| Library / Tipiṭaka / ติปิฎก • Tipiṭaka / ขุทฺทสิกฺขา-มูลสิกฺขา • Khuddasikkhā-mūlasikkhā |
๒๖. สมานาสนิกนิเทฺทสวณฺณนา
26. Samānāsanikaniddesavaṇṇanā
๑๙๕. ติวสฺสนฺตรเมกมาสนํ ภิกฺขูนํ อนุญฺญาตนฺติ สมฺพโนฺธฯ ตตฺถ เอกสฺมิํ อาสเน มญฺจาทิเก ทฺวินฺนํ อาสนํ นิสีทนํ เอกมาสนํฯ ม-กาโร สนฺธิโชฯ กีทิสนฺติ อาห ‘‘ติวสฺสนฺตร’’นฺติฯ ติณฺณํ วสฺสานมนฺตรเมตสฺสาติ ติวสฺสนฺตโร, ทฺวีหิ วเสฺสหิ มหนฺตตโร วา ทหรตโร วา ภิกฺขุ, โส อสฺส อตฺถีติ ติวสฺสนฺตรํ, ติวสฺสนฺตรวนฺตนฺติ อโตฺถฯ โย ปน เอเกน วเสฺสน มหนฺตตโร วา ทหรตโร วา เอกวโสฺสเยว วา, ตพฺพนฺตตาย วตฺตพฺพเมว นตฺถิฯ อถ วา ติวสฺสนฺตรนฺติ กรณเตฺถ อุปโยควจนํ, ติวสฺสนฺตเรน สทฺธินฺติ อโตฺถฯ ตเมว สมเตฺถติ ‘‘สตฺตวเสฺส’’จฺจาทินาฯ
195. Tivassantaramekamāsanaṃ bhikkhūnaṃ anuññātanti sambandho. Tattha ekasmiṃ āsane mañcādike dvinnaṃ āsanaṃ nisīdanaṃ ekamāsanaṃ. Ma-kāro sandhijo. Kīdisanti āha ‘‘tivassantara’’nti. Tiṇṇaṃ vassānamantarametassāti tivassantaro, dvīhi vassehi mahantataro vā daharataro vā bhikkhu, so assa atthīti tivassantaraṃ, tivassantaravantanti attho. Yo pana ekena vassena mahantataro vā daharataro vā ekavassoyeva vā, tabbantatāya vattabbameva natthi. Atha vā tivassantaranti karaṇatthe upayogavacanaṃ, tivassantarena saddhinti attho. Tameva samattheti ‘‘sattavasse’’ccādinā.
๑๙๖. มุนิ อนุญฺญาสีติ สมฺพโนฺธฯ สเพฺพเหวาติ สมานาสนิกอสมานาสนิเกหิ สเพฺพเหว สทฺธิํฯ
196. Muni anuññāsīti sambandho. Sabbehevāti samānāsanikaasamānāsanikehi sabbeheva saddhiṃ.
๑๙๗. ทีฆาสนํ ทเสฺสติ ‘‘อนฺต’’นฺติอาทินาฯ ยํ ติณฺณํ นิสีทิตุํ ปโหติ, ตํ อนฺตํ ทีฆาสนนฺติ สมฺพโนฺธฯ อนฺตนฺติ ปจฺฉิมํฯ อทีฆาสเน ปน สมานาสนิกา นิสีทิตุํ ลพฺภนฺตีติ ทเสฺสโนฺต ‘‘มญฺจเก’’ติอาทิมาหฯ สพฺพตฺถ อยถากรณโต ทุกฺกฎนฺติฯ
197. Dīghāsanaṃ dasseti ‘‘anta’’ntiādinā. Yaṃ tiṇṇaṃ nisīdituṃ pahoti, taṃ antaṃ dīghāsananti sambandho. Antanti pacchimaṃ. Adīghāsane pana samānāsanikā nisīdituṃ labbhantīti dassento ‘‘mañcake’’tiādimāha. Sabbattha ayathākaraṇato dukkaṭanti.
สมานาสนิกนิเทฺทสวณฺณนา นิฎฺฐิตาฯ
Samānāsanikaniddesavaṇṇanā niṭṭhitā.
