| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৮. সমণমুণ্ডিকাপুত্তসুত্তৰণ্ণনা
8. Samaṇamuṇḍikāputtasuttavaṇṇanā
২৬০. উগ্গহিতুন্তি সিক্খিতুং। উগ্গাহেতুন্তি সিক্খাপেতুং, পাঠতো অত্তনা যথাউগ্গহিতমত্থং তব্বিভাৰনত্থায উচ্চারণৰসেন পরেসং গাহেতুন্তি অত্থো। সমযন্তি দিট্ঠিং। সা হি সংযোজনভাৰতো সমেতি সম্বন্ধা এতি পৰত্ততি, দল়্হগ্গহণভাৰতো ৰা সংযুত্তা অযন্তি পৰত্তন্তি সত্তা যথাভিনিৰেসং এতেনাতি সমযোতি ৰুচ্চতি। দিট্ঠিসংযোজনেন হি সত্তা অতিৰিয বজ্ঝন্তীতি। সূরিযস্স উগ্গমনতো অত্থঙ্গমা অযং এত্তকো কালো রত্তন্ধকারৰিধমনতো দিৰা নাম, তস্স পন মজ্ঝিমপহারসঞ্ঞিতো কালো সমুজ্জলিতপভাতেজদহনভাৰেন দিৰা নাম। তেনাহ ‘‘দিৰসস্সপি দিৰাভূতে’’তি। পটিসংহরিত্ৰাতি নিৰত্তেত্ৰা। এৰং চিত্তস্স পটিসংহরণং নাম গোচরক্খেত্তে ঠপনন্তি আহ ‘‘ঝানরতিসেৰনৰসেন একীভাৰং গতো’’তি। এতেন কাযৰিৰেকপুব্বকং চিত্তৰিৰেকমাহ। সীলাদিগুণৰিসেসযোগতো মনসা সম্ভাৰনীযা, তে পন যস্মা অত্তনো সীলাদিগুণেহি ৰিঞ্ঞূনং মনাপা হোন্তি (কিলেসঅনিগ্গহস্স পঞ্চপসাদাযত্তত্তা,) তস্মা আহ ‘‘মনৰড্ঢনকান’’ন্তিআদি। তত্থ উন্নমতীতি উদগ্গং হোতি। ৰড্ঢতীতি সদ্ধাৰসেন ৰড্ঢতি। তেনাহ ভগৰা – ‘‘অনুস্সরণম্পহং, ভিক্খৰে, তেসং ভিক্খূনং বহূপকারং ৰদামী’’তি (ইতিৰু॰ ১০৪; সং॰ নি॰ ৫.১৮৪)।
260.Uggahitunti sikkhituṃ. Uggāhetunti sikkhāpetuṃ, pāṭhato attanā yathāuggahitamatthaṃ tabbibhāvanatthāya uccāraṇavasena paresaṃ gāhetunti attho. Samayanti diṭṭhiṃ. Sā hi saṃyojanabhāvato sameti sambandhā eti pavattati, daḷhaggahaṇabhāvato vā saṃyuttā ayanti pavattanti sattā yathābhinivesaṃ etenāti samayoti vuccati. Diṭṭhisaṃyojanena hi sattā ativiya bajjhantīti. Sūriyassa uggamanato atthaṅgamā ayaṃ ettako kālo rattandhakāravidhamanato divā nāma, tassa pana majjhimapahārasaññito kālo samujjalitapabhātejadahanabhāvena divā nāma. Tenāha ‘‘divasassapi divābhūte’’ti. Paṭisaṃharitvāti nivattetvā. Evaṃ cittassa paṭisaṃharaṇaṃ nāma gocarakkhette ṭhapananti āha ‘‘jhānaratisevanavasena ekībhāvaṃ gato’’ti. Etena kāyavivekapubbakaṃ cittavivekamāha. Sīlādiguṇavisesayogato manasā sambhāvanīyā, te pana yasmā attano sīlādiguṇehi viññūnaṃ manāpā honti (kilesaaniggahassa pañcapasādāyattattā,) tasmā āha ‘‘manavaḍḍhanakāna’’ntiādi. Tattha unnamatīti udaggaṃ hoti. Vaḍḍhatīti saddhāvasena vaḍḍhati. Tenāha bhagavā – ‘‘anussaraṇampahaṃ, bhikkhave, tesaṃ bhikkhūnaṃ bahūpakāraṃ vadāmī’’ti (itivu. 104; saṃ. ni. 5.184).
