ஞமானோ தஸ்ஸ வாத³ங் ந படிஸேதே⁴தி.
Nābhinandīti na sampaṭicchi. Sāsane tiṇṇaṃ duccaritānaṃ micchājīvassa vivajjanaṃ vaṇṇīyati, ayañca evaṃ katheti, tasmā sāsanassa anulomaṃ viya vadati, vadanto ca sammāsambuddhe dhamme cassa appasādaṃ na dasseti, tasmā pasannakārampi vadatīti maññamāno tassa vādaṃ na paṭisedheti.
262. யதா² தஸ்ஸ வசனங், ஏவங் ஸந்தேதி யதா² தஸ்ஸ பரிப்³பா³ஜகஸ்ஸ வசனங், ஏவங் ஸமணபா⁴வே ஸந்தே லப்³ப⁴மானே. மயங் பன ஏவங் ந வதா³மாதி ஏதேன ஸமணபா⁴வோ நாம ஏவங் ந ஹோதீதி த³ஸ்ஸேதி. யோ ஹி த⁴ம்மோ யாதி³ஸோ, ததே²வ தங் பு³த்³தா⁴ தீ³பெந்தி. விஸேஸஞாணங் ந ஹோதீதி காயவிஸேஸவிஸயஞாணங் தஸ்ஸ ததா³ நத்தி², யதோ பரகாயே உபக்கமங் கரெய்யாதி த³ஸ்ஸேதி, தஸ்ஸ பன தத்த² விஸேஸஞாணம்பி நத்தே²வாதி. யஸ்மா காயபடிப³த்³த⁴ங் காயகம்மங், தஸ்மா தங் நிவத்தெந்தோ ஆஹ ‘‘அஞ்ஞத்ர ப²ந்தி³தமத்தா’’தி. கிலேஸஸஹக³தசித்தேனேவாதி து³க்க²ஸம்ப²ஸ்ஸஸ்ஸ அஸஹனநிமித்தேன தோ³மனஸ்ஸஸஹக³தசித்தேனேவ. து³தியவாரேபி ஏஸேவ நயோ. ஜிக⁴ச்சா²பிபாஸது³க்க²ஸ்ஸ அஸஹனநிமித்தேன தோ³மனஸ்ஸேனேவ. விகூஜிதமத்தாதி எத்த² விரூபங் கூஜிதங் விகூஜிதங் புப்³பே³னிவாஸஸன்னிஸ்ஸயங் உபயங், தங் பனெத்த² ரோத³னஹஸனஸமுட்டா²பகசித்தஸஹக³தந்தி தோ³ஸஸஹக³தங் லோப⁴ஸஹக³தஞ்சாதி த³ட்ட²ப்³ப³ங். சித்தந்தி குஸலசித்தங். அகுஸலசித்தங் பன அதீதாரம்மணங் பவத்ததீதி வத்தப்³ப³மேவ நத்தி². ஸரித்வாதி யாவ ந ஸதிஸண்டா²பனா த⁴ம்மா உப்பஜ்ஜந்தி, தாவ ஸுபினந்தே அனுபூ⁴தங் விய து³க்க²ங் ஸரித்வா ரோத³ந்தி. ஹஸந்தீதி எத்தா²பி ஏஸேவ நயோ. அயஞ்ச நயோ யே லத்³த⁴ஸுகா²ரம்மணா ஹுத்வா க³ஹிதபடிஸந்தி⁴கா மாதுகுச்சி²தோபி ஸுகே²னேவ நிக்க²மந்தி, தேஸங் வஸேன வுத்தோதி த³ட்ட²ப்³போ³. பாயந்தியாதி அத்தனோ ஜனபத³தே³ஸரூபேன பாயந்தியா. அயம்பீதி ஆஜீவோபி மாது அஞ்ஞவிஹிதகாலே ச லோகஸ்ஸாத³வஸேன கிலேஸஸஹக³தசித்தேனேவ ஹோதி.
