| Library / Tipiṭaka / திபிடக • Tipiṭaka / கதா²வத்து²பாளி • Kathāvatthupāḷi |
13. தேரஸமவக்³கோ³
13. Terasamavaggo
(132) 7. ஸமாபன்னோ அஸ்ஸாதே³திகதா²
(132) 7. Samāpanno assādetikathā
671. ஸமாபன்னோ அஸ்ஸாதே³தி, ஜா²னநிகந்தி ஜா²னாரம்மணாதி? ஆமந்தா. தங் ஜா²னங் தஸ்ஸ ஜா²னஸ்ஸ ஆரம்மணந்தி? ந ஹேவங் வத்தப்³பே³…பே॰… தங் ஜா²னங் தஸ்ஸ ஜா²னஸ்ஸ ஆரம்மணந்தி? ஆமந்தா. தேன ப²ஸ்ஸேன தங் ப²ஸ்ஸங் பு²ஸதி, தாய வேத³னாய தங் வேத³னங் வேதே³தி, தாய ஸஞ்ஞாய தங் ஸஞ்ஞங் ஸஞ்ஜானாதி, தாய சேதனாய தங் சேதனங் சேதேதி, தேன சித்தேன தங் சித்தங் சிந்தேதி, தேன விதக்கேன தங் விதக்கங் விதக்கேதி, தேன விசாரேன தங் விசாரங் விசாரேதி , தாய பீதியா தங் பீதி பியாயதி, தாய ஸதியா தங் ஸதிங் ஸரதி, தாய பஞ்ஞாய தங் பஞ்ஞங் பஜானாதீதி? ந ஹேவங் வத்தப்³பே³…பே॰….
671. Samāpanno assādeti, jhānanikanti jhānārammaṇāti? Āmantā. Taṃ jhānaṃ tassa jhānassa ārammaṇanti? Na hevaṃ vattabbe…pe… taṃ jhānaṃ tassa jhānassa ārammaṇanti? Āmantā. Tena phassena taṃ phassaṃ phusati, tāya vedanāya taṃ vedanaṃ vedeti, tāya saññāya taṃ saññaṃ sañjānāti, tāya cetanāya taṃ cetanaṃ ceteti, tena cittena taṃ cittaṃ cinteti, tena vitakkena taṃ vitakkaṃ vitakketi, tena vicārena taṃ vicāraṃ vicāreti , tāya pītiyā taṃ pīti piyāyati, tāya satiyā taṃ satiṃ sarati, tāya paññāya taṃ paññaṃ pajānātīti? Na hevaṃ vattabbe…pe….
ஜா²னநிகந்தி சித்தஸம்பயுத்தா, ஜா²னங் சித்தஸம்பயுத்தந்தி? ஆமந்தா. த்³வின்னங் ப²ஸ்ஸானங்…பே॰… த்³வின்னங் சித்தானங் ஸமோதா⁴னங் ஹோதீதி? ந ஹேவங் வத்தப்³பே³…பே॰….
Jhānanikanti cittasampayuttā, jhānaṃ cittasampayuttanti? Āmantā. Dvinnaṃ phassānaṃ…pe… dvinnaṃ cittānaṃ samodhānaṃ hotīti? Na hevaṃ vattabbe…pe….
ஜா²னநிகந்தி அகுஸலங், ஜா²னங் குஸலந்தி? ஆமந்தா. குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வங் ஆக³ச்ச²ந்தீதி? ந ஹேவங் வத்தப்³பே³…பே॰….
Jhānanikanti akusalaṃ, jhānaṃ kusalanti? Āmantā. Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Na hevaṃ vattabbe…pe….
672. குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வங் ஆக³ச்ச²ந்தீதி? ஆமந்தா. நனு வுத்தங் ப⁴க³வதா – ‘‘சத்தாரிமானி, பி⁴க்க²வே, ஸுவிதூ³ரவிதூ³ரானி! கதமானி சத்தாரி? நப⁴ஞ்ச, பி⁴க்க²வே, பத²வீ ச – இத³ங் பட²மங் ஸுவிதூ³ரவிதூ³ரங்…பே॰… தஸ்மா ஸதங் த⁴ம்மோ அஸப்³பி⁴ ஆரகா’’தி. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ங் – ‘‘குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வங் ஆக³ச்ச²ந்தீ’’தி.
672. Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Āmantā. Nanu vuttaṃ bhagavatā – ‘‘cattārimāni, bhikkhave, suvidūravidūrāni! Katamāni cattāri? Nabhañca, bhikkhave, pathavī ca – idaṃ paṭhamaṃ suvidūravidūraṃ…pe… tasmā sataṃ dhammo asabbhi ārakā’’ti. Attheva suttantoti? Āmantā. Tena hi na vattabbaṃ – ‘‘kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantī’’ti.
673. ந வத்தப்³ப³ங் – ‘‘ஸமாபன்னோ அஸ்ஸாதே³தி, ஜா²னநிகந்தி ஜா²னாரம்மணா’’தி? ஆமந்தா. நனு வுத்தங் ப⁴க³வதா – ‘‘இத⁴, பி⁴க்க²வே, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி பட²மங் ஜா²னங் உபஸம்பஜ்ஜ விஹரதி, ஸோ தங் அஸ்ஸாதே³தி தங் நிகாமேதி தேன ச வித்திங் ஆபஜ்ஜதி; விதக்கவிசாரானங் வூபஸமா…பே॰… து³தியங் ஜா²னங்…பே॰… ததியங் ஜா²னங்…பே॰… சதுத்த²ங் ஜா²னங் உபஸம்பஜ்ஜ விஹரதி , ஸோ தங் அஸ்ஸாதே³தி தங் நிகாமேதி தேன ச வித்திங் ஆபஜ்ஜதீ’’தி 1! அத்தே²வ ஸுத்தந்தோதி? ஆமந்தா. தேன ஹி ஸமாபன்னோ அஸ்ஸாதே³தி, ஜா²னநிகந்தி ஜா²னாரம்மணாதி.
673. Na vattabbaṃ – ‘‘samāpanno assādeti, jhānanikanti jhānārammaṇā’’ti? Āmantā. Nanu vuttaṃ bhagavatā – ‘‘idha, bhikkhave, bhikkhu vivicceva kāmehi vivicca akusalehi dhammehi paṭhamaṃ jhānaṃ upasampajja viharati, so taṃ assādeti taṃ nikāmeti tena ca vittiṃ āpajjati; vitakkavicārānaṃ vūpasamā…pe… dutiyaṃ jhānaṃ…pe… tatiyaṃ jhānaṃ…pe… catutthaṃ jhānaṃ upasampajja viharati , so taṃ assādeti taṃ nikāmeti tena ca vittiṃ āpajjatī’’ti 2! Attheva suttantoti? Āmantā. Tena hi samāpanno assādeti, jhānanikanti jhānārammaṇāti.
ஸமாபன்னோ அஸ்ஸாதே³திகதா² நிட்டி²தா.
Samāpanno assādetikathā niṭṭhitā.
Footnotes:
Related texts:
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 7. ஸமாபன்னோ அஸ்ஸாதே³தீதிகதா²வண்ணனா • 7. Samāpanno assādetītikathāvaṇṇanā