২৬১. পঞ্ঞপেমীতি পজাননভাৰেন ঞাপেমি তথা ৰৰত্থপেমি। তেনাহ ‘‘দস্সেমি ঠপেমী’’তি। পরিপুণ্ণকুসলন্তি সব্বসো পুণ্ণকুসলধম্মং, উত্তমকুসলন্তি উত্তমভাৰং সেট্ঠভাৰং পত্তকুসলধম্মং। অযোজ্ঝন্তি ৰাদযুদ্ধেন অযোধনীযং, ৰাদযুদ্ধং হোতু, তেন পরাজযো ন হোতীতি দস্সেতি, তেনাহ ‘‘ৰাদযুদ্ধেনা’’তিআদি। সংৰরপ্পহানন্তি পঞ্চসু সংৰরেসু যেন কেনচি সংৰরেন সংৰরলক্খণং পহানং। পটিসেৰনপ্পহানং ৰাতি ৰা-সদ্দেন পরিৰজ্জনপ্পহানাদিং সঙ্গণ্হাতি। সেসপদেসূতি ‘‘ন ভাসতী’’তিআদীসু পদেসু। এসেৰ নযোতি ইমিনা ‘‘অভাসনমত্তমেৰ ৰদতী’’তি এৰমাদিং অতিদিসতি।
261.Paññapemīti pajānanabhāvena ñāpemi tathā vavatthapemi. Tenāha ‘‘dassemi ṭhapemī’’ti. Paripuṇṇakusalanti sabbaso puṇṇakusaladhammaṃ, uttamakusalanti uttamabhāvaṃ seṭṭhabhāvaṃ pattakusaladhammaṃ. Ayojjhanti vādayuddhena ayodhanīyaṃ, vādayuddhaṃ hotu, tena parājayo na hotīti dasseti, tenāha ‘‘vādayuddhenā’’tiādi. Saṃvarappahānanti pañcasu saṃvaresu yena kenaci saṃvarena saṃvaralakkhaṇaṃ pahānaṃ. Paṭisevanappahānaṃ vāti vā-saddena parivajjanappahānādiṃ saṅgaṇhāti. Sesapadesūti ‘‘na bhāsatī’’tiādīsu padesu. Eseva nayoti iminā ‘‘abhāsanamattameva vadatī’’ti evamādiṃ atidisati.
নাভিনন্দীতি ন সম্পটিচ্ছি। সাসনে তিণ্ণং দুচ্চরিতানং মিচ্ছাজীৰস্স ৰিৰজ্জনং ৰণ্ণীযতি, অযঞ্চ এৰং কথেতি, তস্মা সাসনস্স অনুলোমং ৰিয ৰদতি, ৰদন্তো চ সম্মাসম্বুদ্ধে ধম্মে চস্স অপ্পসাদং ন দস্সেতি, তস্মা পসন্নকারম্পি ৰদতীতি মঞ্ঞমানো তস্স ৰাদং ন পটিসেধেতি।
Nābhinandīti na sampaṭicchi. Sāsane tiṇṇaṃ duccaritānaṃ micchājīvassa vivajjanaṃ vaṇṇīyati, ayañca evaṃ katheti, tasmā sāsanassa anulomaṃ viya vadati, vadanto ca sammāsambuddhe dhamme cassa appasādaṃ na dasseti, tasmā pasannakārampi vadatīti maññamāno tassa vādaṃ na paṭisedheti.
