| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
5. සාමණ්‌ඩකසංයුත්‌තං
5. Sāmaṇḍakasaṃyuttaṃ
1. සාමණ්‌ඩකසුත්‌තං
1. Sāmaṇḍakasuttaṃ
330. එකං සමයං ආයස්‌මා සාරිපුත්‌තො වජ්‌ජීසු විහරති උක්‌කචෙලායං ගඞ්‌ගාය නදියා තීරෙ. අථ ඛො සාමණ්‌ඩකො 1 පරිබ්‌බාජකො යෙනායස්‌මා සාරිපුත්‌තො තෙනුපසඞ්‌කමි; උපසඞ්‌කමිත්‌වා ආයස්‌මතා සාරිපුත්‌තෙන සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො සාමණ්‌ඩකො පරිබ්‌බාජකො ආයස්‌මන්‌තං සාරිපුත්‌තං එතදවොච –
330. Ekaṃ samayaṃ āyasmā sāriputto vajjīsu viharati ukkacelāyaṃ gaṅgāya nadiyā tīre. Atha kho sāmaṇḍako 2 paribbājako yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho sāmaṇḍako paribbājako āyasmantaṃ sāriputtaṃ etadavoca –
‘‘‘නිබ්‌බානං, නිබ්‌බාන’න්‌ති, ආවුසො සාරිපුත්‌ත, වුච්‌චති. කතමං නු ඛො, ආවුසො, නිබ්‌බාන’’න්‌ති? ‘‘යො ඛො, ආවුසො, රාගක්‌ඛයො දොසක්‌ඛයො මොහක්‌ඛයො – ඉදං වුච්‌චති නිබ්‌බාන’’න්‌ති. ‘‘අත්‌ථි පනාවුසො, මග්‌ගො අත්‌ථි පටිපදා, එතස්‌ස නිබ්‌බානස්‌ස සච්‌ඡිකිරියායා’’ති? ‘‘අත්‌ථි ඛො, ආවුසො, මග්‌ගො අත්‌ථි පටිපදා, එතස්‌ස නිබ්‌බානස්‌ස සච්‌ඡිකිරියායා’’ති.
‘‘‘Nibbānaṃ, nibbāna’nti, āvuso sāriputta, vuccati. Katamaṃ nu kho, āvuso, nibbāna’’nti? ‘‘Yo kho, āvuso, rāgakkhayo dosakkhayo mohakkhayo – idaṃ vuccati nibbāna’’nti. ‘‘Atthi panāvuso, maggo atthi paṭipadā, etassa nibbānassa sacchikiriyāyā’’ti? ‘‘Atthi kho, āvuso, maggo atthi paṭipadā, etassa nibbānassa sacchikiriyāyā’’ti.
‘‘කතමො පනාවුසො, මග්‌ගො කතමා පටිපදා එතස්‌ස නිබ්‌බානස්‌ස සච්‌ඡිකිරියායා’’ති? ‘‘අයමෙව ඛො, ආවුසො, අරියො අට්‌ඨඞ්‌ගිකො මග්‌ගො, එතස්‌ස නිබ්‌බානස්‌ස සච්‌ඡිකිරියාය, සෙය්‍යථිදං – සම්‌මාදිට්‌ඨි සම්‌මාසඞ්‌කප්‌පො සම්‌මාවාචා සම්‌මාකම්‌මන්‌තො සම්‌මාආජීවො සම්‌මාවායාමො සම්‌මාසති සම්‌මාසමාධි. අයං ඛො, ආවුසො, මග්‌ගො අයං පටිපදා, එතස්‌ස නිබ්‌බානස්‌ස සච්‌ඡිකිරියායා’’ති. ‘‘භද්‌දකො, ආවුසො, මග්‌ගො භද්‌දිකා පටිපදා, එතස්‌ස නිබ්‌බානස්‌ස සච්‌ඡිකිරියාය. අලඤ්‌ච පනාවුසො සාරිපුත්‌ත, අප්‌පමාදායා’’ති. පඨමං.
‘‘Katamo panāvuso, maggo katamā paṭipadā etassa nibbānassa sacchikiriyāyā’’ti? ‘‘Ayameva kho, āvuso, ariyo aṭṭhaṅgiko maggo, etassa nibbānassa sacchikiriyāya, seyyathidaṃ – sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi. Ayaṃ kho, āvuso, maggo ayaṃ paṭipadā, etassa nibbānassa sacchikiriyāyā’’ti. ‘‘Bhaddako, āvuso, maggo bhaddikā paṭipadā, etassa nibbānassa sacchikiriyāya. Alañca panāvuso sāriputta, appamādāyā’’ti. Paṭhamaṃ.
(යථා ජම්‌බුඛාදකසංයුත්‌තං, තථා විත්‌ථාරෙතබ්‌බං).
(Yathā jambukhādakasaṃyuttaṃ, tathā vitthāretabbaṃ).
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. සාමණ්‌ඩකසංයුත්‌තවණ්‌ණනා • 5. Sāmaṇḍakasaṃyuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 5. සාමණ්‌ඩකසංයුත්‌තවණ්‌ණනා • 5. Sāmaṇḍakasaṃyuttavaṇṇanā
