| Library / Tipiṭaka / တိပိဋက • Tipiṭaka / ခုဒ္ဒသိက္ခာ-မူလသိက္ခာ • Khuddasikkhā-mūlasikkhā |
၂၆. သမာနာသနိကနိဒ္ဒေသဝဏ္ဏနာ
26. Samānāsanikaniddesavaṇṇanā
၁၉၅. တိဏ္ဏံ ဝသ္သာနံ အန္တရံ တိဝသ္သန္တရံ။ ‘‘အနုဇာနာမိ, ဘိက္ခဝေ, တိဝသ္သန္တရေန သဟ နိသီဒိတု’’န္တိ (စူဠဝ. ၃၂၀) ဟိ ဝုတ္တံ။ ယော ဒ္ဝီဟိ ဝသ္သေဟိ (စူဠဝ. အဋ္ဌ. ၃၂၀) ဝုဍ္ဎော ဝာ နဝော ဝာ, သော တိဝသ္သန္တရော နာမ။
195. Tiṇṇaṃ vassānaṃ antaraṃ tivassantaraṃ. ‘‘Anujānāmi, bhikkhave, tivassantarena saha nisīditu’’nti (cūḷava. 320) hi vuttaṃ. Yo dvīhi vassehi (cūḷava. aṭṭha. 320) vuḍḍho vā navo vā, so tivassantaro nāma.
၁၉၆. မုနီတိ ဗုဒ္ဓမုနိ။ သဗ္ဗေဟေဝာတိ အနုပသမ္ပန္နေဟိပိ။
196.Munīti buddhamuni. Sabbehevāti anupasampannehipi.
၁၉၇. အန္တန္တိ ပစ္ဆိမံ။ ‘‘အနုဇာနာမိ, ဘိက္ခဝေ, ယံ တိဏ္ဏံ ပဟောတိ, ဧတ္တကံ ပစ္ဆိမံ ဒီဃာသန’’န္တိ (စူဠဝ. ၃၂၀) ဝုတ္တတ္တာ ယံ တိဏ္ဏံ ပဟောတိ, ဧတံ သံဟာရိမံ ဝာ ဟောတု အသံဟာရိမံ ဝာ, တထာရူပေသု ဖလကခဏ္ဍေသုပိ နိသီဒိတုံ ဝဋ္ဋတိ။ ဒ္ဝိန္နန္တိ ဒ္ဝိန္နံ သမာနာသနိကာနံ။ ‘‘အနုဇာနာမိ, ဘိက္ခဝေ, ဒုဝဂ္ဂသ္သ မဉ္စံ ဒုဝဂ္ဂသ္သ ပီဌ’’န္တိ (စုဠဝ. ၃၂၀) ဝုတ္တတ္တာ ဒ္ဝေ သမာနာသနိကာ သဟ နိသီဒိတုံ လဘန္တိ။ အညေဟိ အသမာနာသနိကေဟိ, အနုပသမ္ပန္နာဒီဟိ ဝာ ဒ္ဝေ ဟုတ္ဝာပိ နိသီဒိတုံ န လဘန္တိ။ သမာနာသနိကဝိနိစ္ဆယော။
197.Antanti pacchimaṃ. ‘‘Anujānāmi, bhikkhave, yaṃ tiṇṇaṃ pahoti, ettakaṃ pacchimaṃ dīghāsana’’nti (cūḷava. 320) vuttattā yaṃ tiṇṇaṃ pahoti, etaṃ saṃhārimaṃ vā hotu asaṃhārimaṃ vā, tathārūpesu phalakakhaṇḍesupi nisīdituṃ vaṭṭati. Dvinnanti dvinnaṃ samānāsanikānaṃ. ‘‘Anujānāmi, bhikkhave, duvaggassa mañcaṃ duvaggassa pīṭha’’nti (cuḷava. 320) vuttattā dve samānāsanikā saha nisīdituṃ labhanti. Aññehi asamānāsanikehi, anupasampannādīhi vā dve hutvāpi nisīdituṃ na labhanti. Samānāsanikavinicchayo.
သမာနာသနိကနိဒ္ဒေသဝဏ္ဏနာ နိဋ္ဌိတာ။
Samānāsanikaniddesavaṇṇanā niṭṭhitā.