262.Yathātassa vacanaṃ, evaṃ santeti yathā tassa paribbājakassa vacanaṃ, evaṃ samaṇabhāve sante labbhamāne. Mayaṃ pana evaṃ na vadāmāti etena samaṇabhāvo nāma evaṃ na hotīti dasseti. Yo hi dhammo yādiso, tatheva taṃ buddhā dīpenti. Visesañāṇaṃ na hotīti kāyavisesavisayañāṇaṃ tassa tadā natthi, yato parakāye upakkamaṃ kareyyāti dasseti, tassa pana tattha visesañāṇampi natthevāti. Yasmā kāyapaṭibaddhaṃ kāyakammaṃ, tasmā taṃ nivattento āha ‘‘aññatra phanditamattā’’ti. Kilesasahagatacittenevāti dukkhasamphassassa asahananimittena domanassasahagatacitteneva. Dutiyavārepi eseva nayo. Jighacchāpipāsadukkhassa asahananimittena domanasseneva. Vikūjitamattāti ettha virūpaṃ kūjitaṃ vikūjitaṃ pubbenivāsasannissayaṃ upayaṃ, taṃ panettha rodanahasanasamuṭṭhāpakacittasahagatanti dosasahagataṃ lobhasahagatañcāti daṭṭhabbaṃ. Cittanti kusalacittaṃ. Akusalacittaṃ pana atītārammaṇaṃ pavattatīti vattabbameva natthi. Saritvāti yāva na satisaṇṭhāpanā dhammā uppajjanti, tāva supinante anubhūtaṃ viya dukkhaṃ saritvā rodanti. Hasantīti etthāpi eseva nayo. Ayañca nayo ye laddhasukhārammaṇā hutvā gahitapaṭisandhikā mātukucchitopi sukheneva nikkhamanti, tesaṃ vasena vuttoti daṭṭhabbo. Pāyantiyāti attano janapadadesarūpena pāyantiyā. Ayampīti ājīvopi mātu aññavihitakāle ca lokassādavasena kilesasahagatacitteneva hoti.
263. ஸமதி⁴க³ய்ஹாதி ஸம்மா அதி⁴க³தபா⁴வேன க³ஹெத்வா அபி⁴ப⁴வித்வா விஸேஸெத்வா விஸிட்டோ² ஹுத்வா. கீ²ணாஸவங் ஸந்தா⁴யாதி ப்³யதிரேகவஸேன கீ²ணாஸவங் ஸந்தா⁴ய. அயஞ்ஹெத்த² அத்தோ² – கீ²ணாஸவம்பி ஸோதாபன்னகுஸலங் பஞ்ஞபேதி ஸெக்க²பூ⁴மியங் டி²தத்தா. ஸேஸபதே³ஸுபி ஏஸேவ நயோ.
263.Samadhigayhāti sammā adhigatabhāvena gahetvā abhibhavitvā visesetvā visiṭṭho hutvā. Khīṇāsavaṃ sandhāyāti byatirekavasena khīṇāsavaṃ sandhāya. Ayañhettha attho – khīṇāsavampi sotāpannakusalaṃ paññapeti sekkhabhūmiyaṃ ṭhitattā. Sesapadesupi eseva nayo.
தீணி பதா³னி நிஸ்ஸாயாதி ந காயேன பாபகங் கம்மங் கரோதி, ந பாபகங் வாசங் பா⁴ஸதி, ந பாபகங் ஆஜீவங் ஆஜீவதீதி இமானி தீணி பதா³னி நிஸ்ஸாய குஸலஸீலமூலகா ச அகுஸலஸீலமூலகா சாதி த்³வே பட²மசதுக்கா ட²பிதா. ஏகங் பத³ங் நிஸ்ஸாயாதி ந பாபகங் ஸங்கப்பங் ஸங்கப்பேதீதி இமங் ஏகபத³ங் நிஸ்ஸாய குஸலஸங்கப்பமூலகா அகுஸலஸங்கப்பமூலகா சாதி இமே த்³வே பச்சி²மசதுக்கா ட²பிதா.
Tīṇi padāni nissāyāti na kāyena pāpakaṃ kammaṃ karoti, na pāpakaṃ vācaṃ bhāsati, na pāpakaṃ ājīvaṃ ājīvatīti imāni tīṇi padāni nissāya kusalasīlamūlakā ca akusalasīlamūlakā cāti dve paṭhamacatukkā ṭhapitā. Ekaṃ padaṃ nissāyāti na pāpakaṃ saṅkappaṃ saṅkappetīti imaṃ ekapadaṃ nissāya kusalasaṅkappamūlakā akusalasaṅkappamūlakā cāti ime dve pacchimacatukkā ṭhapitā.
