| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
(೯) ೪. ಸಮಣವಗ್ಗೋ
(9) 4. Samaṇavaggo
೧. ಸಮಣಸುತ್ತವಣ್ಣನಾ
1. Samaṇasuttavaṇṇanā
೮೨. ಚತುತ್ಥಸ್ಸ ಪಠಮೇ ಸಮಣಿಯಾನೀತಿ ಸಮಣಸನ್ತಕಾನಿ। ಸಮಣಕರಣೀಯಾನೀತಿ ಸಮಣೇನ ಕತ್ತಬ್ಬಕಿಚ್ಚಾನಿ। ಅಧಿಸೀಲಸಿಕ್ಖಾಸಮಾದಾನನ್ತಿಆದೀಸು ಸಮಾದಾನಂ ವುಚ್ಚತಿ ಗಹಣಂ, ಅಧಿಸೀಲಸಿಕ್ಖಾಯ ಸಮಾದಾನಂ ಗಹಣಂ ಪೂರಣಂ ಅಧಿಸೀಲಸಿಕ್ಖಾಸಮಾದಾನಂ। ಸೇಸಪದದ್ವಯೇಪಿ ಏಸೇವ ನಯೋ। ಏತ್ಥ ಚ ಸೀಲಂ ಅಧಿಸೀಲಂ, ಚಿತ್ತಂ ಅಧಿಚಿತ್ತಂ, ಪಞ್ಞಾ ಅಧಿಪಞ್ಞಾತಿ ಅಯಂ ವಿಭಾಗೋ ವೇದಿತಬ್ಬೋ। ತತ್ಥ ಪಞ್ಚಸೀಲಂ ಸೀಲಂ ನಾಮ, ತಂ ಉಪಾದಾಯ ದಸಸೀಲಂ ಅಧಿಸೀಲಂ ನಾಮ, ತಮ್ಪಿ ಉಪಾದಾಯ ಚತುಪಾರಿಸುದ್ಧಿಸೀಲಂ ಅಧಿಸೀಲಂ ನಾಮ। ಅಪಿಚ ಸಬ್ಬಮ್ಪಿ ಲೋಕಿಯಸೀಲಂ ಸೀಲಂ ನಾಮ, ಲೋಕುತ್ತರಸೀಲಂ ಅಧಿಸೀಲಂ, ತದೇವ ಸಿಕ್ಖಿತಬ್ಬತೋ ಸಿಕ್ಖಾತಿ ವುಚ್ಚತಿ। ಕಾಮಾವಚರಚಿತ್ತಂ ಪನ ಚಿತ್ತಂ ನಾಮ, ತಂ ಉಪಾದಾಯ ರೂಪಾವಚರಂ ಅಧಿಚಿತ್ತಂ ನಾಮ, ತಮ್ಪಿ ಉಪಾದಾಯ ಅರೂಪಾವಚರಂ ಅಧಿಚಿತ್ತಂ ನಾಮ। ಅಪಿಚ ಸಬ್ಬಮ್ಪಿ ಲೋಕಿಯಚಿತ್ತಂ ಚಿತ್ತಮೇವ, ಲೋಕುತ್ತರಂ ಅಧಿಚಿತ್ತಂ। ಪಞ್ಞಾಯಪಿ ಏಸೇವ ನಯೋ। ತಸ್ಮಾತಿ ಯಸ್ಮಾ ಇಮಾನಿ ತೀಣಿ ಸಮಣಕರಣೀಯಾನಿ, ತಸ್ಮಾ। ತಿಬ್ಬೋತಿ ಬಹಲೋ। ಛನ್ದೋತಿ ಕತ್ತುಕಮ್ಯತಾಕುಸಲಚ್ಛನ್ದೋ। ಇತಿ ಇಮಸ್ಮಿಂ ಸುತ್ತನ್ತೇ ತಿಸ್ಸೋ ಸಿಕ್ಖಾ ಲೋಕಿಯಲೋಕುತ್ತರಾ ಕಥಿತಾತಿ।
82. Catutthassa paṭhame samaṇiyānīti samaṇasantakāni. Samaṇakaraṇīyānīti samaṇena kattabbakiccāni. Adhisīlasikkhāsamādānantiādīsu samādānaṃ vuccati gahaṇaṃ, adhisīlasikkhāya samādānaṃ gahaṇaṃ pūraṇaṃ adhisīlasikkhāsamādānaṃ. Sesapadadvayepi eseva nayo. Ettha ca sīlaṃ adhisīlaṃ, cittaṃ adhicittaṃ, paññā adhipaññāti ayaṃ vibhāgo veditabbo. Tattha pañcasīlaṃ sīlaṃ nāma, taṃ upādāya dasasīlaṃ adhisīlaṃ nāma, tampi upādāya catupārisuddhisīlaṃ adhisīlaṃ nāma. Apica sabbampi lokiyasīlaṃ sīlaṃ nāma, lokuttarasīlaṃ adhisīlaṃ, tadeva sikkhitabbato sikkhāti vuccati. Kāmāvacaracittaṃ pana cittaṃ nāma, taṃ upādāya rūpāvacaraṃ adhicittaṃ nāma, tampi upādāya arūpāvacaraṃ adhicittaṃ nāma. Apica sabbampi lokiyacittaṃ cittameva, lokuttaraṃ adhicittaṃ. Paññāyapi eseva nayo. Tasmāti yasmā imāni tīṇi samaṇakaraṇīyāni, tasmā. Tibboti bahalo. Chandoti kattukamyatākusalacchando. Iti imasmiṃ suttante tisso sikkhā lokiyalokuttarā kathitāti.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೧. ಸಮಣಸುತ್ತಂ • 1. Samaṇasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೫. ಸಮಣಸುತ್ತಾದಿವಣ್ಣನಾ • 1-5. Samaṇasuttādivaṇṇanā
