| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
4. සමන්‌නාගතකථාවණ්‌ණනා
4. Samannāgatakathāvaṇṇanā
393. ඉදානි සමන්‌නාගතකථා නාම හොති. තත්‌ථ ද්‌වෙ සමන්‌නාගමා පච්‌චුප්‌පන්‌නක්‌ඛණෙ සමඞ්‌ගීභාවසමන්‌නාගමො ච රූපාවචරාදීසු අඤ්‌ඤතරභූමිප්‌පත්‌තිතො පටිලාභසමන්‌නාගමො ච. සො යාව අධිගතවිසෙසා න පරිහායති, තාවදෙව ලබ්‌භති. යෙසං පන ඨපෙත්‌වා ඉමෙ ද්‌වෙ සමන්‌නාගමෙ අඤ්‌ඤො උපපත්‌තිධම්‌මවසෙන එකො සමන්‌නාගමො නාම හොතීති ලද්‌ධි, සෙය්‍යථාපි එතරහි උත්‌තරාපථකානං, තෙසං පත්‌තිධම්‌මො නාම කොචි නත්‌ථීති අනුබොධනත්‌ථං අරහා චතූහි ඵලෙහි සමන්‌නාගතොති පුච්‌ඡා සකවාදිස්‌ස, පත්‌තිං සන්‌ධාය පටිඤ්‌ඤා ඉතරස්‌ස. අථස්‌ස ‘‘යදි තෙ අරහා චතූහි ඛන්‌ධෙහි විය චතූහි ඵලෙහි සමන්‌නාගතො, එවං සන්‌තෙ යෙ චතූසු ඵලෙසු චත්‌තාරො ඵස්‌සාදයො, තෙහි තෙ අරහතො සමන්‌නාගතතා පාපුණාතී’’ති චොදනත්‌ථං අරහා චතූහි ඵස්‌සෙහීතිආදි ආරද්‌ධං. තං සබ්‌බං පරවාදිනා එකක්‌ඛණෙ චතුන්‌නං ඵස්‌සාදීනං අභාවා පටික්‌ඛිත්‌තං. අනාගාමිපඤ්‌හාදීසුපි එසෙව නයො.
393. Idāni samannāgatakathā nāma hoti. Tattha dve samannāgamā paccuppannakkhaṇe samaṅgībhāvasamannāgamo ca rūpāvacarādīsu aññatarabhūmippattito paṭilābhasamannāgamo ca. So yāva adhigatavisesā na parihāyati, tāvadeva labbhati. Yesaṃ pana ṭhapetvā ime dve samannāgame añño upapattidhammavasena eko samannāgamo nāma hotīti laddhi, seyyathāpi etarahi uttarāpathakānaṃ, tesaṃ pattidhammo nāma koci natthīti anubodhanatthaṃ arahā catūhi phalehi samannāgatoti pucchā sakavādissa, pattiṃ sandhāya paṭiññā itarassa. Athassa ‘‘yadi te arahā catūhi khandhehi viya catūhi phalehi samannāgato, evaṃ sante ye catūsu phalesu cattāro phassādayo, tehi te arahato samannāgatatā pāpuṇātī’’ti codanatthaṃ arahā catūhi phassehītiādi āraddhaṃ. Taṃ sabbaṃ paravādinā ekakkhaṇe catunnaṃ phassādīnaṃ abhāvā paṭikkhittaṃ. Anāgāmipañhādīsupi eseva nayo.
395. සොතාපත්‌තිඵලං වීතිවත්‌තොති න පඨමජ්‌ඣානං විය දුතියජ්‌ඣානලාභී; පුන අනුප්‌පත්‌තියා පන වීතිවත්‌තොති පුච්‌ඡති. සොතාපත්‌තිමග්‌ගන්‌තිආදි යං වීතිවත්‌තො, තෙනස්‌ස පුන අසමන්‌නාගමං දස්‌සෙතුං ආරද්‌ධං.
395. Sotāpattiphalaṃ vītivattoti na paṭhamajjhānaṃ viya dutiyajjhānalābhī; puna anuppattiyā pana vītivattoti pucchati. Sotāpattimaggantiādi yaṃ vītivatto, tenassa puna asamannāgamaṃ dassetuṃ āraddhaṃ.
396. තෙහි ච අපරිහීනොති පඤ්‌හෙ යස්‌මා යථා පච්‌චනීකසමුදාචාරෙන ලොකියජ්‌ඣානධම්‌මා පරිහායන්‌ති, න එවං ලොකුත්‌තරා. මග්‌ගෙන හි යෙ කිලෙසා පහීයන්‌ති, ඵලෙන ච පටිප්‌පස්‌සම්‌භන්‌ති, තෙ තථා පහීනාව තථා පටිප්‌පස්‌සද්‌ධායෙව ච හොන්‌ති, තස්‌මා සකවාදිනා ආමන්‌තාති පටිඤ්‌ඤාතං. ස්‌වායමත්‌ථො පරතො ‘‘අරහතා චත්‌තාරො මග්‌ගා පටිලද්‌ධා’’තිආදීසු පකාසිතොයෙව. සෙසං උත්‌තානත්‌ථමෙවාති.
396. Tehi ca aparihīnoti pañhe yasmā yathā paccanīkasamudācārena lokiyajjhānadhammā parihāyanti, na evaṃ lokuttarā. Maggena hi ye kilesā pahīyanti, phalena ca paṭippassambhanti, te tathā pahīnāva tathā paṭippassaddhāyeva ca honti, tasmā sakavādinā āmantāti paṭiññātaṃ. Svāyamattho parato ‘‘arahatā cattāro maggā paṭiladdhā’’tiādīsu pakāsitoyeva. Sesaṃ uttānatthamevāti.
සමන්‌නාගතකථාවණ්‌ණනා.
Samannāgatakathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (36) 4. සමන්‌නාගතකථා • (36) 4. Samannāgatakathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 4. සමන්‌නාගතකථාවණ්‌ණනා • 4. Samannāgatakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 4. සමන්‌නාගතකථාවණ්‌ණනා • 4. Samannāgatakathāvaṇṇanā
