| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
(9) 4. ஸமணவக்³கோ³
(9) 4. Samaṇavaggo
1. ஸமணஸுத்தவண்ணனா
1. Samaṇasuttavaṇṇanā
82. சதுத்த²ஸ்ஸ பட²மே ஸமணியானீதி ஸமணஸந்தகானி. ஸமணகரணீயானீதி ஸமணேன கத்தப்³ப³கிச்சானி. அதி⁴ஸீலஸிக்கா²ஸமாதா³னந்திஆதீ³ஸு ஸமாதா³னங் வுச்சதி க³ஹணங், அதி⁴ஸீலஸிக்கா²ய ஸமாதா³னங் க³ஹணங் பூரணங் அதி⁴ஸீலஸிக்கா²ஸமாதா³னங். ஸேஸபத³த்³வயேபி ஏஸேவ நயோ. எத்த² ச ஸீலங் அதி⁴ஸீலங், சித்தங் அதி⁴சித்தங், பஞ்ஞா அதி⁴பஞ்ஞாதி அயங் விபா⁴கோ³ வேதி³தப்³போ³. தத்த² பஞ்சஸீலங் ஸீலங் நாம, தங் உபாதா³ய த³ஸஸீலங் அதி⁴ஸீலங் நாம, தம்பி உபாதா³ய சதுபாரிஸுத்³தி⁴ஸீலங் அதி⁴ஸீலங் நாம. அபிச ஸப்³ப³ம்பி லோகியஸீலங் ஸீலங் நாம, லோகுத்தரஸீலங் அதி⁴ஸீலங், ததே³வ ஸிக்கி²தப்³ப³தோ ஸிக்கா²தி வுச்சதி. காமாவசரசித்தங் பன சித்தங் நாம, தங் உபாதா³ய ரூபாவசரங் அதி⁴சித்தங் நாம, தம்பி உபாதா³ய அரூபாவசரங் அதி⁴சித்தங் நாம. அபிச ஸப்³ப³ம்பி லோகியசித்தங் சித்தமேவ, லோகுத்தரங் அதி⁴சித்தங். பஞ்ஞாயபி ஏஸேவ நயோ. தஸ்மாதி யஸ்மா இமானி தீணி ஸமணகரணீயானி, தஸ்மா. திப்³போ³தி ப³ஹலோ. ச²ந்தோ³தி கத்துகம்யதாகுஸலச்ச²ந்தோ³. இதி இமஸ்மிங் ஸுத்தந்தே திஸ்ஸோ ஸிக்கா² லோகியலோகுத்தரா கதி²தாதி.
82. Catutthassa paṭhame samaṇiyānīti samaṇasantakāni. Samaṇakaraṇīyānīti samaṇena kattabbakiccāni. Adhisīlasikkhāsamādānantiādīsu samādānaṃ vuccati gahaṇaṃ, adhisīlasikkhāya samādānaṃ gahaṇaṃ pūraṇaṃ adhisīlasikkhāsamādānaṃ. Sesapadadvayepi eseva nayo. Ettha ca sīlaṃ adhisīlaṃ, cittaṃ adhicittaṃ, paññā adhipaññāti ayaṃ vibhāgo veditabbo. Tattha pañcasīlaṃ sīlaṃ nāma, taṃ upādāya dasasīlaṃ adhisīlaṃ nāma, tampi upādāya catupārisuddhisīlaṃ adhisīlaṃ nāma. Apica sabbampi lokiyasīlaṃ sīlaṃ nāma, lokuttarasīlaṃ adhisīlaṃ, tadeva sikkhitabbato sikkhāti vuccati. Kāmāvacaracittaṃ pana cittaṃ nāma, taṃ upādāya rūpāvacaraṃ adhicittaṃ nāma, tampi upādāya arūpāvacaraṃ adhicittaṃ nāma. Apica sabbampi lokiyacittaṃ cittameva, lokuttaraṃ adhicittaṃ. Paññāyapi eseva nayo. Tasmāti yasmā imāni tīṇi samaṇakaraṇīyāni, tasmā. Tibboti bahalo. Chandoti kattukamyatākusalacchando. Iti imasmiṃ suttante tisso sikkhā lokiyalokuttarā kathitāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. ஸமணஸுத்தங் • 1. Samaṇasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-5. ஸமணஸுத்தாதி³வண்ணனா • 1-5. Samaṇasuttādivaṇṇanā
