| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10-11. ஸமணஸுத்தாதி³வண்ணனா
10-11. Samaṇasuttādivaṇṇanā
241-2. த³ஸமே ஸேஸபதே³ஸுபீதி ‘‘இத⁴ து³தியோ ஸமணோ’’திஆதீ³ஸு ஸேஸபதே³ஸுபி. யதா² ஹி ‘‘விவிச்சேவ காமேஹீ’’தி (தீ³॰ நி॰ 1.226; ம॰ நி॰ 1.271, 287, 297; ஸங்॰ நி॰ 2.152; அ॰ நி॰ 4.123) எத்த² கதோ நியமோ ‘‘விவிச்ச அகுஸலேஹீ’’தி எத்தா²பி கதோயேவ ஹோதி ஸாவதா⁴ரணஅத்த²ஸ்ஸ இச்சி²தப்³ப³த்தா, ஏவமிதா⁴பீதி. தேனாஹ ‘‘து³தியாத³யோபி ஹீ’’திஆதி³. ஸாமஞ்ஞப²லாதி⁴க³மவஸேன நிப்பரியாயதோ ஸமணபா⁴வோதி தேஸங் வஸேனெத்த² சத்தாரோ ஸமணா தே³ஸிதா. இமஸ்மிஞ்ஹி டா²னே சத்தாரோ ப²லட்ட²கஸமணாவ அதி⁴ப்பேதா ஸமிதபாபஸமணக்³க³ஹணதோ. கஸ்மா பனெத்த² மஹாபரினிப்³பா³னே விய மக்³க³ட்டா² தத³த்தா²ய படிபன்னாபி ந க³ஹிதாதி? வேனெய்யஜ்ஜா²ஸயதோ. தத்த² ஹி மக்³கா³தி⁴க³மத்தா²ய விபஸ்ஸனாபி இதோ ப³ஹித்³தா⁴ நத்தி², குதோ மக்³க³ப²லானீதி த³ஸ்ஸெந்தேன ப⁴க³வதா ‘‘ஞாயஸ்ஸ த⁴ம்மஸ்ஸ பதே³ஸவத்தீ, இதோ ப³ஹித்³தா⁴ ஸமணோபி நத்தீ²’’தி (தீ³॰ நி॰ 2.214) வுத்தங். இத⁴ பன நிட்டா²னப்பத்தமேவ தங்தங்ஸமணபா⁴வங் க³ண்ஹந்தேன ப²லட்ட²கஸமணாவ க³ஹிதா, மக்³க³ட்ட²தோ ப²லட்டோ² ஸவிஸேஸங் த³க்கி²ணெய்யோதி. ஸ்வாயமத்தோ² த்³வீஸு ஸுத்தேஸு தே³ஸனாபே⁴தே³னேவ விஞ்ஞாயதீதி. ரித்தாதி விவித்தா. துச்சா²தி நிஸ்ஸாரா படிபன்னகஸாராபா⁴வதோ.
241-2. Dasame sesapadesupīti ‘‘idha dutiyo samaṇo’’tiādīsu sesapadesupi. Yathā hi ‘‘vivicceva kāmehī’’ti (dī. ni. 1.226; ma. ni. 1.271, 287, 297; saṃ. ni. 2.152; a. ni. 4.123) ettha kato niyamo ‘‘vivicca akusalehī’’ti etthāpi katoyeva hoti sāvadhāraṇaatthassa icchitabbattā, evamidhāpīti. Tenāha ‘‘dutiyādayopi hī’’tiādi. Sāmaññaphalādhigamavasena nippariyāyato samaṇabhāvoti tesaṃ vasenettha cattāro samaṇā desitā. Imasmiñhi ṭhāne cattāro phalaṭṭhakasamaṇāva adhippetā samitapāpasamaṇaggahaṇato. Kasmā panettha mahāparinibbāne viya maggaṭṭhā tadatthāya paṭipannāpi na gahitāti? Veneyyajjhāsayato. Tattha hi maggādhigamatthāya vipassanāpi ito bahiddhā natthi, kuto maggaphalānīti dassentena bhagavatā ‘‘ñāyassa dhammassa padesavattī, ito bahiddhā samaṇopi natthī’’ti (dī. ni. 2.214) vuttaṃ. Idha pana niṭṭhānappattameva taṃtaṃsamaṇabhāvaṃ gaṇhantena phalaṭṭhakasamaṇāva gahitā, maggaṭṭhato phalaṭṭho savisesaṃ dakkhiṇeyyoti. Svāyamattho dvīsu suttesu desanābhedeneva viññāyatīti. Rittāti vivittā. Tucchāti nissārā paṭipannakasārābhāvato.
