| Library / Tipiṭaka / ཏིཔིཊཀ • Tipiṭaka / པརིཝཱར-ཨཊྛཀཐཱ • Parivāra-aṭṭhakathā |
སམནུབྷཱསནཱསམུཊྛཱནཝཎྞནཱ
Samanubhāsanāsamuṭṭhānavaṇṇanā
༢༦༡. བྷེདཱནུཝཏྟདུབྦཙདཱུསདུཊྛུལླདིཊྛི ཙཱཏི སངྒྷབྷེདཱནུཝཏྟཀདུབྦཙཀུལདཱུསཀདུཊྛུལླཔྤཊིཙྪཱདནདིཊྛིཨཔྤཊིནིསྶཛྫནསིཀྑཱཔདཱནི། ཚནྡཾ ཨུཛྫགྒྷིཀཱ དྭེ ཙཱཏི ཚནྡཾ ཨདཏྭཱ གམནསིཀྑཱཔདཾ ཨུཛྫགྒྷིཀཱཡ ཨནྟརགྷརེ གམནནིསཱིདནསིཀྑཱཔདདྭཡཉྩ། དྭེ ཙ སདྡཱཏི ‘‘ཨཔྤསདྡོ ཨནྟརགྷརེ གམིསྶཱམི, ནིསཱིདིསྶཱམཱི’’ཏི སིཀྑཱཔདདྭཡཉྩ། ན བྱཱཧརེཏི ‘‘ན སཀབལེ༹ན མུཁེན བྱཱཧརིསྶཱམཱི’’ཏི སིཀྑཱཔདཾ།
261.Bhedānuvattadubbacadūsaduṭṭhulladiṭṭhicāti saṅghabhedānuvattakadubbacakuladūsakaduṭṭhullappaṭicchādanadiṭṭhiappaṭinissajjanasikkhāpadāni. Chandaṃ ujjagghikā dve cāti chandaṃ adatvā gamanasikkhāpadaṃ ujjagghikāya antaraghare gamananisīdanasikkhāpadadvayañca. Dve ca saddāti ‘‘appasaddo antaraghare gamissāmi, nisīdissāmī’’ti sikkhāpadadvayañca. Na byāhareti ‘‘na sakabaḷena mukhena byāharissāmī’’ti sikkhāpadaṃ.
ཚམཱ ནཱིཙཱསནེ ཋཱནཾ, པཙྪཏོ ཨུཔྤཐེན ཙཱཏི ཚམཱཡཾ ནིསཱིདིཏྭཱ, ནཱིཙེ ཨཱསནེ ནིསཱིདིཏྭཱ; ཋིཏེན ནིསིནྣསྶ, པཙྪཏོ གཙྪནྟེན པུརཏོ གཙྪནྟསྶ, ཨུཔྤཐེན གཙྪནྟེན པཐེན གཙྪནྟསྶ དྷམྨདེསནཱསིཀྑཱཔདཱནི། ཝཛྫཱནུཝཏྟིགཧཎཱཏི ཝཛྫཔྤཊིཙྪཱདནཨུཨཁཏྟཱནུཝཏྟཀཧཏྠགྒཧཎཱདིསངྑཱཏཱནི ཏཱིཎི པཱརཱཛིཀཱནི། ཨོསཱརེ པཙྩཱཙིཀྑནཱཏི ‘‘ཨནཔལོཀེཏྭཱ ཀཱརཀསངྒྷཾ ཨནཉྙཱཡ གཎསྶ ཚནྡཾ ཨོསཱརེཡྻཱ’’ཏི ཙ ‘‘བུདྡྷཾ པཙྩཀྑཱམཱི’’ཏི ཙ ཝུཏྟསིཀྑཱཔདདྭཡཾ།
Chamā nīcāsane ṭhānaṃ, pacchato uppathena cāti chamāyaṃ nisīditvā, nīce āsane nisīditvā; ṭhitena nisinnassa, pacchato gacchantena purato gacchantassa, uppathena gacchantena pathena gacchantassa dhammadesanāsikkhāpadāni. Vajjānuvattigahaṇāti vajjappaṭicchādanauakhattānuvattakahatthaggahaṇādisaṅkhātāni tīṇi pārājikāni. Osāre paccācikkhanāti ‘‘anapaloketvā kārakasaṅghaṃ anaññāya gaṇassa chandaṃ osāreyyā’’ti ca ‘‘buddhaṃ paccakkhāmī’’ti ca vuttasikkhāpadadvayaṃ.
ཀིསྨིཾ སཾསཊྛཱ དྭེ ཝདྷཱིཏི ‘‘ཀིསྨིཉྩིདེཝ ཨདྷིཀརཎེ པཙྩཱཀཏཱ’’ཏི ཙ ‘‘བྷིཀྑུནིཡོ པནེཝ སཾསཊྛཱ ཝིཧརནྟཱི’’ཏི ཙ ‘‘ཡཱ པན བྷིཀྑུནཱི ཨེཝཾ ཝདེཡྻ སཾསཊྛཱཝ ཨཡྻེ ཏུམྷེ ཝིཧརཐཱ’’ཏི ཙ ‘‘ཨཏྟཱནཾ ཝདྷིཏྭཱ ཝདྷིཏྭཱ རོདེཡྻཱ’’ཏི ཙ ཝུཏྟསིཀྑཱཔདཱནི། ཝིསིབྦེ དུཀྑིཏཱཡ ཙཱཏི ‘‘བྷིཀྑུནིཡཱ ཙཱིཝརཾ ཝིསིབྦེཏྭཱ ཝཱ ཝིསིབྦཱཔེཏྭཱ ཝཱ’’ཏི ཙ ‘‘དུཀྑིཏཾ སཧཛཱིཝིནི’’ནྟི ཙ ཝུཏྟསིཀྑཱཔདདྭཡཾ། པུན སཾསཊྛཱ ན ཝཱུཔསམེཏི ‘‘སཾསཊྛཱ ཝིཧརེཡྻ གཧཔཏིནཱ ཝཱ གཧཔཏིཔུཏྟེན ཝཱ’’ཏི ཨེཝཾ པུན ཝུཏྟསཾསཊྛསིཀྑཱཔདཉྩ ‘‘ཨེཧཡྻེ, ཨིམཾ ཨདྷིཀརཎཾ ཝཱུཔསམེཧཱི’’ཏི ཝུཙྩམཱནཱ, ‘‘སཱདྷཱུ’’ཏི པཊིསྶུཎིཏྭཱ ‘‘སཱ པཙྪཱ ཨནནྟརཱཡིཀིནཱི ནེཝ ཝཱུཔསམྨེཡྻཱ’’ཏི ཝུཏྟསིཀྑཱཔདཉྩ། ཨཱརཱམཉྩ པཝཱརཎཱཏི ‘‘ཛཱནཾ སབྷིཀྑུཀཾ ཨཱརཱམཾ ཨནཱཔུཙྪཱ པཝིསེཡྻཱ’’ཏི ཙ ‘‘ཨུབྷཏོསངྒྷེ ཏཱིཧི ཋཱནེཧི ན པཝཱརེཡྻཱ’’ཏི ཙ ཝུཏྟསིཀྑཱཔདདྭཡཾ།
Kismiṃ saṃsaṭṭhā dve vadhīti ‘‘kismiñcideva adhikaraṇe paccākatā’’ti ca ‘‘bhikkhuniyo paneva saṃsaṭṭhā viharantī’’ti ca ‘‘yā pana bhikkhunī evaṃ vadeyya saṃsaṭṭhāva ayye tumhe viharathā’’ti ca ‘‘attānaṃ vadhitvā vadhitvā rodeyyā’’ti ca vuttasikkhāpadāni. Visibbe dukkhitāya cāti ‘‘bhikkhuniyā cīvaraṃ visibbetvā vā visibbāpetvā vā’’ti ca ‘‘dukkhitaṃ sahajīvini’’nti ca vuttasikkhāpadadvayaṃ. Puna saṃsaṭṭhā na vūpasameti ‘‘saṃsaṭṭhā vihareyya gahapatinā vā gahapatiputtena vā’’ti evaṃ puna vuttasaṃsaṭṭhasikkhāpadañca ‘‘ehayye, imaṃ adhikaraṇaṃ vūpasamehī’’ti vuccamānā, ‘‘sādhū’’ti paṭissuṇitvā ‘‘sā pacchā anantarāyikinī neva vūpasammeyyā’’ti vuttasikkhāpadañca. Ārāmañca pavāraṇāti ‘‘jānaṃ sabhikkhukaṃ ārāmaṃ anāpucchā paviseyyā’’ti ca ‘‘ubhatosaṅghe tīhi ṭhānehi na pavāreyyā’’ti ca vuttasikkhāpadadvayaṃ.
