| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. ஸாமண்ட³கஸங்யுத்தங்
5. Sāmaṇḍakasaṃyuttaṃ
1. ஸாமண்ட³கஸுத்தங்
1. Sāmaṇḍakasuttaṃ
330. ஏகங் ஸமயங் ஆயஸ்மா ஸாரிபுத்தோ வஜ்ஜீஸு விஹரதி உக்கசேலாயங் க³ங்கா³ய நதி³யா தீரே. அத² கோ² ஸாமண்ட³கோ 1 பரிப்³பா³ஜகோ யேனாயஸ்மா ஸாரிபுத்தோ தேனுபஸங்கமி; உபஸங்கமித்வா ஆயஸ்மதா ஸாரிபுத்தேன ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஸாமண்ட³கோ பரிப்³பா³ஜகோ ஆயஸ்மந்தங் ஸாரிபுத்தங் ஏதத³வோச –
330. Ekaṃ samayaṃ āyasmā sāriputto vajjīsu viharati ukkacelāyaṃ gaṅgāya nadiyā tīre. Atha kho sāmaṇḍako 2 paribbājako yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho sāmaṇḍako paribbājako āyasmantaṃ sāriputtaṃ etadavoca –
‘‘‘நிப்³பா³னங், நிப்³பா³ன’ந்தி, ஆவுஸோ ஸாரிபுத்த, வுச்சதி. கதமங் நு கோ², ஆவுஸோ, நிப்³பா³ன’’ந்தி? ‘‘யோ கோ², ஆவுஸோ, ராக³க்க²யோ தோ³ஸக்க²யோ மோஹக்க²யோ – இத³ங் வுச்சதி நிப்³பா³ன’’ந்தி. ‘‘அத்தி² பனாவுஸோ, மக்³கோ³ அத்தி² படிபதா³, ஏதஸ்ஸ நிப்³பா³னஸ்ஸ ஸச்சி²கிரியாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³, ஏதஸ்ஸ நிப்³பா³னஸ்ஸ ஸச்சி²கிரியாயா’’தி.
‘‘‘Nibbānaṃ, nibbāna’nti, āvuso sāriputta, vuccati. Katamaṃ nu kho, āvuso, nibbāna’’nti? ‘‘Yo kho, āvuso, rāgakkhayo dosakkhayo mohakkhayo – idaṃ vuccati nibbāna’’nti. ‘‘Atthi panāvuso, maggo atthi paṭipadā, etassa nibbānassa sacchikiriyāyā’’ti? ‘‘Atthi kho, āvuso, maggo atthi paṭipadā, etassa nibbānassa sacchikiriyāyā’’ti.
‘‘கதமோ பனாவுஸோ, மக்³கோ³ கதமா படிபதா³ ஏதஸ்ஸ நிப்³பா³னஸ்ஸ ஸச்சி²கிரியாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³, ஏதஸ்ஸ நிப்³பா³னஸ்ஸ ஸச்சி²கிரியாய, ஸெய்யதி²த³ங் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயங் கோ², ஆவுஸோ, மக்³கோ³ அயங் படிபதா³, ஏதஸ்ஸ நிப்³பா³னஸ்ஸ ஸச்சி²கிரியாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதஸ்ஸ நிப்³பா³னஸ்ஸ ஸச்சி²கிரியாய. அலஞ்ச பனாவுஸோ ஸாரிபுத்த, அப்பமாதா³யா’’தி. பட²மங்.
‘‘Katamo panāvuso, maggo katamā paṭipadā etassa nibbānassa sacchikiriyāyā’’ti? ‘‘Ayameva kho, āvuso, ariyo aṭṭhaṅgiko maggo, etassa nibbānassa sacchikiriyāya, seyyathidaṃ – sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi. Ayaṃ kho, āvuso, maggo ayaṃ paṭipadā, etassa nibbānassa sacchikiriyāyā’’ti. ‘‘Bhaddako, āvuso, maggo bhaddikā paṭipadā, etassa nibbānassa sacchikiriyāya. Alañca panāvuso sāriputta, appamādāyā’’ti. Paṭhamaṃ.
(யதா² ஜம்பு³கா²த³கஸங்யுத்தங், ததா² வித்தா²ரேதப்³ப³ங்).
(Yathā jambukhādakasaṃyuttaṃ, tathā vitthāretabbaṃ).
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. ஸாமண்ட³கஸங்யுத்தவண்ணனா • 5. Sāmaṇḍakasaṃyuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. ஸாமண்ட³கஸங்யுத்தவண்ணனா • 5. Sāmaṇḍakasaṃyuttavaṇṇanā
