| Library / Tipiṭaka / တိပိဋက • Tipiṭaka / ပရိဝာရ-အဋ္ဌကထာ • Parivāra-aṭṭhakathā |
သမနုဘာသနာသမုဋ္ဌာနဝဏ္ဏနာ
Samanubhāsanāsamuṭṭhānavaṇṇanā
၂၆၁. ဘေဒာနုဝတ္တဒုဗ္ဗစဒူသဒုဋ္ဌုလ္လဒိဋ္ဌိ စာတိ သင္ဃဘေဒာနုဝတ္တကဒုဗ္ဗစကုလဒူသကဒုဋ္ဌုလ္လပ္ပဋိစ္ဆာဒနဒိဋ္ဌိအပ္ပဋိနိသ္သဇ္ဇနသိက္ခာပဒာနိ။ ဆန္ဒံ ဥဇ္ဇဂ္ဃိကာ ဒ္ဝေ စာတိ ဆန္ဒံ အဒတ္ဝာ ဂမနသိက္ခာပဒံ ဥဇ္ဇဂ္ဃိကာယ အန္တရဃရေ ဂမနနိသီဒနသိက္ခာပဒဒ္ဝယဉ္စ။ ဒ္ဝေ စ သဒ္ဒာတိ ‘‘အပ္ပသဒ္ဒော အန္တရဃရေ ဂမိသ္သာမိ, နိသီဒိသ္သာမီ’’တိ သိက္ခာပဒဒ္ဝယဉ္စ။ န ဗ္ယာဟရေတိ ‘‘န သကဗဠေန မုခေန ဗ္ယာဟရိသ္သာမီ’’တိ သိက္ခာပဒံ။
261.Bhedānuvattadubbacadūsaduṭṭhulladiṭṭhicāti saṅghabhedānuvattakadubbacakuladūsakaduṭṭhullappaṭicchādanadiṭṭhiappaṭinissajjanasikkhāpadāni. Chandaṃ ujjagghikā dve cāti chandaṃ adatvā gamanasikkhāpadaṃ ujjagghikāya antaraghare gamananisīdanasikkhāpadadvayañca. Dve ca saddāti ‘‘appasaddo antaraghare gamissāmi, nisīdissāmī’’ti sikkhāpadadvayañca. Na byāhareti ‘‘na sakabaḷena mukhena byāharissāmī’’ti sikkhāpadaṃ.
ဆမာ နီစာသနေ ဌာနံ, ပစ္ဆတော ဥပ္ပထေန စာတိ ဆမာယံ နိသီဒိတ္ဝာ, နီစေ အာသနေ နိသီဒိတ္ဝာ; ဌိတေန နိသိန္နသ္သ, ပစ္ဆတော ဂစ္ဆန္တေန ပုရတော ဂစ္ဆန္တသ္သ, ဥပ္ပထေန ဂစ္ဆန္တေန ပထေန ဂစ္ဆန္တသ္သ ဓမ္မဒေသနာသိက္ခာပဒာနိ။ ဝဇ္ဇာနုဝတ္တိဂဟဏာတိ ဝဇ္ဇပ္ပဋိစ္ဆာဒနဥအခတ္တာနုဝတ္တကဟတ္ထဂ္ဂဟဏာဒိသင္ခာတာနိ တီဏိ ပာရာဇိကာနိ။ ဩသာရေ ပစ္စာစိက္ခနာတိ ‘‘အနပလောကေတ္ဝာ ကာရကသင္ဃံ အနညာယ ဂဏသ္သ ဆန္ဒံ ဩသာရေယ္ယာ’’တိ စ ‘‘ဗုဒ္ဓံ ပစ္စက္ခာမီ’’တိ စ ဝုတ္တသိက္ခာပဒဒ္ဝယံ။
Chamā nīcāsane ṭhānaṃ, pacchato uppathena cāti chamāyaṃ nisīditvā, nīce āsane nisīditvā; ṭhitena nisinnassa, pacchato gacchantena purato gacchantassa, uppathena gacchantena pathena gacchantassa dhammadesanāsikkhāpadāni. Vajjānuvattigahaṇāti vajjappaṭicchādanauakhattānuvattakahatthaggahaṇādisaṅkhātāni tīṇi pārājikāni. Osāre paccācikkhanāti ‘‘anapaloketvā kārakasaṅghaṃ anaññāya gaṇassa chandaṃ osāreyyā’’ti ca ‘‘buddhaṃ paccakkhāmī’’ti ca vuttasikkhāpadadvayaṃ.