২৬২. যথা তস্স ৰচনং, এৰং সন্তেতি যথা তস্স পরিব্বাজকস্স ৰচনং, এৰং সমণভাৰে সন্তে লব্ভমানে। মযং পন এৰং ন ৰদামাতি এতেন সমণভাৰো নাম এৰং ন হোতীতি দস্সেতি। যো হি ধম্মো যাদিসো, তথেৰ তং বুদ্ধা দীপেন্তি। ৰিসেসঞাণং ন হোতীতি কাযৰিসেসৰিসযঞাণং তস্স তদা নত্থি, যতো পরকাযে উপক্কমং করেয্যাতি দস্সেতি, তস্স পন তত্থ ৰিসেসঞাণম্পি নত্থেৰাতি। যস্মা কাযপটিবদ্ধং কাযকম্মং, তস্মা তং নিৰত্তেন্তো আহ ‘‘অঞ্ঞত্র ফন্দিতমত্তা’’তি। কিলেসসহগতচিত্তেনেৰাতি দুক্খসম্ফস্সস্স অসহননিমিত্তেন দোমনস্সসহগতচিত্তেনেৰ। দুতিযৰারেপি এসেৰ নযো। জিঘচ্ছাপিপাসদুক্খস্স অসহননিমিত্তেন দোমনস্সেনেৰ। ৰিকূজিতমত্তাতি এত্থ ৰিরূপং কূজিতং ৰিকূজিতং পুব্বেনিৰাসসন্নিস্সযং উপযং, তং পনেত্থ রোদনহসনসমুট্ঠাপকচিত্তসহগতন্তি দোসসহগতং লোভসহগতঞ্চাতি দট্ঠব্বং। চিত্তন্তি কুসলচিত্তং। অকুসলচিত্তং পন অতীতারম্মণং পৰত্ততীতি ৰত্তব্বমেৰ নত্থি। সরিত্ৰাতি যাৰ ন সতিসণ্ঠাপনা ধম্মা উপ্পজ্জন্তি, তাৰ সুপিনন্তে অনুভূতং ৰিয দুক্খং সরিত্ৰা রোদন্তি। হসন্তীতি এত্থাপি এসেৰ নযো। অযঞ্চ নযো যে লদ্ধসুখারম্মণা হুত্ৰা গহিতপটিসন্ধিকা মাতুকুচ্ছিতোপি সুখেনেৰ নিক্খমন্তি, তেসং ৰসেন ৰুত্তোতি দট্ঠব্বো। পাযন্তিযাতি অত্তনো জনপদদেসরূপেন পাযন্তিযা। অযম্পীতি আজীৰোপি মাতু অঞ্ঞৰিহিতকালে চ লোকস্সাদৰসেন কিলেসসহগতচিত্তেনেৰ হোতি।
262.Yathātassa vacanaṃ, evaṃ santeti yathā tassa paribbājakassa vacanaṃ, evaṃ samaṇabhāve sante labbhamāne. Mayaṃ pana evaṃ na vadāmāti etena samaṇabhāvo nāma evaṃ na hotīti dasseti. Yo hi dhammo yādiso, tatheva taṃ buddhā dīpenti. Visesañāṇaṃ na hotīti kāyavisesavisayañāṇaṃ tassa tadā natthi, yato parakāye upakkamaṃ kareyyāti dasseti, tassa pana tattha visesañāṇampi natthevāti. Yasmā kāyapaṭibaddhaṃ kāyakammaṃ, tasmā taṃ nivattento āha ‘‘aññatra phanditamattā’’ti. Kilesasahagatacittenevāti dukkhasamphassassa asahananimittena domanassasahagatacitteneva. Dutiyavārepi eseva nayo. Jighacchāpipāsadukkhassa asahananimittena domanasseneva. Vikūjitamattāti ettha virūpaṃ kūjitaṃ vikūjitaṃ pubbenivāsasannissayaṃ upayaṃ, taṃ panettha rodanahasanasamuṭṭhāpakacittasahagatanti dosasahagataṃ lobhasahagatañcāti daṭṭhabbaṃ. Cittanti kusalacittaṃ. Akusalacittaṃ pana atītārammaṇaṃ pavattatīti vattabbameva natthi. Saritvāti yāva na satisaṇṭhāpanā dhammā uppajjanti, tāva supinante anubhūtaṃ viya dukkhaṃ saritvā rodanti. Hasantīti etthāpi eseva nayo. Ayañca nayo ye laddhasukhārammaṇā hutvā gahitapaṭisandhikā mātukucchitopi sukheneva nikkhamanti, tesaṃ vasena vuttoti daṭṭhabbo. Pāyantiyāti attano janapadadesarūpena pāyantiyā. Ayampīti ājīvopi mātu aññavihitakāle ca lokassādavasena kilesasahagatacitteneva hoti.
২৬৩. সমধিগয্হাতি সম্মা অধিগতভাৰেন গহেত্ৰা অভিভৰিত্ৰা ৰিসেসেত্ৰা ৰিসিট্ঠো হুত্ৰা। খীণাসৰং সন্ধাযাতি ব্যতিরেকৰসেন খীণাসৰং সন্ধায। অযঞ্হেত্থ অত্থো – খীণাসৰম্পি সোতাপন্নকুসলং পঞ্ঞপেতি সেক্খভূমিযং ঠিতত্তা। সেসপদেসুপি এসেৰ নযো।
263.Samadhigayhāti sammā adhigatabhāvena gahetvā abhibhavitvā visesetvā visiṭṭho hutvā. Khīṇāsavaṃ sandhāyāti byatirekavasena khīṇāsavaṃ sandhāya. Ayañhettha attho – khīṇāsavampi sotāpannakusalaṃ paññapeti sekkhabhūmiyaṃ ṭhitattā. Sesapadesupi eseva nayo.
