๑-๑๒. สมณสญฺญาสุตฺตาทิวณฺณนา

1-12. Samaṇasaññāsuttādivaṇṇanā

๑๐๑-๑๑๒. ตติยสฺส ปฐมาทีนิ อุตฺตานานิฯ ฉเฎฺฐ นิชฺชรการณานีติ ปชหนการณานิฯ อิมสฺมิํ มโคฺค กถียตีติ กตฺวา ‘‘อยํ เหฎฺฐา…เป.… ปุน คหิตา’’ติ วุตฺตํฯ กิญฺจาปิ นิชฺชิณฺณา มิจฺฉาทิฎฺฐีติ อาเนตฺวา สมฺพนฺธิตพฺพํฯ ยถา มิจฺฉาทิฎฺฐิ วิปสฺสนาย นิชฺชิณฺณาปิ น สมุจฺฉินฺนาติ สมุเจฺฉทปฺปหานทสฺสนตฺถํ ปุน คหิตา, เอวํ มิจฺฉาสงฺกปฺปาทโยปิ วิปสฺสนาย ปหีนาปิ อสมุจฺฉินฺนตาย อิธ ปุน คหิตาติ อยมโตฺถ ‘‘มิจฺฉาสงฺกปฺปสฺสา’’ติอาทีสุ สพฺพปเทสุ วตฺตโพฺพติ ทเสฺสติ ‘‘เอวํ สพฺพปเทสุ โยเชตโพฺพ’’ติ อิมินาฯ เอตฺถ จาติ ‘‘สมฺมาวิมุตฺติปจฺจยา จ อเนเก กุสลา ธมฺมา ภาวนาปาริปูริํ คจฺฉนฺตี’’ติ เอตสฺมิํ ปาฬิปเทฯ เอตฺถ จ สมุเจฺฉทวเสน จ ปฎิปฺปสฺสทฺธิวเสน จ ปฎิปกฺขธมฺมานํ สมฺมเทว วิมุจฺจนํ สมฺมาวิมุตฺติฯ ตปฺปจฺจยา จ มคฺคผเลสุ อฎฺฐ อินฺทฺริยานิ ภาวนาปาริปูริํ อุปคจฺฉนฺตีติ มคฺคสมฺปยุตฺตานิปิ สทฺธาทีนิ อินฺทฺริยานิ อุทฺธฎานิฯ มคฺควเสน หิ ผเลสุ ภาวนาปาริปูรี นามาติฯ อภินนฺทนเฎฺฐนาติ อติวิย สิเนหนเฎฺฐนฯ อิทญฺหิ โสมนสฺสินฺทฺริยํ อุกฺกํสคตสาตสภาวโต สมฺปยุตฺตธเมฺม สิเนหนฺตํ เตเมนฺตํ วิย ปวตฺตติฯ ปวตฺตสนฺตติอาธิปเตยฺยเฎฺฐนาติ วิปากสนฺตานสฺส ชีวเน อธิปติภาเวนฯ เอวนฺติอาทิ วุตฺตเสฺสว อตฺถสฺส นิคมนํฯ สตฺตมาทีนิ อุตฺตานตฺถานิฯ

101-112. Tatiyassa paṭhamādīni uttānāni. Chaṭṭhe nijjarakāraṇānīti pajahanakāraṇāni. Imasmiṃ maggo kathīyatīti katvā ‘‘ayaṃ heṭṭhā…pe… puna gahitā’’ti vuttaṃ. Kiñcāpi nijjiṇṇā micchādiṭṭhīti ānetvā sambandhitabbaṃ. Yathā micchādiṭṭhi vipassanāya nijjiṇṇāpi na samucchinnāti samucchedappahānadassanatthaṃ puna gahitā, evaṃ micchāsaṅkappādayopi vipassanāya pahīnāpi asamucchinnatāya idha puna gahitāti ayamattho ‘‘micchāsaṅkappassā’’tiādīsu sabbapadesu vattabboti dasseti ‘‘evaṃ sabbapadesu yojetabbo’’ti iminā. Ettha cāti ‘‘sammāvimuttipaccayā ca aneke kusalā dhammā bhāvanāpāripūriṃ gacchantī’’ti etasmiṃ pāḷipade. Ettha ca samucchedavasena ca paṭippassaddhivasena ca paṭipakkhadhammānaṃ sammadeva vimuccanaṃ sammāvimutti. Tappaccayā ca maggaphalesu aṭṭha indriyāni bhāvanāpāripūriṃ upagacchantīti maggasampayuttānipi saddhādīni indriyāni uddhaṭāni. Maggavasena hi phalesu bhāvanāpāripūrī nāmāti. Abhinandanaṭṭhenāti ativiya sinehanaṭṭhena. Idañhi somanassindriyaṃ ukkaṃsagatasātasabhāvato sampayuttadhamme sinehantaṃ tementaṃ viya pavattati. Pavattasantatiādhipateyyaṭṭhenāti vipākasantānassa jīvane adhipatibhāvena. Evantiādi vuttasseva atthassa nigamanaṃ. Sattamādīni uttānatthāni.

สมณสญฺญาสุตฺตาทิวณฺณนา นิฎฺฐิตาฯ

Samaṇasaññāsuttādivaṇṇanā niṭṭhitā.

สมณสญฺญาวคฺควณฺณนา นิฎฺฐิตาฯ

Samaṇasaññāvaggavaṇṇanā niṭṭhitā.

Next: (๑๒) ๒. ปโจฺจโรหณิวโคฺค • (12) 2. Paccorohaṇivaggo

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact