| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. ஸமனுபஸ்ஸனாஸுத்தவண்ணனா
5. Samanupassanāsuttavaṇṇanā
47. பஞ்சமே பஞ்சுபாதா³னக்க²ந்தே⁴ ஸமனுபஸ்ஸந்தி ஏதேஸங் வா அஞ்ஞதரந்தி பரிபுண்ணகா³ஹவஸேன பஞ்சக்க²ந்தே⁴ ஸமனுபஸ்ஸந்தி, அபரிபுண்ணகா³ஹவஸேன ஏதேஸங் அஞ்ஞதரங். இதி அயஞ்சேவ ஸமனுபஸ்ஸனாதி இதி அயஞ்ச தி³ட்டி²ஸமனுபஸ்ஸனா. அஸ்மீதி சஸ்ஸ அவிக³தங் ஹோதீதி யஸ்ஸ அயங் ஸமனுபஸ்ஸனா அத்தி², தஸ்மிங் அஸ்மீதி தண்ஹாமானதி³ட்டி²ஸங்கா²தங் பபஞ்சத்தயங் அவிக³தமேவ ஹோதி. பஞ்சன்னங் இந்த்³ரியானங் அவக்கந்தி ஹோதீதி தஸ்மிங் கிலேஸஜாதே ஸதி கம்மகிலேஸபச்சயானங் பஞ்சன்னங் இந்த்³ரியானங் நிப்³ப³த்தி ஹோதி.
47. Pañcame pañcupādānakkhandhe samanupassanti etesaṃ vā aññataranti paripuṇṇagāhavasena pañcakkhandhe samanupassanti, aparipuṇṇagāhavasena etesaṃ aññataraṃ. Iti ayañceva samanupassanāti iti ayañca diṭṭhisamanupassanā. Asmīti cassa avigataṃ hotīti yassa ayaṃ samanupassanā atthi, tasmiṃ asmīti taṇhāmānadiṭṭhisaṅkhātaṃ papañcattayaṃ avigatameva hoti. Pañcannaṃindriyānaṃ avakkanti hotīti tasmiṃ kilesajāte sati kammakilesapaccayānaṃ pañcannaṃ indriyānaṃ nibbatti hoti.
அத்தி², பி⁴க்க²வே, மனோதி இத³ங் கம்மமனங் ஸந்தா⁴ய வுத்தங். த⁴ம்மாதி ஆரம்மணங். அவிஜ்ஜாதா⁴தூதி ஜவனக்க²ணே அவிஜ்ஜா. அவிஜ்ஜாஸம்ப²ஸ்ஸஜேனாதி அவிஜ்ஜாஸம்பயுத்தப²ஸ்ஸதோ ஜாதேன. அபிச மனோதி ப⁴வங்க³க்க²ணே விபாகமனோதா⁴து, ஆவஜ்ஜனக்க²ணே கிரியமனோதா⁴து. த⁴ம்மாத³யோ வுத்தப்பகாராவ. அஸ்மீதிபிஸ்ஸ ஹோதீதி தண்ஹாமானதி³ட்டி²வஸேன அஸ்மீதி ஏவம்பிஸ்ஸ ஹோதி. இதோ பரேஸு அயமஹமஸ்மீதி ரூபாதீ³ஸு கிஞ்சிதே³வ த⁴ம்மங் க³ஹெத்வா ‘‘அயங் அஹமஸ்மீ’’தி அத்ததி³ட்டி²வஸேன வுத்தங். ப⁴விஸ்ஸந்தி ஸஸ்ஸததி³ட்டி²வஸேன. ந ப⁴விஸ்ஸந்தி உச்சே²த³தி³ட்டி²வஸேன. ரூபீ ப⁴விஸ்ஸந்திஆதீ³னி ஸப்³பா³னி ஸஸ்ஸதமேவ ப⁴ஜந்தி. அதெ²த்தா²தி அத² தேனேவாகாரேன டி²தேஸு ஏதேஸு இந்த்³ரியேஸு. அவிஜ்ஜா பஹீயதீதி சதூஸு ஸச்சேஸு அஞ்ஞாணபூ⁴தா அவிஜ்ஜா பஹீயதி. விஜ்ஜா உப்பஜ்ஜதீதி அரஹத்தமக்³க³விஜ்ஜா உப்பஜ்ஜதி. ஏவமெத்த² அஸ்மீதி தண்ஹாமானதி³ட்டி²யோ. கம்மஸ்ஸ பஞ்சன்னஞ்ச இந்த்³ரியானங் அந்தரே ஏகோ ஸந்தி⁴, விபாகமனங் பஞ்சிந்த்³ரியபக்கி²கங் கத்வா பஞ்சன்னஞ்ச இந்த்³ரியானங் கம்மஸ்ஸ ச அந்தரே ஏகோ ஸந்தீ⁴தி. இதி தயோ பபஞ்சா அதீதோ அத்³தா⁴, இந்த்³ரியாதீ³னி பச்சுப்பன்னோ அத்³தா⁴, தத்த² கம்மமனங் ஆதி³ங் கத்வா அனாக³தஸ்ஸ பச்சயோ த³ஸ்ஸிதோதி. பஞ்சமங்.
Atthi, bhikkhave, manoti idaṃ kammamanaṃ sandhāya vuttaṃ. Dhammāti ārammaṇaṃ. Avijjādhātūti javanakkhaṇe avijjā. Avijjāsamphassajenāti avijjāsampayuttaphassato jātena. Apica manoti bhavaṅgakkhaṇe vipākamanodhātu, āvajjanakkhaṇe kiriyamanodhātu. Dhammādayo vuttappakārāva. Asmītipissa hotīti taṇhāmānadiṭṭhivasena asmīti evampissa hoti. Ito paresu ayamahamasmīti rūpādīsu kiñcideva dhammaṃ gahetvā ‘‘ayaṃ ahamasmī’’ti attadiṭṭhivasena vuttaṃ. Bhavissanti sassatadiṭṭhivasena. Na bhavissanti ucchedadiṭṭhivasena. Rūpī bhavissantiādīni sabbāni sassatameva bhajanti. Athetthāti atha tenevākārena ṭhitesu etesu indriyesu. Avijjā pahīyatīti catūsu saccesu aññāṇabhūtā avijjā pahīyati. Vijjā uppajjatīti arahattamaggavijjā uppajjati. Evamettha asmīti taṇhāmānadiṭṭhiyo. Kammassa pañcannañca indriyānaṃ antare eko sandhi, vipākamanaṃ pañcindriyapakkhikaṃ katvā pañcannañca indriyānaṃ kammassa ca antare eko sandhīti. Iti tayo papañcā atīto addhā, indriyādīni paccuppanno addhā, tattha kammamanaṃ ādiṃ katvā anāgatassa paccayo dassitoti. Pañcamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. ஸமனுபஸ்ஸனாஸுத்தங் • 5. Samanupassanāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. ஸமனுபஸ்ஸனாஸுத்தவண்ணனா • 5. Samanupassanāsuttavaṇṇanā