তীণি পদানি নিস্সাযাতি ন কাযেন পাপকং কম্মং করোতি, ন পাপকং ৰাচং ভাসতি, ন পাপকং আজীৰং আজীৰতীতি ইমানি তীণি পদানি নিস্সায কুসলসীলমূলকা চ অকুসলসীলমূলকা চাতি দ্ৰে পঠমচতুক্কা ঠপিতা। একং পদং নিস্সাযাতি ন পাপকং সঙ্কপ্পং সঙ্কপ্পেতীতি ইমং একপদং নিস্সায কুসলসঙ্কপ্পমূলকা অকুসলসঙ্কপ্পমূলকা চাতি ইমে দ্ৰে পচ্ছিমচতুক্কা ঠপিতা।
Tīṇi padāni nissāyāti na kāyena pāpakaṃ kammaṃ karoti, na pāpakaṃ vācaṃ bhāsati, na pāpakaṃ ājīvaṃ ājīvatīti imāni tīṇi padāni nissāya kusalasīlamūlakā ca akusalasīlamūlakā cāti dve paṭhamacatukkā ṭhapitā. Ekaṃ padaṃ nissāyāti na pāpakaṃ saṅkappaṃ saṅkappetīti imaṃ ekapadaṃ nissāya kusalasaṅkappamūlakā akusalasaṅkappamūlakā cāti ime dve pacchimacatukkā ṭhapitā.
২৬৪. ৰিচিকিচ্ছুদ্ধচ্চসহগতচিত্তদ্ৰযম্পি ৰট্টতি বলৰতা মোহেন সমন্নাগতত্তা। তথা হি তানি ‘‘মোমূহচিত্তানী’’তি ৰুচ্চন্তি।
264.Vicikicchuddhaccasahagatacittadvayampi vaṭṭati balavatā mohena samannāgatattā. Tathā hi tāni ‘‘momūhacittānī’’ti vuccanti.
কুহিন্তি কিংনিমিত্তং। কতরংঠানং পাপুণিত্ৰাতি কিং কারণং আগম্ম। এত্থেতেতি এত্থাতি কাযৰচীমনোসুচরিতভাৰনাসাজীৰনিপ্ফত্তিযং । সা পন হেট্ঠিমকোটিযা সোতাপত্তিফলেন দীপেতব্বাতি আহ ‘‘সোতাপত্তিফলে ভুম্ম’’ন্তি। যস্মা আজীৰট্ঠমকং অৰসিট্ঠঞ্চ সীলং পাতিমোক্খসংৰরসীলস্স চ পারিসুদ্ধিপাতিমোক্খাধিগমেন সোতাপত্তিফলপ্পত্তিযা সিদ্ধো হোতীতি আহ – ‘‘পাতিমোক্খ…পে॰… নিরুজ্ঝতী’’তি। ‘‘সুখসীলো দুক্খসীলো’’তিআদীসু ৰিয পকতিঅত্থসীলসদ্দং গহেত্ৰা ৰুত্তং ‘‘অকুসলসীল’’ন্তিআদি।
Kuhinti kiṃnimittaṃ. Kataraṃṭhānaṃ pāpuṇitvāti kiṃ kāraṇaṃ āgamma. Ettheteti etthāti kāyavacīmanosucaritabhāvanāsājīvanipphattiyaṃ . Sā pana heṭṭhimakoṭiyā sotāpattiphalena dīpetabbāti āha ‘‘sotāpattiphale bhumma’’nti. Yasmā ājīvaṭṭhamakaṃ avasiṭṭhañca sīlaṃ pātimokkhasaṃvarasīlassa ca pārisuddhipātimokkhādhigamena sotāpattiphalappattiyā siddho hotīti āha – ‘‘pātimokkha…pe… nirujjhatī’’ti. ‘‘Sukhasīlo dukkhasīlo’’tiādīsu viya pakatiatthasīlasaddaṃ gahetvā vuttaṃ ‘‘akusalasīla’’ntiādi.
২৬৫. কামাৰচরকুসলচিত্তমেৰ ৰুত্তং সম্পত্তসমাদানৰিরতিপুব্বকস্স সীলস্স অধিপ্পেতত্তা। তেনাহ – ‘‘এতেন হি কুসলসীলং সমুট্ঠাতী’’তি।
265.Kāmāvacarakusalacittameva vuttaṃ sampattasamādānaviratipubbakassa sīlassa adhippetattā. Tenāha – ‘‘etena hi kusalasīlaṃ samuṭṭhātī’’ti.
