| Library / Tipiṭaka / တိပိဋက • Tipiṭaka / ခုဒ္ဒသိက္ခာ-မူလသိက္ခာ • Khuddasikkhā-mūlasikkhā |
၂၆. သမာနာသနိကနိဒ္ဒေသဝဏ္ဏနာ
26. Samānāsanikaniddesavaṇṇanā
၁၉၅. တိဝသ္သန္တရမေကမာသနံ ဘိက္ခူနံ အနုညာတန္တိ သမ္ဗန္ဓော။ တတ္ထ ဧကသ္မိံ အာသနေ မဉ္စာဒိကေ ဒ္ဝိန္နံ အာသနံ နိသီဒနံ ဧကမာသနံ။ မ-ကာရော သန္ဓိဇော။ ကီဒိသန္တိ အာဟ ‘‘တိဝသ္သန္တရ’’န္တိ။ တိဏ္ဏံ ဝသ္သာနမန္တရမေတသ္သာတိ တိဝသ္သန္တရော, ဒ္ဝီဟိ ဝသ္သေဟိ မဟန္တတရော ဝာ ဒဟရတရော ဝာ ဘိက္ခု, သော အသ္သ အတ္ထီတိ တိဝသ္သန္တရံ, တိဝသ္သန္တရဝန္တန္တိ အတ္ထော။ ယော ပန ဧကေန ဝသ္သေန မဟန္တတရော ဝာ ဒဟရတရော ဝာ ဧကဝသ္သောယေဝ ဝာ, တဗ္ဗန္တတာယ ဝတ္တဗ္ဗမေဝ နတ္ထိ။ အထ ဝာ တိဝသ္သန္တရန္တိ ကရဏတ္ထေ ဥပယောဂဝစနံ, တိဝသ္သန္တရေန သဒ္ဓိန္တိ အတ္ထော။ တမေဝ သမတ္ထေတိ ‘‘သတ္တဝသ္သေ’’စ္စာဒိနာ။
195. Tivassantaramekamāsanaṃ bhikkhūnaṃ anuññātanti sambandho. Tattha ekasmiṃ āsane mañcādike dvinnaṃ āsanaṃ nisīdanaṃ ekamāsanaṃ. Ma-kāro sandhijo. Kīdisanti āha ‘‘tivassantara’’nti. Tiṇṇaṃ vassānamantarametassāti tivassantaro, dvīhi vassehi mahantataro vā daharataro vā bhikkhu, so assa atthīti tivassantaraṃ, tivassantaravantanti attho. Yo pana ekena vassena mahantataro vā daharataro vā ekavassoyeva vā, tabbantatāya vattabbameva natthi. Atha vā tivassantaranti karaṇatthe upayogavacanaṃ, tivassantarena saddhinti attho. Tameva samattheti ‘‘sattavasse’’ccādinā.
၁၉၆. မုနိ အနုညာသီတိ သမ္ဗန္ဓော။ သဗ္ဗေဟေဝာတိ သမာနာသနိကအသမာနာသနိကေဟိ သဗ္ဗေဟေဝ သဒ္ဓိံ။
196. Muni anuññāsīti sambandho. Sabbehevāti samānāsanikaasamānāsanikehi sabbeheva saddhiṃ.
၁၉၇. ဒီဃာသနံ ဒသ္သေတိ ‘‘အန္တ’’န္တိအာဒိနာ။ ယံ တိဏ္ဏံ နိသီဒိတုံ ပဟောတိ, တံ အန္တံ ဒီဃာသနန္တိ သမ္ဗန္ဓော။ အန္တန္တိ ပစ္ဆိမံ။ အဒီဃာသနေ ပန သမာနာသနိကာ နိသီဒိတုံ လဗ္ဘန္တီတိ ဒသ္သေန္တော ‘‘မဉ္စကေ’’တိအာဒိမာဟ။ သဗ္ဗတ္ထ အယထာကရဏတော ဒုက္ကဋန္တိ။
197. Dīghāsanaṃ dasseti ‘‘anta’’ntiādinā. Yaṃ tiṇṇaṃ nisīdituṃ pahoti, taṃ antaṃ dīghāsananti sambandho. Antanti pacchimaṃ. Adīghāsane pana samānāsanikā nisīdituṃ labbhantīti dassento ‘‘mañcake’’tiādimāha. Sabbattha ayathākaraṇato dukkaṭanti.
သမာနာသနိကနိဒ္ဒေသဝဏ္ဏနာ နိဋ္ဌိတာ။
Samānāsanikaniddesavaṇṇanā niṭṭhitā.
