| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৪. সমন্নাগতকথাৰণ্ণনা
4. Samannāgatakathāvaṇṇanā
৩৯৩. ইদানি সমন্নাগতকথা নাম হোতি। তত্থ দ্ৰে সমন্নাগমা পচ্চুপ্পন্নক্খণে সমঙ্গীভাৰসমন্নাগমো চ রূপাৰচরাদীসু অঞ্ঞতরভূমিপ্পত্তিতো পটিলাভসমন্নাগমো চ। সো যাৰ অধিগতৰিসেসা ন পরিহাযতি, তাৰদেৰ লব্ভতি। যেসং পন ঠপেত্ৰা ইমে দ্ৰে সমন্নাগমে অঞ্ঞো উপপত্তিধম্মৰসেন একো সমন্নাগমো নাম হোতীতি লদ্ধি, সেয্যথাপি এতরহি উত্তরাপথকানং, তেসং পত্তিধম্মো নাম কোচি নত্থীতি অনুবোধনত্থং অরহা চতূহি ফলেহি সমন্নাগতোতি পুচ্ছা সকৰাদিস্স, পত্তিং সন্ধায পটিঞ্ঞা ইতরস্স। অথস্স ‘‘যদি তে অরহা চতূহি খন্ধেহি ৰিয চতূহি ফলেহি সমন্নাগতো, এৰং সন্তে যে চতূসু ফলেসু চত্তারো ফস্সাদযো, তেহি তে অরহতো সমন্নাগততা পাপুণাতী’’তি চোদনত্থং অরহা চতূহি ফস্সেহীতিআদি আরদ্ধং। তং সব্বং পরৰাদিনা একক্খণে চতুন্নং ফস্সাদীনং অভাৰা পটিক্খিত্তং। অনাগামিপঞ্হাদীসুপি এসেৰ নযো।
393. Idāni samannāgatakathā nāma hoti. Tattha dve samannāgamā paccuppannakkhaṇe samaṅgībhāvasamannāgamo ca rūpāvacarādīsu aññatarabhūmippattito paṭilābhasamannāgamo ca. So yāva adhigatavisesā na parihāyati, tāvadeva labbhati. Yesaṃ pana ṭhapetvā ime dve samannāgame añño upapattidhammavasena eko samannāgamo nāma hotīti laddhi, seyyathāpi etarahi uttarāpathakānaṃ, tesaṃ pattidhammo nāma koci natthīti anubodhanatthaṃ arahā catūhi phalehi samannāgatoti pucchā sakavādissa, pattiṃ sandhāya paṭiññā itarassa. Athassa ‘‘yadi te arahā catūhi khandhehi viya catūhi phalehi samannāgato, evaṃ sante ye catūsu phalesu cattāro phassādayo, tehi te arahato samannāgatatā pāpuṇātī’’ti codanatthaṃ arahā catūhi phassehītiādi āraddhaṃ. Taṃ sabbaṃ paravādinā ekakkhaṇe catunnaṃ phassādīnaṃ abhāvā paṭikkhittaṃ. Anāgāmipañhādīsupi eseva nayo.
৩৯৫. সোতাপত্তিফলং ৰীতিৰত্তোতি ন পঠমজ্ঝানং ৰিয দুতিযজ্ঝানলাভী; পুন অনুপ্পত্তিযা পন ৰীতিৰত্তোতি পুচ্ছতি। সোতাপত্তিমগ্গন্তিআদি যং ৰীতিৰত্তো, তেনস্স পুন অসমন্নাগমং দস্সেতুং আরদ্ধং।
395. Sotāpattiphalaṃ vītivattoti na paṭhamajjhānaṃ viya dutiyajjhānalābhī; puna anuppattiyā pana vītivattoti pucchati. Sotāpattimaggantiādi yaṃ vītivatto, tenassa puna asamannāgamaṃ dassetuṃ āraddhaṃ.
৩৯৬. তেহি চ অপরিহীনোতি পঞ্হে যস্মা যথা পচ্চনীকসমুদাচারেন লোকিযজ্ঝানধম্মা পরিহাযন্তি, ন এৰং লোকুত্তরা। মগ্গেন হি যে কিলেসা পহীযন্তি, ফলেন চ পটিপ্পস্সম্ভন্তি, তে তথা পহীনাৰ তথা পটিপ্পস্সদ্ধাযেৰ চ হোন্তি, তস্মা সকৰাদিনা আমন্তাতি পটিঞ্ঞাতং। স্ৰাযমত্থো পরতো ‘‘অরহতা চত্তারো মগ্গা পটিলদ্ধা’’তিআদীসু পকাসিতোযেৰ। সেসং উত্তানত্থমেৰাতি।
396. Tehi ca aparihīnoti pañhe yasmā yathā paccanīkasamudācārena lokiyajjhānadhammā parihāyanti, na evaṃ lokuttarā. Maggena hi ye kilesā pahīyanti, phalena ca paṭippassambhanti, te tathā pahīnāva tathā paṭippassaddhāyeva ca honti, tasmā sakavādinā āmantāti paṭiññātaṃ. Svāyamattho parato ‘‘arahatā cattāro maggā paṭiladdhā’’tiādīsu pakāsitoyeva. Sesaṃ uttānatthamevāti.
সমন্নাগতকথাৰণ্ণনা।
Samannāgatakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৩৬) ৪. সমন্নাগতকথা • (36) 4. Samannāgatakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৪. সমন্নাগতকথাৰণ্ণনা • 4. Samannāgatakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৪. সমন্নাগতকথাৰণ্ণনা • 4. Samannāgatakathāvaṇṇanā
