| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৫. সমণসুত্তং
5. Samaṇasuttaṃ
৮৫. ‘‘‘সমণো’তি , ভিক্খৰে, তথাগতস্সেতং অধিৰচনং অরহতো সম্মাসম্বুদ্ধস্স। ‘ব্রাহ্মণো’তি, ভিক্খৰে, তথাগতস্সেতং অধিৰচনং অরহতো সম্মাসম্বুদ্ধস্স। ‘ৰেদগূ’তি, ভিক্খৰে, তথাগতস্সেতং অধিৰচনং অরহতো সম্মাসম্বুদ্ধস্স। ‘ভিসক্কো’তি, ভিক্খৰে, তথাগতস্সেতং অধিৰচনং অরহতো সম্মাসম্বুদ্ধস্স। ‘নিম্মলো’তি, ভিক্খৰে, তথাগতস্সেতং অধিৰচনং অরহতো সম্মাসম্বুদ্ধস্স। ‘ৰিমলো’তি, ভিক্খৰে, তথাগতস্সেতং অধিৰচনং অরহতো সম্মাসম্বুদ্ধস্স। ‘ঞাণী’তি, ভিক্খৰে, তথাগতস্সেতং অধিৰচনং অরহতো সম্মাসম্বুদ্ধস্স। ‘ৰিমুত্তো’তি, ভিক্খৰে, তথাগতস্সেতং অধিৰচনং অরহতো সম্মাসম্বুদ্ধস্সা’’তি।
85. ‘‘‘Samaṇo’ti , bhikkhave, tathāgatassetaṃ adhivacanaṃ arahato sammāsambuddhassa. ‘Brāhmaṇo’ti, bhikkhave, tathāgatassetaṃ adhivacanaṃ arahato sammāsambuddhassa. ‘Vedagū’ti, bhikkhave, tathāgatassetaṃ adhivacanaṃ arahato sammāsambuddhassa. ‘Bhisakko’ti, bhikkhave, tathāgatassetaṃ adhivacanaṃ arahato sammāsambuddhassa. ‘Nimmalo’ti, bhikkhave, tathāgatassetaṃ adhivacanaṃ arahato sammāsambuddhassa. ‘Vimalo’ti, bhikkhave, tathāgatassetaṃ adhivacanaṃ arahato sammāsambuddhassa. ‘Ñāṇī’ti, bhikkhave, tathāgatassetaṃ adhivacanaṃ arahato sammāsambuddhassa. ‘Vimutto’ti, bhikkhave, tathāgatassetaṃ adhivacanaṃ arahato sammāsambuddhassā’’ti.
‘‘যং সমণেন পত্তব্বং, ব্রাহ্মণেন ৰুসীমতা।
‘‘Yaṃ samaṇena pattabbaṃ, brāhmaṇena vusīmatā;
যং ৰেদগুনা পত্তব্বং, ভিসক্কেন অনুত্তরং॥
Yaṃ vedagunā pattabbaṃ, bhisakkena anuttaraṃ.
‘‘যং নিম্মলেন পত্তব্বং, ৰিমলেন সুচীমতা।
‘‘Yaṃ nimmalena pattabbaṃ, vimalena sucīmatā;
যং ঞাণিনা চ পত্তব্বং, ৰিমুত্তেন অনুত্তরং॥
Yaṃ ñāṇinā ca pattabbaṃ, vimuttena anuttaraṃ.
‘‘সোহং ৰিজিতসঙ্গামো, মুত্তো মোচেমি বন্ধনা।
‘‘Sohaṃ vijitasaṅgāmo, mutto mocemi bandhanā;
নাগোম্হি পরমদন্তো, অসেখো পরিনিব্বুতো’’তি॥ পঞ্চমং।
Nāgomhi paramadanto, asekho parinibbuto’’ti. pañcamaṃ;
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৫. সমণসুত্তৰণ্ণনা • 5. Samaṇasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-১০. সদ্ধাসুত্তাদিৰণ্ণনা • 1-10. Saddhāsuttādivaṇṇanā