ကိသ္မိံ သံသဋ္ဌာ ဒ္ဝေ ဝဓီတိ ‘‘ကိသ္မိဉ္စိဒေဝ အဓိကရဏေ ပစ္စာကတာ’’တိ စ ‘‘ဘိက္ခုနိယော ပနေဝ သံသဋ္ဌာ ဝိဟရန္တီ’’တိ စ ‘‘ယာ ပန ဘိက္ခုနီ ဧဝံ ဝဒေယ္ယ သံသဋ္ဌာဝ အယ္ယေ တုမ္ဟေ ဝိဟရထာ’’တိ စ ‘‘အတ္တာနံ ဝဓိတ္ဝာ ဝဓိတ္ဝာ ရောဒေယ္ယာ’’တိ စ ဝုတ္တသိက္ခာပဒာနိ။ ဝိသိဗ္ဗေ ဒုက္ခိတာယ စာတိ ‘‘ဘိက္ခုနိယာ စီဝရံ ဝိသိဗ္ဗေတ္ဝာ ဝာ ဝိသိဗ္ဗာပေတ္ဝာ ဝာ’’တိ စ ‘‘ဒုက္ခိတံ သဟဇီဝိနိ’’န္တိ စ ဝုတ္တသိက္ခာပဒဒ္ဝယံ။ ပုန သံသဋ္ဌာ န ဝူပသမေတိ ‘‘သံသဋ္ဌာ ဝိဟရေယ္ယ ဂဟပတိနာ ဝာ ဂဟပတိပုတ္တေန ဝာ’’တိ ဧဝံ ပုန ဝုတ္တသံသဋ္ဌသိက္ခာပဒဉ္စ ‘‘ဧဟယ္ယေ, ဣမံ အဓိကရဏံ ဝူပသမေဟီ’’တိ ဝုစ္စမာနာ, ‘‘သာဓူ’’တိ ပဋိသ္သုဏိတ္ဝာ ‘‘သာ ပစ္ဆာ အနန္တရာယိကိနီ နေဝ ဝူပသမ္မေယ္ယာ’’တိ ဝုတ္တသိက္ခာပဒဉ္စ။ အာရာမဉ္စ ပဝာရဏာတိ ‘‘ဇာနံ သဘိက္ခုကံ အာရာမံ အနာပုစ္ဆာ ပဝိသေယ္ယာ’’တိ စ ‘‘ဥဘတောသင္ဃေ တီဟိ ဌာနေဟိ န ပဝာရေယ္ယာ’’တိ စ ဝုတ္တသိက္ခာပဒဒ္ဝယံ။
Kismiṃ saṃsaṭṭhā dve vadhīti ‘‘kismiñcideva adhikaraṇe paccākatā’’ti ca ‘‘bhikkhuniyo paneva saṃsaṭṭhā viharantī’’ti ca ‘‘yā pana bhikkhunī evaṃ vadeyya saṃsaṭṭhāva ayye tumhe viharathā’’ti ca ‘‘attānaṃ vadhitvā vadhitvā rodeyyā’’ti ca vuttasikkhāpadāni. Visibbe dukkhitāya cāti ‘‘bhikkhuniyā cīvaraṃ visibbetvā vā visibbāpetvā vā’’ti ca ‘‘dukkhitaṃ sahajīvini’’nti ca vuttasikkhāpadadvayaṃ. Puna saṃsaṭṭhā na vūpasameti ‘‘saṃsaṭṭhā vihareyya gahapatinā vā gahapatiputtena vā’’ti evaṃ puna vuttasaṃsaṭṭhasikkhāpadañca ‘‘ehayye, imaṃ adhikaraṇaṃ vūpasamehī’’ti vuccamānā, ‘‘sādhū’’ti paṭissuṇitvā ‘‘sā pacchā anantarāyikinī neva vūpasammeyyā’’ti vuttasikkhāpadañca. Ārāmañca pavāraṇāti ‘‘jānaṃ sabhikkhukaṃ ārāmaṃ anāpucchā paviseyyā’’ti ca ‘‘ubhatosaṅghe tīhi ṭhānehi na pavāreyyā’’ti ca vuttasikkhāpadadvayaṃ.
အန္ဝဒ္ဓံ သဟဇီဝိနိံ ဒ္ဝေတိ ‘‘အန္ဝဒ္ဓမာသံ ဘိက္ခုနိယာ ဘိက္ခုသင္ဃတော ဒ္ဝေ ဓမ္မာ ပစ္စာသီသိတဗ္ဗာ’’တိ ဝုတ္တသိက္ခာပဒဉ္စ, ‘‘သဟဇီဝိနိံ ဝုဋ္ဌာပေတ္ဝာ ဒ္ဝေ ဝသ္သာနိ နေဝ အနုဂ္ဂဏ္ဟေယ္ယ, သဟဇီဝိနိံ ဝုဋ္ဌာပေတ္ဝာ နေဝ ဝူပကာသေယ္ယာ’’တိ ဝုတ္တသိက္ခာပဒဒ္ဝယဉ္စ။ စီဝရံ အနုဗန္ဓနာတိ ‘‘သစေ မေ တ္ဝံ, အယ္ယေ, စီဝရံ ဒသ္သသိ, ဧဝာဟံ တံ ဝုဋ္ဌာပေသ္သာမီ’’တိ စ ‘‘သစေ မံ တ္ဝံ, အယ္ယေ, ဒ္ဝေ ဝသ္သာနိ အနုဗန္ဓိသ္သသိ, ဧဝာဟံ တံ ဝုဋ္ဌာပေသ္သာမီ’’တိ စ ဝုတ္တသိက္ခာပဒဒ္ဝယံ။
Anvaddhaṃ sahajīviniṃ dveti ‘‘anvaddhamāsaṃ bhikkhuniyā bhikkhusaṅghato dve dhammā paccāsīsitabbā’’ti vuttasikkhāpadañca, ‘‘sahajīviniṃ vuṭṭhāpetvā dve vassāni neva anuggaṇheyya, sahajīviniṃ vuṭṭhāpetvā neva vūpakāseyyā’’ti vuttasikkhāpadadvayañca. Cīvaraṃ anubandhanāti ‘‘sace me tvaṃ, ayye, cīvaraṃ dassasi, evāhaṃ taṃ vuṭṭhāpessāmī’’ti ca ‘‘sace maṃ tvaṃ, ayye, dve vassāni anubandhissasi, evāhaṃ taṃ vuṭṭhāpessāmī’’ti ca vuttasikkhāpadadvayaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ပရိဝာရပာဠိ • Parivārapāḷi / ၄. သမနုဘာသနာသမုဋ္ဌာနံ • 4. Samanubhāsanāsamuṭṭhānaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / သမနုဘာသနာသမုဋ္ဌာနဝဏ္ဏနာ • Samanubhāsanāsamuṭṭhānavaṇṇanā