பவத³ந்தி ஏதேஹீதி பவாதா³. தி³ட்டி²க³திகானங் நானாதி³ட்டி²தீ³பகஸமயாதி ஆஹ ‘‘சத்தாரோ ஸஸ்ஸதவாதா³’’திஆதி³. தத்த² சத்தாரோ ஸஸ்ஸதவாதா³தி லாபி⁴வஸேன தயோ, தக்கிவஸேன ஏகோதி ஏவங் சத்தாரோ ஸஸ்ஸதவாதா³. புப்³பே³னிவாஸஞாணலாபீ⁴ தித்தி²யோ மந்த³பஞ்ஞோ அனேகஜாதிஸதஸஹஸ்ஸமத்தங் அனுஸ்ஸரதி, மஜ்ஜ²பஞ்ஞோ த³ஸ ஸங்வட்டவிவட்டகப்பானி, திக்க²பஞ்ஞோ சத்தாலீஸ ஸங்வட்டவிவட்டகப்பானி, ந ததோ பரங். ஸோ ஏவங் அனுஸ்ஸரந்தோ ‘‘ஸஸ்ஸதோ அத்தா ச லோகோ சா’’தி அபி⁴வத³தி, தக்கீ பன தக்கபரியாஹதங் வீமங்ஸானுசரிதங் ஸயங்படிபா⁴னங் ‘‘ஸஸ்ஸதோ அத்தா ச லோகோ சா’’தி அபி⁴வத³தி. தேன வுத்தங் ‘‘லாபி⁴வஸேன தயோ, தக்கிவஸேன ஏகோதி ஏவங் சத்தாரோ ஸஸ்ஸதவாதா³’’தி.
Pavadanti etehīti pavādā. Diṭṭhigatikānaṃ nānādiṭṭhidīpakasamayāti āha ‘‘cattāro sassatavādā’’tiādi. Tattha cattāro sassatavādāti lābhivasena tayo, takkivasena ekoti evaṃ cattāro sassatavādā. Pubbenivāsañāṇalābhī titthiyo mandapañño anekajātisatasahassamattaṃ anussarati, majjhapañño dasa saṃvaṭṭavivaṭṭakappāni, tikkhapañño cattālīsa saṃvaṭṭavivaṭṭakappāni, na tato paraṃ. So evaṃ anussaranto ‘‘sassato attā ca loko cā’’ti abhivadati, takkī pana takkapariyāhataṃ vīmaṃsānucaritaṃ sayaṃpaṭibhānaṃ ‘‘sassato attā ca loko cā’’ti abhivadati. Tena vuttaṃ ‘‘lābhivasena tayo, takkivasena ekoti evaṃ cattāro sassatavādā’’ti.
ஸத்தேஸு ஸங்கா²ரேஸு ச ஏகச்சங் ஸஸ்ஸதந்தி பவத்தோ வாதோ³ ஏகச்சஸஸ்ஸதவாதோ³. ஸோ பன ப்³ரஹ்மகாயிககி²ட்³டா³பதோ³ஸிகமனோபதோ³ஸிகத்தபா⁴வதோ சவித்வா இதா⁴க³தானங் தக்கினோ ச உப்பஜ்ஜனவஸேன சதுப்³பி³தோ⁴தி ஆஹ ‘‘சத்தாரோ ஏகச்சஸஸ்ஸதவாதா³’’தி.
