| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. সামণ্ডকসংযুত্তং
5. Sāmaṇḍakasaṃyuttaṃ
১. সামণ্ডকসুত্তং
1. Sāmaṇḍakasuttaṃ
৩৩০. একং সমযং আযস্মা সারিপুত্তো ৰজ্জীসু ৰিহরতি উক্কচেলাযং গঙ্গায নদিযা তীরে। অথ খো সামণ্ডকো 1 পরিব্বাজকো যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মতা সারিপুত্তেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো সামণ্ডকো পরিব্বাজকো আযস্মন্তং সারিপুত্তং এতদৰোচ –
330. Ekaṃ samayaṃ āyasmā sāriputto vajjīsu viharati ukkacelāyaṃ gaṅgāya nadiyā tīre. Atha kho sāmaṇḍako 2 paribbājako yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho sāmaṇḍako paribbājako āyasmantaṃ sāriputtaṃ etadavoca –
‘‘‘নিব্বানং, নিব্বান’ন্তি, আৰুসো সারিপুত্ত, ৰুচ্চতি। কতমং নু খো, আৰুসো, নিব্বান’’ন্তি? ‘‘যো খো, আৰুসো, রাগক্খযো দোসক্খযো মোহক্খযো – ইদং ৰুচ্চতি নিব্বান’’ন্তি। ‘‘অত্থি পনাৰুসো, মগ্গো অত্থি পটিপদা, এতস্স নিব্বানস্স সচ্ছিকিরিযাযা’’তি? ‘‘অত্থি খো, আৰুসো, মগ্গো অত্থি পটিপদা, এতস্স নিব্বানস্স সচ্ছিকিরিযাযা’’তি।
‘‘‘Nibbānaṃ, nibbāna’nti, āvuso sāriputta, vuccati. Katamaṃ nu kho, āvuso, nibbāna’’nti? ‘‘Yo kho, āvuso, rāgakkhayo dosakkhayo mohakkhayo – idaṃ vuccati nibbāna’’nti. ‘‘Atthi panāvuso, maggo atthi paṭipadā, etassa nibbānassa sacchikiriyāyā’’ti? ‘‘Atthi kho, āvuso, maggo atthi paṭipadā, etassa nibbānassa sacchikiriyāyā’’ti.
‘‘কতমো পনাৰুসো, মগ্গো কতমা পটিপদা এতস্স নিব্বানস্স সচ্ছিকিরিযাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো, এতস্স নিব্বানস্স সচ্ছিকিরিযায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি। অযং খো, আৰুসো, মগ্গো অযং পটিপদা, এতস্স নিব্বানস্স সচ্ছিকিরিযাযা’’তি। ‘‘ভদ্দকো, আৰুসো, মগ্গো ভদ্দিকা পটিপদা, এতস্স নিব্বানস্স সচ্ছিকিরিযায। অলঞ্চ পনাৰুসো সারিপুত্ত, অপ্পমাদাযা’’তি। পঠমং।
‘‘Katamo panāvuso, maggo katamā paṭipadā etassa nibbānassa sacchikiriyāyā’’ti? ‘‘Ayameva kho, āvuso, ariyo aṭṭhaṅgiko maggo, etassa nibbānassa sacchikiriyāya, seyyathidaṃ – sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi. Ayaṃ kho, āvuso, maggo ayaṃ paṭipadā, etassa nibbānassa sacchikiriyāyā’’ti. ‘‘Bhaddako, āvuso, maggo bhaddikā paṭipadā, etassa nibbānassa sacchikiriyāya. Alañca panāvuso sāriputta, appamādāyā’’ti. Paṭhamaṃ.
(যথা জম্বুখাদকসংযুত্তং, তথা ৰিত্থারেতব্বং)।
(Yathā jambukhādakasaṃyuttaṃ, tathā vitthāretabbaṃ).
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. সামণ্ডকসংযুত্তৰণ্ণনা • 5. Sāmaṇḍakasaṃyuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. সামণ্ডকসংযুত্তৰণ্ণনা • 5. Sāmaṇḍakasaṃyuttavaṇṇanā