264. விசிகிச்சு²த்³த⁴ச்சஸஹக³தசித்தத்³வயம்பி வட்டதி ப³லவதா மோஹேன ஸமன்னாக³தத்தா. ததா² ஹி தானி ‘‘மோமூஹசித்தானீ’’தி வுச்சந்தி.
264.Vicikicchuddhaccasahagatacittadvayampi vaṭṭati balavatā mohena samannāgatattā. Tathā hi tāni ‘‘momūhacittānī’’ti vuccanti.
குஹிந்தி கிங்னிமித்தங். கதரங்டா²னங் பாபுணித்வாதி கிங் காரணங் ஆக³ம்ம. எத்தே²தேதி எத்தா²தி காயவசீமனோஸுசரிதபா⁴வனாஸாஜீவனிப்ப²த்தியங் . ஸா பன ஹெட்டி²மகோடியா ஸோதாபத்திப²லேன தீ³பேதப்³பா³தி ஆஹ ‘‘ஸோதாபத்திப²லே பு⁴ம்ம’’ந்தி. யஸ்மா ஆஜீவட்ட²மகங் அவஸிட்ட²ஞ்ச ஸீலங் பாதிமொக்க²ஸங்வரஸீலஸ்ஸ ச பாரிஸுத்³தி⁴பாதிமொக்கா²தி⁴க³மேன ஸோதாபத்திப²லப்பத்தியா ஸித்³தோ⁴ ஹோதீதி ஆஹ – ‘‘பாதிமொக்க²…பே॰… நிருஜ்ஜ²தீ’’தி. ‘‘ஸுக²ஸீலோ து³க்க²ஸீலோ’’திஆதீ³ஸு விய பகதிஅத்த²ஸீலஸத்³த³ங் க³ஹெத்வா வுத்தங் ‘‘அகுஸலஸீல’’ந்திஆதி³.
Kuhinti kiṃnimittaṃ. Kataraṃṭhānaṃ pāpuṇitvāti kiṃ kāraṇaṃ āgamma. Ettheteti etthāti kāyavacīmanosucaritabhāvanāsājīvanipphattiyaṃ . Sā pana heṭṭhimakoṭiyā sotāpattiphalena dīpetabbāti āha ‘‘sotāpattiphale bhumma’’nti. Yasmā ājīvaṭṭhamakaṃ avasiṭṭhañca sīlaṃ pātimokkhasaṃvarasīlassa ca pārisuddhipātimokkhādhigamena sotāpattiphalappattiyā siddho hotīti āha – ‘‘pātimokkha…pe… nirujjhatī’’ti. ‘‘Sukhasīlo dukkhasīlo’’tiādīsu viya pakatiatthasīlasaddaṃ gahetvā vuttaṃ ‘‘akusalasīla’’ntiādi.
265. காமாவசரகுஸலசித்தமேவ வுத்தங் ஸம்பத்தஸமாதா³னவிரதிபுப்³ப³கஸ்ஸ ஸீலஸ்ஸ அதி⁴ப்பேதத்தா. தேனாஹ – ‘‘ஏதேன ஹி குஸலஸீலங் ஸமுட்டா²தீ’’தி.
265.Kāmāvacarakusalacittameva vuttaṃ sampattasamādānaviratipubbakassa sīlassa adhippetattā. Tenāha – ‘‘etena hi kusalasīlaṃ samuṭṭhātī’’ti.