Sattesu saṅkhāresu ca ekaccaṃ sassatanti pavatto vādo ekaccasassatavādo. So pana brahmakāyikakhiḍḍāpadosikamanopadosikattabhāvato cavitvā idhāgatānaṃ takkino ca uppajjanavasena catubbidhoti āha ‘‘cattāro ekaccasassatavādā’’ti.
சத்தாரோ அந்தானந்திகாதி எத்த² அமதி க³ச்ச²தி எத்த² வோஸானந்தி அந்தோ, மரியாதா³. தப்படிஸேதே⁴ன அனந்தோ. அந்தோ ச அனந்தோ ச அந்தானந்தோ ஸாமஞ்ஞனித்³தே³ஸேன, ஏகஸேஸேன வா ‘‘நாமரூபபச்சயா ஸளாயதன’’ந்திஆதீ³ஸு (ம॰ நி॰ 3.126; உதா³॰ 1) விய. அந்தானந்தஸஹசரிதோ வாதோ³ அந்தானந்தோ யதா² ‘‘குந்தா சரந்தீ’’தி. அந்தானந்தஸன்னிஸ்ஸயோ வா யதா² ‘‘மஞ்சா கோ⁴ஸந்தீ’’தி. ஸோ ஏதேஸங் அத்தீ²தி அந்தானந்திகா. ‘‘அந்தவா அத்தா ச லோகோ ச, அனந்தவா அத்தா ச லோகோ ச, அந்தவா ச அனந்தவா ச அத்தா ச லோகோ ச, நேவந்தவா நானந்தவா’’தி ஏவங் பவத்தவாதா³ சத்தாரோ. அவட்³டி⁴தகஸிணஸ்ஸ தங் கஸிணங் அத்தாதி ச லோகோதி ச க³ண்ஹந்தஸ்ஸ வஸேன பட²மோ வுத்தோ, து³தியோ வட்³டி⁴தகஸிணஸ்ஸ வஸேன வுத்தோ, ததியோ திரியங் வட்³டெ⁴த்வா உத்³த⁴மதோ⁴ அவட்³டி⁴தகஸிணஸ்ஸ, சதுத்தோ² தக்கிவஸேன வுத்தோ. எத்த² ச யுத்தங் தாவ புரிமானங் திண்ணங் வாதா³னங் அந்தஞ்ச அனந்தஞ்ச அந்தானந்தஞ்ச ஆரப்³ப⁴ பவத்தவாத³த்தா அந்தானந்திகத்தங், பச்சி²மஸ்ஸ பன தது³ப⁴யனிஸேத⁴னவஸேன பவத்தவாத³த்தா கத²மந்தானந்திகத்தந்தி? தது³ப⁴யப்படிஸேத⁴னவஸேன பவத்தவாத³த்தா ஏவ. அந்தானந்திகப்படிஸேத⁴வாதோ³பி ஹி அந்தானந்தவிஸயோ ஏவ தங் ஆரப்³ப⁴ பவத்தத்தா.
Cattāro antānantikāti ettha amati gacchati ettha vosānanti anto, mariyādā. Tappaṭisedhena ananto. Anto ca ananto ca antānanto sāmaññaniddesena, ekasesena vā ‘‘nāmarūpapaccayā saḷāyatana’’ntiādīsu (ma. ni. 3.126; udā. 1) viya. Antānantasahacarito vādo antānanto yathā ‘‘kuntā carantī’’ti. Antānantasannissayo vā yathā ‘‘mañcā ghosantī’’ti. So etesaṃ atthīti antānantikā. ‘‘Antavā attā ca loko ca, anantavā attā ca loko ca, antavā ca anantavā ca attā ca loko ca, nevantavā nānantavā’’ti evaṃ pavattavādā cattāro. Avaḍḍhitakasiṇassa taṃ kasiṇaṃ attāti ca lokoti ca gaṇhantassa vasena paṭhamo vutto, dutiyo vaḍḍhitakasiṇassa vasena vutto, tatiyo tiriyaṃ vaḍḍhetvā uddhamadho avaḍḍhitakasiṇassa, catuttho takkivasena vutto. Ettha ca yuttaṃ tāva purimānaṃ tiṇṇaṃ vādānaṃ antañca anantañca antānantañca ārabbha pavattavādattā antānantikattaṃ, pacchimassa pana tadubhayanisedhanavasena pavattavādattā kathamantānantikattanti? Tadubhayappaṭisedhanavasena pavattavādattā eva. Antānantikappaṭisedhavādopi hi antānantavisayo eva taṃ ārabbha pavattattā.