সীলৰাতি এত্থ ৰা-সদ্দো পাসংসত্থোৰ ৰেদিতব্বোতি আহ ‘‘সীলসম্পন্নো হোতী’’তি। যো সীলমত্তে পতিট্ঠিতো, ন সমাধিপঞ্ঞাসু, সো সীলমযধম্মপূরিততায সীলমযো। তেনাহ ‘‘অলমেত্তাৰতা’’তিআদি। যত্থাতি যস্সং চেতোৰিমুত্তিযং পঞ্ঞাৰিমুত্তিযঞ্চ। তদুভযঞ্চ যস্মা অরহত্তফলে সঙ্গহিতং, তস্মা ৰুত্তং ‘‘অরহত্তফলে ভুম্ম’’ন্তি। অসেসং নিরুজ্ঝতি সুখৰিপাকভাৰস্স সব্বসো পটিপ্পস্সম্ভনতো।
Sīlavāti ettha vā-saddo pāsaṃsatthova veditabboti āha ‘‘sīlasampanno hotī’’ti. Yo sīlamatte patiṭṭhito, na samādhipaññāsu, so sīlamayadhammapūritatāya sīlamayo. Tenāha ‘‘alamettāvatā’’tiādi. Yatthāti yassaṃ cetovimuttiyaṃ paññāvimuttiyañca. Tadubhayañca yasmā arahattaphale saṅgahitaṃ, tasmā vuttaṃ ‘‘arahattaphale bhumma’’nti. Asesaṃ nirujjhati sukhavipākabhāvassa sabbaso paṭippassambhanato.
২৬৬. কামপটিসংযুত্তা সঞ্ঞা কামসঞ্ঞা। সেসেসুপি এসেৰ নযো। ইতরা দ্ৰেতি ব্যাপাদৰিহিংসাসঞ্ঞা।
266. Kāmapaṭisaṃyuttā saññā kāmasaññā. Sesesupi eseva nayo. Itarā dveti byāpādavihiṃsāsaññā.
অনাগামিফলপঠমজ্ঝানন্তি অনাগামিফলসহগতং পঠমজ্ঝানং। এত্থাতি যথাৰুত্তে পঠমজ্ঝানে। এত্থ চ উজুৰিপচ্চনীকেন পটিপক্খপ্পহানং সাতিসযন্তি পঠমজ্ঝানগ্গহণং। তেনাহ ‘‘অপরিসেসা নিরুজ্ঝন্তী’’তি। নেক্খম্মসঞ্ঞানং কামাৰচরচিত্তসহগততা তস্স সীলস্স সমুট্ঠানতা চ সম্পযুত্তনযেন ৰেদিতব্বা।
Anāgāmiphalapaṭhamajjhānanti anāgāmiphalasahagataṃ paṭhamajjhānaṃ. Etthāti yathāvutte paṭhamajjhāne. Ettha ca ujuvipaccanīkena paṭipakkhappahānaṃ sātisayanti paṭhamajjhānaggahaṇaṃ. Tenāha ‘‘aparisesā nirujjhantī’’ti. Nekkhammasaññānaṃ kāmāvacaracittasahagatatā tassa sīlassa samuṭṭhānatā ca sampayuttanayena veditabbā.
২৬৭. কুসলসঙ্কপ্পনিরোধদুতিযজ্ঝানিকঅরহত্তফলঅকুসলসঙ্কপ্পনিরোধ- পঠমজ্ঝানিকঅনাগামিফলগ্গহণেন সমণো দস্সিতো। সেসং সুৰিঞ্ঞেয্যমেৰ।
267. Kusalasaṅkappanirodhadutiyajjhānikaarahattaphalaakusalasaṅkappanirodha- paṭhamajjhānikaanāgāmiphalaggahaṇena samaṇo dassito. Sesaṃ suviññeyyameva.
সমণমুণ্ডিকাপুত্তসুত্তৰণ্ণনায লীনত্থপ্পকাসনা সমত্তা।
Samaṇamuṇḍikāputtasuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৮. সমণমুণ্ডিকসুত্তং • 8. Samaṇamuṇḍikasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৮. সমণমুণ্ডিকসুত্তৰণ্ণনা • 8. Samaṇamuṇḍikasuttavaṇṇanā