ཨནྭདྡྷཾ སཧཛཱིཝིནིཾ དྭེཏི ‘‘ཨནྭདྡྷམཱསཾ བྷིཀྑུནིཡཱ བྷིཀྑུསངྒྷཏོ དྭེ དྷམྨཱ པཙྩཱསཱིསིཏབྦཱ’’ཏི ཝུཏྟསིཀྑཱཔདཉྩ, ‘‘སཧཛཱིཝིནིཾ ཝུཊྛཱཔེཏྭཱ དྭེ ཝསྶཱནི ནེཝ ཨནུགྒཎྷེཡྻ, སཧཛཱིཝིནིཾ ཝུཊྛཱཔེཏྭཱ ནེཝ ཝཱུཔཀཱསེཡྻཱ’’ཏི ཝུཏྟསིཀྑཱཔདདྭཡཉྩ། ཙཱིཝརཾ ཨནུབནྡྷནཱཏི ‘‘སཙེ མེ ཏྭཾ, ཨཡྻེ, ཙཱིཝརཾ དསྶསི, ཨེཝཱཧཾ ཏཾ ཝུཊྛཱཔེསྶཱམཱི’’ཏི ཙ ‘‘སཙེ མཾ ཏྭཾ, ཨཡྻེ, དྭེ ཝསྶཱནི ཨནུབནྡྷིསྶསི, ཨེཝཱཧཾ ཏཾ ཝུཊྛཱཔེསྶཱམཱི’’ཏི ཙ ཝུཏྟསིཀྑཱཔདདྭཡཾ།
Anvaddhaṃ sahajīviniṃ dveti ‘‘anvaddhamāsaṃ bhikkhuniyā bhikkhusaṅghato dve dhammā paccāsīsitabbā’’ti vuttasikkhāpadañca, ‘‘sahajīviniṃ vuṭṭhāpetvā dve vassāni neva anuggaṇheyya, sahajīviniṃ vuṭṭhāpetvā neva vūpakāseyyā’’ti vuttasikkhāpadadvayañca. Cīvaraṃ anubandhanāti ‘‘sace me tvaṃ, ayye, cīvaraṃ dassasi, evāhaṃ taṃ vuṭṭhāpessāmī’’ti ca ‘‘sace maṃ tvaṃ, ayye, dve vassāni anubandhissasi, evāhaṃ taṃ vuṭṭhāpessāmī’’ti ca vuttasikkhāpadadvayaṃ.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / པརིཝཱརཔཱལི༹ • Parivārapāḷi / ༤. སམནུབྷཱསནཱསམུཊྛཱནཾ • 4. Samanubhāsanāsamuṭṭhānaṃ
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / སམནུབྷཱསནཱསམུཊྛཱནཝཎྞནཱ • Samanubhāsanāsamuṭṭhānavaṇṇanā