ந மரதீதி அமரா. கா ஸா? ‘‘ஏவந்திபி மே நோ’’திஆதி³னா (தீ³॰ நி॰ 1.62) நயேன பரியந்தரஹிதா தி³ட்டி²க³திகஸ்ஸ தி³ட்டி² சேவ வாசா ச. விவிதோ⁴ கே²போதி விக்கே²போ, அமராய தி³ட்டி²யா, வாசாய வா விக்கே²போதி அமராவிக்கே²போ, ஸோ ஏதஸ்ஸ அத்தீ²தி அமராவிக்கே²பிகோ. அத² வா அமரா நாம மச்ச²ஜாதி, ஸா உம்முஜ்ஜனாதி³வஸேன உத³கே ஸந்தா⁴வமானா கா³ஹங் ந க³ச்ச²தி, ஏவமேவங் அயம்பி வாதோ³ இதோ சிதோ ச ஸந்தா⁴வதி, கா³ஹங் ந உபக³ச்ச²தீதி அமராவிக்கே²போதி வுச்சதி, ஸோ ஏதேஸங் அத்தீ²தி அமராவிக்கே²பிகா. ஸ்வாயங் வாதோ³ முஸாவாதா³னுயோக³ச²ந்த³ராக³ப⁴யமோஹபா⁴வஹேதுகதாய சதுதா⁴ பவத்தோதி ஆஹ ‘‘சத்தாரோ அமராவிக்கே²பிகா’’தி.
Na maratīti amarā. Kā sā? ‘‘Evantipi me no’’tiādinā (dī. ni. 1.62) nayena pariyantarahitā diṭṭhigatikassa diṭṭhi ceva vācā ca. Vividho khepoti vikkhepo, amarāya diṭṭhiyā, vācāya vā vikkhepoti amarāvikkhepo, so etassa atthīti amarāvikkhepiko. Atha vā amarā nāma macchajāti, sā ummujjanādivasena udake sandhāvamānā gāhaṃ na gacchati, evamevaṃ ayampi vādo ito cito ca sandhāvati, gāhaṃ na upagacchatīti amarāvikkhepoti vuccati, so etesaṃ atthīti amarāvikkhepikā. Svāyaṃ vādo musāvādānuyogachandarāgabhayamohabhāvahetukatāya catudhā pavattoti āha ‘‘cattāro amarāvikkhepikā’’ti.
அதி⁴ச்ச யதி²ச்ச²கங் யங் கிஞ்சி காரணங் கஸ்ஸசி பு³த்³தி⁴புப்³ப³ங் வா வினா ஸமுப்பன்னோதி அத்தலோகஸஞ்ஞிதானங் க²ந்தா⁴னங் அதி⁴ச்ச பவத்திஆகாராரம்மணங் த³ஸ்ஸனங் ததா³காரஸன்னிஸ்ஸயேன பவத்திதோ ததா³காரஸஹசரிததாய ச ‘‘அதி⁴ச்சஸமுப்பன்ன’’ந்தி வுச்சதி யதா² ‘‘மஞ்சா கோ⁴ஸந்தி’’, ‘‘குந்தா சரந்தீ’’தி ச. தங் ஏதேஸங் அத்தீ²தி அதி⁴ச்சஸமுப்பன்னிகா. லாபி⁴வஸேன தக்கிவஸேன ச ‘‘த்³வே அதி⁴ச்சஸமுப்பன்னிகா’’தி வுத்தங்.