ஸீலவாதி எத்த² வா-ஸத்³தோ³ பாஸங்ஸத்தோ²வ வேதி³தப்³போ³தி ஆஹ ‘‘ஸீலஸம்பன்னோ ஹோதீ’’தி. யோ ஸீலமத்தே பதிட்டி²தோ, ந ஸமாதி⁴பஞ்ஞாஸு, ஸோ ஸீலமயத⁴ம்மபூரிததாய ஸீலமயோ. தேனாஹ ‘‘அலமெத்தாவதா’’திஆதி³. யத்தா²தி யஸ்ஸங் சேதோவிமுத்தியங் பஞ்ஞாவிமுத்தியஞ்ச. தது³ப⁴யஞ்ச யஸ்மா அரஹத்தப²லே ஸங்க³ஹிதங், தஸ்மா வுத்தங் ‘‘அரஹத்தப²லே பு⁴ம்ம’’ந்தி. அஸேஸங் நிருஜ்ஜ²தி ஸுக²விபாகபா⁴வஸ்ஸ ஸப்³ப³ஸோ படிப்பஸ்ஸம்ப⁴னதோ.
Sīlavāti ettha vā-saddo pāsaṃsatthova veditabboti āha ‘‘sīlasampanno hotī’’ti. Yo sīlamatte patiṭṭhito, na samādhipaññāsu, so sīlamayadhammapūritatāya sīlamayo. Tenāha ‘‘alamettāvatā’’tiādi. Yatthāti yassaṃ cetovimuttiyaṃ paññāvimuttiyañca. Tadubhayañca yasmā arahattaphale saṅgahitaṃ, tasmā vuttaṃ ‘‘arahattaphale bhumma’’nti. Asesaṃ nirujjhati sukhavipākabhāvassa sabbaso paṭippassambhanato.
266. காமபடிஸங்யுத்தா ஸஞ்ஞா காமஸஞ்ஞா. ஸேஸேஸுபி ஏஸேவ நயோ. இதரா த்³வேதி ப்³யாபாத³விஹிங்ஸாஸஞ்ஞா.
266. Kāmapaṭisaṃyuttā saññā kāmasaññā. Sesesupi eseva nayo. Itarā dveti byāpādavihiṃsāsaññā.
அனாகா³மிப²லபட²மஜ்ஜா²னந்தி அனாகா³மிப²லஸஹக³தங் பட²மஜ்ஜா²னங். எத்தா²தி யதா²வுத்தே பட²மஜ்ஜா²னே. எத்த² ச உஜுவிபச்சனீகேன படிபக்க²ப்பஹானங் ஸாதிஸயந்தி பட²மஜ்ஜா²னக்³க³ஹணங். தேனாஹ ‘‘அபரிஸேஸா நிருஜ்ஜ²ந்தீ’’தி. நெக்க²ம்மஸஞ்ஞானங் காமாவசரசித்தஸஹக³ததா தஸ்ஸ ஸீலஸ்ஸ ஸமுட்டா²னதா ச ஸம்பயுத்தனயேன வேதி³தப்³பா³.
Anāgāmiphalapaṭhamajjhānanti anāgāmiphalasahagataṃ paṭhamajjhānaṃ. Etthāti yathāvutte paṭhamajjhāne. Ettha ca ujuvipaccanīkena paṭipakkhappahānaṃ sātisayanti paṭhamajjhānaggahaṇaṃ. Tenāha ‘‘aparisesā nirujjhantī’’ti. Nekkhammasaññānaṃ kāmāvacaracittasahagatatā tassa sīlassa samuṭṭhānatā ca sampayuttanayena veditabbā.
267. குஸலஸங்கப்பனிரோத⁴து³தியஜ்ஜா²னிகஅரஹத்தப²லஅகுஸலஸங்கப்பனிரோத⁴- பட²மஜ்ஜா²னிகஅனாகா³மிப²லக்³க³ஹணேன ஸமணோ த³ஸ்ஸிதோ. ஸேஸங் ஸுவிஞ்ஞெய்யமேவ.
267. Kusalasaṅkappanirodhadutiyajjhānikaarahattaphalaakusalasaṅkappanirodha- paṭhamajjhānikaanāgāmiphalaggahaṇena samaṇo dassito. Sesaṃ suviññeyyameva.
ஸமணமுண்டி³காபுத்தஸுத்தவண்ணனாய லீனத்த²ப்பகாஸனா ஸமத்தா.
Samaṇamuṇḍikāputtasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. ஸமணமுண்டி³கஸுத்தங் • 8. Samaṇamuṇḍikasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 8. ஸமணமுண்டி³கஸுத்தவண்ணனா • 8. Samaṇamuṇḍikasuttavaṇṇanā
