| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
(९) ४. समणवग्गो
(9) 4. Samaṇavaggo
१-५. समणसुत्तादिवण्णना
1-5. Samaṇasuttādivaṇṇanā
८२-८६. चतुत्थस्स पठमे सम्मा आदानं गहणं समादानन्ति आह ‘‘समादानं वुच्चति गहण’’न्ति। अधिकं विसिट्ठं सीलन्ति अधिसीलं। लोकियसीलस्स अधिसीलभावो परियायेनाति निप्परियायमेव तं दस्सेतुं ‘‘अपिच सब्बम्पि लोकियसील’’न्तिआदि वुत्तं। सिक्खितब्बतोति आसेवितब्बतो। पञ्चपि दसपि वा सीलानि सीलं नाम, पातिमोक्खसंवरो अधिसीलं नाम अनवसेसकायिकचेतसिकसंवरभावतो मग्गसीलस्स पदट्ठानभावतो च। अट्ठ समापत्तियो चित्तं, विपस्सनापादकज्झानं अधिचित्तं मग्गसमाधिस्स अधिट्ठानभावतो। कम्मस्सकतञाणं पञ्ञा, विपस्सना अधिपञ्ञा मग्गपञ्ञाय अधिट्ठानभावतो। अपिच निब्बानं पत्थयन्तेन समादिन्नं पञ्चसीलं दससीलम्पि अधिसीलमेव निब्बानाधिगमस्स पच्चयभावतो। निब्बानं पत्थयन्तेन समापन्ना अट्ठ समापत्तियोपि अधिचित्तमेव।
82-86. Catutthassa paṭhame sammā ādānaṃ gahaṇaṃ samādānanti āha ‘‘samādānaṃ vuccati gahaṇa’’nti. Adhikaṃ visiṭṭhaṃ sīlanti adhisīlaṃ. Lokiyasīlassa adhisīlabhāvo pariyāyenāti nippariyāyameva taṃ dassetuṃ ‘‘apica sabbampi lokiyasīla’’ntiādi vuttaṃ. Sikkhitabbatoti āsevitabbato. Pañcapi dasapi vā sīlāni sīlaṃ nāma, pātimokkhasaṃvaro adhisīlaṃ nāma anavasesakāyikacetasikasaṃvarabhāvato maggasīlassa padaṭṭhānabhāvato ca. Aṭṭha samāpattiyo cittaṃ, vipassanāpādakajjhānaṃ adhicittaṃ maggasamādhissa adhiṭṭhānabhāvato. Kammassakatañāṇaṃ paññā, vipassanā adhipaññā maggapaññāya adhiṭṭhānabhāvato. Apica nibbānaṃ patthayantena samādinnaṃ pañcasīlaṃ dasasīlampi adhisīlameva nibbānādhigamassa paccayabhāvato. Nibbānaṃ patthayantena samāpannā aṭṭha samāpattiyopi adhicittameva.
‘‘कल्याणकारी कल्याणं, पापकारी च पापकं।
‘‘Kalyāṇakārī kalyāṇaṃ, pāpakārī ca pāpakaṃ;
अनुभोति द्वयमेतं, अनुबन्धञ्हि कारण’’न्ति॥ –
Anubhoti dvayametaṃ, anubandhañhi kāraṇa’’nti. –
एवं अतीते अनागते च वट्टमूलकदुक्खसल्लक्खणवसेन संवेगवत्थुताय विमुत्तिआकङ्खाय पच्चयभूता कम्मस्सकतपञ्ञापि अधिपञ्ञाति वदन्ति। दुतियततियचतुत्थपञ्चमानि उत्तानत्थानेव।
Evaṃ atīte anāgate ca vaṭṭamūlakadukkhasallakkhaṇavasena saṃvegavatthutāya vimuttiākaṅkhāya paccayabhūtā kammassakatapaññāpi adhipaññāti vadanti. Dutiyatatiyacatutthapañcamāni uttānatthāneva.
समणसुत्तादिवण्णना निट्ठिता।
Samaṇasuttādivaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya
१. समणसुत्तं • 1. Samaṇasuttaṃ
२. गद्रभसुत्तं • 2. Gadrabhasuttaṃ
३. खेत्तसुत्तं • 3. Khettasuttaṃ
४. वज्जिपुत्तसुत्तं • 4. Vajjiputtasuttaṃ
५. सेक्खसुत्तं • 5. Sekkhasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā)
१. समणसुत्तवण्णना • 1. Samaṇasuttavaṇṇanā
२. गद्रभसुत्तवण्णना • 2. Gadrabhasuttavaṇṇanā
३. खेत्तसुत्तवण्णना • 3. Khettasuttavaṇṇanā
४. वज्जिपुत्तसुत्तवण्णना • 4. Vajjiputtasuttavaṇṇanā
५. सेक्खसुत्तवण्णना • 5. Sekkhasuttavaṇṇanā