Adhicca yathicchakaṃ yaṃ kiñci kāraṇaṃ kassaci buddhipubbaṃ vā vinā samuppannoti attalokasaññitānaṃ khandhānaṃ adhicca pavattiākārārammaṇaṃ dassanaṃ tadākārasannissayena pavattito tadākārasahacaritatāya ca ‘‘adhiccasamuppanna’’nti vuccati yathā ‘‘mañcā ghosanti’’, ‘‘kuntā carantī’’ti ca. Taṃ etesaṃ atthīti adhiccasamuppannikā. Lābhivasena takkivasena ca ‘‘dve adhiccasamuppannikā’’ti vuttaṃ.
ஸஞ்ஞீதி பவத்தோ வாதோ³ ஸஞ்ஞிவாதோ³, ஸோ ஏதேஸங் அத்தீ²தி ஸஞ்ஞிவாதா³. ரூபிசதுக்கங் ஏகந்தஸுக²சதுக்கந்தி இமேஸங் சதுன்னங் சதுக்கானங் வஸேன ஸோளஸ ஸஞ்ஞிவாதா³. இமேஸுயேவ புரிமானங் த்³வின்னங் சதுக்கானங் வஸேன அட்ட² ஸஞ்ஞிவாதா³, அட்ட² நேவஸஞ்ஞினாஸஞ்ஞிவாதா³ வேதி³தப்³பா³. கேவலஞ்ஹி தத்த² ‘‘ஸஞ்ஞீ அத்தா’’தி க³ண்ஹந்தானங் தா தி³ட்டி²யோ, இத⁴ அஸஞ்ஞீதி ச நேவஸஞ்ஞீனாஸஞ்ஞீதி ச.
Saññīti pavatto vādo saññivādo, so etesaṃ atthīti saññivādā. Rūpicatukkaṃ ekantasukhacatukkanti imesaṃ catunnaṃ catukkānaṃ vasena soḷasa saññivādā. Imesuyeva purimānaṃ dvinnaṃ catukkānaṃ vasena aṭṭha saññivādā, aṭṭha nevasaññināsaññivādā veditabbā. Kevalañhi tattha ‘‘saññī attā’’ti gaṇhantānaṃ tā diṭṭhiyo, idha asaññīti ca nevasaññīnāsaññīti ca.
ஸத்த உச்சே²த³வாதா³தி மனுஸ்ஸத்தபா⁴வே காமாவசரதே³வத்தபா⁴வே ரூபாவசரத்தபா⁴வே சதுப்³பி³தா⁴ரூபத்தபா⁴வே ச ட²த்வா ஸத்தஸ்ஸ உச்சே²த³பஞ்ஞாபனவஸேன ஸத்த உச்சே²த³வாதா³.
Satta ucchedavādāti manussattabhāve kāmāvacaradevattabhāve rūpāvacarattabhāve catubbidhārūpattabhāve ca ṭhatvā sattassa ucchedapaññāpanavasena satta ucchedavādā.
பஞ்ச தி³ட்ட²த⁴ம்மனிப்³பா³னவாதா³தி பஞ்சகாமகு³ணஉபபோ⁴க³வஸேன சதுப்³பி³த⁴ரூபஜ்ஜா²னஸுக²பரிபோ⁴க³வஸேன ச தி³ட்ட²த⁴ம்மே நிப்³பூ³திபஞ்ஞாபனவாதா³. தி³ட்ட²த⁴ம்மோதி பச்சக்க²த⁴ம்மோ வுச்சதி, தத்த² தத்த² படிலத்³த⁴த்தபா⁴வஸ்ஸேதங் அதி⁴வசனங். தி³ட்ட²த⁴ம்மே நிப்³பா³னங் தி³ட்ட²த⁴ம்மனிப்³பா³னங், இமஸ்மிங்யேவ அத்தபா⁴வே து³க்க²வூபஸமந்தி அத்தோ². தங் வத³ந்தீதி தி³ட்ட²த⁴ம்மனிப்³பா³னவாதா³.
Pañca diṭṭhadhammanibbānavādāti pañcakāmaguṇaupabhogavasena catubbidharūpajjhānasukhaparibhogavasena ca diṭṭhadhamme nibbūtipaññāpanavādā. Diṭṭhadhammoti paccakkhadhammo vuccati, tattha tattha paṭiladdhattabhāvassetaṃ adhivacanaṃ. Diṭṭhadhamme nibbānaṃ diṭṭhadhammanibbānaṃ, imasmiṃyeva attabhāve dukkhavūpasamanti attho. Taṃ vadantīti diṭṭhadhammanibbānavādā.
