| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
२६. समानासनिकनिद्देसवण्णना
26. Samānāsanikaniddesavaṇṇanā
१९५. तिवस्सन्तरमेकमासनं भिक्खूनं अनुञ्ञातन्ति सम्बन्धो। तत्थ एकस्मिं आसने मञ्चादिके द्विन्नं आसनं निसीदनं एकमासनं। म-कारो सन्धिजो। कीदिसन्ति आह ‘‘तिवस्सन्तर’’न्ति। तिण्णं वस्सानमन्तरमेतस्साति तिवस्सन्तरो, द्वीहि वस्सेहि महन्ततरो वा दहरतरो वा भिक्खु, सो अस्स अत्थीति तिवस्सन्तरं, तिवस्सन्तरवन्तन्ति अत्थो। यो पन एकेन वस्सेन महन्ततरो वा दहरतरो वा एकवस्सोयेव वा, तब्बन्तताय वत्तब्बमेव नत्थि। अथ वा तिवस्सन्तरन्ति करणत्थे उपयोगवचनं, तिवस्सन्तरेन सद्धिन्ति अत्थो। तमेव समत्थेति ‘‘सत्तवस्से’’च्चादिना।
195. Tivassantaramekamāsanaṃ bhikkhūnaṃ anuññātanti sambandho. Tattha ekasmiṃ āsane mañcādike dvinnaṃ āsanaṃ nisīdanaṃ ekamāsanaṃ. Ma-kāro sandhijo. Kīdisanti āha ‘‘tivassantara’’nti. Tiṇṇaṃ vassānamantarametassāti tivassantaro, dvīhi vassehi mahantataro vā daharataro vā bhikkhu, so assa atthīti tivassantaraṃ, tivassantaravantanti attho. Yo pana ekena vassena mahantataro vā daharataro vā ekavassoyeva vā, tabbantatāya vattabbameva natthi. Atha vā tivassantaranti karaṇatthe upayogavacanaṃ, tivassantarena saddhinti attho. Tameva samattheti ‘‘sattavasse’’ccādinā.
१९६. मुनि अनुञ्ञासीति सम्बन्धो। सब्बेहेवाति समानासनिकअसमानासनिकेहि सब्बेहेव सद्धिं।
196. Muni anuññāsīti sambandho. Sabbehevāti samānāsanikaasamānāsanikehi sabbeheva saddhiṃ.
१९७. दीघासनं दस्सेति ‘‘अन्त’’न्तिआदिना। यं तिण्णं निसीदितुं पहोति, तं अन्तं दीघासनन्ति सम्बन्धो। अन्तन्ति पच्छिमं। अदीघासने पन समानासनिका निसीदितुं लब्भन्तीति दस्सेन्तो ‘‘मञ्चके’’तिआदिमाह। सब्बत्थ अयथाकरणतो दुक्कटन्ति।
197. Dīghāsanaṃ dasseti ‘‘anta’’ntiādinā. Yaṃ tiṇṇaṃ nisīdituṃ pahoti, taṃ antaṃ dīghāsananti sambandho. Antanti pacchimaṃ. Adīghāsane pana samānāsanikā nisīdituṃ labbhantīti dassento ‘‘mañcake’’tiādimāha. Sabbattha ayathākaraṇato dukkaṭanti.
समानासनिकनिद्देसवण्णना निट्ठिता।
Samānāsanikaniddesavaṇṇanā niṭṭhitā.