ஞாயதி கமதி படிவிஜ்ஜ²தீதி ஞாயோ, ஸோ ஏவ நிப்³பா³னஸம்பாபகஹேதுதாய த⁴ம்மோதி ஆஹ ‘‘ஞாயஸ்ஸ த⁴ம்மஸ்ஸா’’தி. இதோ ப³ஹித்³தா⁴ ஸமணோபி நத்தீ²திஆதீ³ஸு கஸ்மா பனேதே அஞ்ஞத்த² நத்தீ²தி? அக்கெ²த்ததாய. யதா² ஹி ந ஆரக்³கே³ ஸாஸபோ திட்ட²தி, ந உத³கபிட்டே² அக்³கி³ ஜலதி, ந பிட்டி²பாஸாணே பீ³ஜானி விருஹந்தி, ஏவமேவங் பா³ஹிரேஸு தித்தா²யதனேஸு ந இமே ஸமணா உப்பஜ்ஜந்தி, இமஸ்மிங்யேவ ஸாஸனே உப்பஜ்ஜந்தி. கஸ்மா? ஸுக்கெ²த்ததாய. ஸா பன நேஸங் அக்கெ²த்ததா ஸுக்கெ²த்ததா ச அரியமக்³க³ஸ்ஸ அபா⁴வதோ பா⁴வதோ ச வேதி³தப்³பா³. தேனாஹ ப⁴க³வா –
Ñāyati kamati paṭivijjhatīti ñāyo, so eva nibbānasampāpakahetutāya dhammoti āha ‘‘ñāyassa dhammassā’’ti. Ito bahiddhā samaṇopi natthītiādīsu kasmā panete aññattha natthīti? Akkhettatāya. Yathā hi na āragge sāsapo tiṭṭhati, na udakapiṭṭhe aggi jalati, na piṭṭhipāsāṇe bījāni viruhanti, evamevaṃ bāhiresu titthāyatanesu na ime samaṇā uppajjanti, imasmiṃyeva sāsane uppajjanti. Kasmā? Sukkhettatāya. Sā pana nesaṃ akkhettatā sukkhettatā ca ariyamaggassa abhāvato bhāvato ca veditabbā. Tenāha bhagavā –
‘‘யஸ்மிங் கோ², ஸுப⁴த்³த³, த⁴ம்மவினயே அரியோ அட்ட²ங்கி³கோ மக்³கோ³ ந உபலப்³ப⁴தி, ஸமணோபி தத்த² ந உபலப்³ப⁴தி, து³தியோபி தத்த² ஸமணோ ந உபலப்³ப⁴தி, ததியோபி தத்த² ஸமணோ ந உபலப்³ப⁴தி, சதுத்தோ²பி தத்த² ஸமணோ ந உபலப்³ப⁴தி. யஸ்மிஞ்ச கோ², ஸுப⁴த்³த³, த⁴ம்மவினயே அரியோ அட்ட²ங்கி³கோ மக்³கோ³ உபலப்³ப⁴தி, ஸமணோபி தத்த² உபலப்³ப⁴தி, து³தியோபி தத்த²… ததியோபி தத்த²… சதுத்தோ²பி தத்த² ஸமணோ உபலப்³ப⁴தி. இமஸ்மிங் கோ², ஸுப⁴த்³த³, த⁴ம்மவினயே அரியோ அட்ட²ங்கி³கோ மக்³கோ³ உபலப்³ப⁴தி. இதே⁴வ, ஸுப⁴த்³த³, ஸமணோ, இத⁴ து³தியோ ஸமணோ, இத⁴ ததியோ ஸமணோ, இத⁴ சதுத்தோ² ஸமணோ, ஸுஞ்ஞா பரப்பவாதா³ ஸமணேபி⁴ அஞ்ஞேஹீ’’தி (தீ³॰ நி॰ 2.214).
‘‘Yasmiṃ kho, subhadda, dhammavinaye ariyo aṭṭhaṅgiko maggo na upalabbhati, samaṇopi tattha na upalabbhati, dutiyopi tattha samaṇo na upalabbhati, tatiyopi tattha samaṇo na upalabbhati, catutthopi tattha samaṇo na upalabbhati. Yasmiñca kho, subhadda, dhammavinaye ariyo aṭṭhaṅgiko maggo upalabbhati, samaṇopi tattha upalabbhati, dutiyopi tattha… tatiyopi tattha… catutthopi tattha samaṇo upalabbhati. Imasmiṃ kho, subhadda, dhammavinaye ariyo aṭṭhaṅgiko maggo upalabbhati. Idheva, subhadda, samaṇo, idha dutiyo samaṇo, idha tatiyo samaṇo, idha catuttho samaṇo, suññā parappavādā samaṇebhi aññehī’’ti (dī. ni. 2.214).
அரியமக்³க³ஸ்ஸ ச அபா⁴வோ பா⁴வோ ச ஸுபரிஸுத்³த⁴ஸ்ஸ ஸீலஸ்ஸ ஸுபரிஸுத்³தா⁴ய ஸமத²விபஸ்ஸனாபா⁴வனாய அபா⁴வதோ பா⁴வதோ ச வேதி³தப்³போ³. தது³ப⁴யஞ்ச து³ரக்கா²தஸ்வாக்கா²தபா⁴வஹேதுகங் . ஸோ ச அஸம்மாஸம்பு³த்³த⁴ப்பவேதி³தத்தா. யஸ்மா தித்தா²யதனங் அக்கெ²த்தங், ஸாஸனங் கெ²த்தங், தஸ்மா யதா² ஸுரத்தஹத்த²பாதோ³ பா⁴ஸுரகேஸரபா⁴ரோ ஸீஹோ மிக³ராஜா ந ஸுஸானே வா ஸங்காரகூடே வா படிவஸதி, தியோஜனஸஹஸ்ஸவித்த²தங் பன ஹிமவந்தங் அஜ்ஜோ²கா³ஹெத்வா மணிகு³ஹாயமேவ வஸதி, யதா² ச ச²த்³த³ந்தோ நாக³ராஜா ந கோ³சரியஹத்தி²குலாதீ³ஸு நவஸு குலேஸு உப்பஜ்ஜதி, யதா² ச வலாஹகோ அஸ்ஸராஜா ந க³த்³ரப⁴குலே வா கோ⁴டககுலே வா உப்பஜ்ஜதி, ஸிந்து⁴தீரே பன ஸிந்த⁴வகுலேயேவ உப்பஜ்ஜதி, யதா² ச ஸப்³ப³காமத³த³ங் மனோஹரங் மணிரதனங் ந ஸங்காரகூடே வா பங்ஸுபப்³ப³தாதீ³ஸு வா உப்பஜ்ஜதி, விபுலபப்³ப³தப்³ப⁴ந்தரேயேவ உப்பஜ்ஜதி, யதா² ச திமிரபிங்க³லோ மச்ச²ராஜா ந கு²த்³த³கபொக்க²ரணீஸு உப்பஜ்ஜதி, சதுராஸீதியோஜனஸஹஸ்ஸக³ம்பீ⁴ரே மஹாஸமுத்³தே³யேவ உப்பஜ்ஜதி, யதா² ச தி³யட்³ட⁴யோஜனஸதிகோ ஸுபண்ணராஜா ந கா³மத்³வாரே ஏரண்ட³வனாதீ³ஸு படிவஸதி, மஹாஸமுத்³த³ங் பன அஜ்ஜோ²கா³ஹெத்வா ஸிம்ப³லித³ஹவனேயேவ படிவஸதி, யதா² ச த⁴தரட்டோ² ஸுவண்ணஹங்ஸோ ந கா³மத்³வாரே ஆவாடகாதீ³ஸு படிவஸதி, நவுதிஹங்ஸஸஹஸ்ஸபரிவாரோ பன ஹுத்வா சித்தகூடேயேவ படிவஸதி, யதா² ச சதுத்³தீ³பிஸ்ஸரோ சக்கவத்திராஜா ந நீசகுலே உப்பஜ்ஜதி, அஸம்பி⁴ன்னஜாதியக²த்தியகுலேயேவ பன உப்பஜ்ஜதி, ஏவமேவங் இமேஸு ஸமணேஸு ஏகஸமணோபி ந அஞ்ஞத்த² தித்தா²யதனே உப்பஜ்ஜதி, அரியமக்³க³பரிக்க²தே பன பு³த்³த⁴ஸாஸனேயேவ உப்பஜ்ஜதி. தேனாஹ ப⁴க³வா – ‘‘இதே⁴வ, பி⁴க்க²வே, ஸமணோ…பே॰… ஸுஞ்ஞா பரப்பவாதா³ ஸமணேபி⁴ அஞ்ஞேஹீ’’தி (ம॰ நி॰ 1.139-140; அ॰ நி॰ 4.241). ஏகாத³ஸமே நத்தி² வத்தப்³ப³ங்.
Ariyamaggassa ca abhāvo bhāvo ca suparisuddhassa sīlassa suparisuddhāya samathavipassanābhāvanāya abhāvato bhāvato ca veditabbo. Tadubhayañca durakkhātasvākkhātabhāvahetukaṃ . So ca asammāsambuddhappaveditattā. Yasmā titthāyatanaṃ akkhettaṃ, sāsanaṃ khettaṃ, tasmā yathā surattahatthapādo bhāsurakesarabhāro sīho migarājā na susāne vā saṅkārakūṭe vā paṭivasati, tiyojanasahassavitthataṃ pana himavantaṃ ajjhogāhetvā maṇiguhāyameva vasati, yathā ca chaddanto nāgarājā na gocariyahatthikulādīsu navasu kulesu uppajjati, yathā ca valāhako assarājā na gadrabhakule vā ghoṭakakule vā uppajjati, sindhutīre pana sindhavakuleyeva uppajjati, yathā ca sabbakāmadadaṃ manoharaṃ maṇiratanaṃ na saṅkārakūṭe vā paṃsupabbatādīsu vā uppajjati, vipulapabbatabbhantareyeva uppajjati, yathā ca timirapiṅgalo maccharājā na khuddakapokkharaṇīsu uppajjati, caturāsītiyojanasahassagambhīre mahāsamuddeyeva uppajjati, yathā ca diyaḍḍhayojanasatiko supaṇṇarājā na gāmadvāre eraṇḍavanādīsu paṭivasati, mahāsamuddaṃ pana ajjhogāhetvā simbalidahavaneyeva paṭivasati, yathā ca dhataraṭṭho suvaṇṇahaṃso na gāmadvāre āvāṭakādīsu paṭivasati, navutihaṃsasahassaparivāro pana hutvā cittakūṭeyeva paṭivasati, yathā ca catuddīpissaro cakkavattirājā na nīcakule uppajjati, asambhinnajātiyakhattiyakuleyeva pana uppajjati, evamevaṃ imesu samaṇesu ekasamaṇopi na aññattha titthāyatane uppajjati, ariyamaggaparikkhate pana buddhasāsaneyeva uppajjati. Tenāha bhagavā – ‘‘idheva, bhikkhave, samaṇo…pe… suññā parappavādā samaṇebhi aññehī’’ti (ma. ni. 1.139-140; a. ni. 4.241). Ekādasame natthi vattabbaṃ.
ஸமணஸுத்தாதி³வண்ணனா நிட்டி²தா.
Samaṇasuttādivaṇṇanā niṭṭhitā.
கம்மவக்³க³வண்ணனா நிட்டி²தா.
Kammavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
10. ஸமணஸுத்தங் • 10. Samaṇasuttaṃ
11. ஸப்புரிஸானிஸங்ஸஸுத்தங் • 11. Sappurisānisaṃsasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. ஸமணஸுத்தவண்ணனா • 10. Samaṇasuttavaṇṇanā
