| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༡༣. ཏེརསམཝགྒོ
13. Terasamavaggo
(༡༣༢) ༧. སམཱཔནྣོ ཨསྶཱདེཏིཀཐཱ
(132) 7. Samāpanno assādetikathā
༦༧༡. སམཱཔནྣོ ཨསྶཱདེཏི, ཛྷཱནནིཀནྟི ཛྷཱནཱརམྨཎཱཏི? ཨཱམནྟཱ། ཏཾ ཛྷཱནཾ ཏསྶ ཛྷཱནསྶ ཨཱརམྨཎནྟི? ན ཧེཝཾ ཝཏྟབྦེ…པེ॰… ཏཾ ཛྷཱནཾ ཏསྶ ཛྷཱནསྶ ཨཱརམྨཎནྟི? ཨཱམནྟཱ། ཏེན ཕསྶེན ཏཾ ཕསྶཾ ཕུསཏི, ཏཱཡ ཝེདནཱཡ ཏཾ ཝེདནཾ ཝེདེཏི, ཏཱཡ སཉྙཱཡ ཏཾ སཉྙཾ སཉྫཱནཱཏི, ཏཱཡ ཙེཏནཱཡ ཏཾ ཙེཏནཾ ཙེཏེཏི, ཏེན ཙིཏྟེན ཏཾ ཙིཏྟཾ ཙིནྟེཏི, ཏེན ཝིཏཀྐེན ཏཾ ཝིཏཀྐཾ ཝིཏཀྐེཏི, ཏེན ཝིཙཱརེན ཏཾ ཝིཙཱརཾ ཝིཙཱརེཏི , ཏཱཡ པཱིཏིཡཱ ཏཾ པཱིཏི པིཡཱཡཏི, ཏཱཡ སཏིཡཱ ཏཾ སཏིཾ སརཏི, ཏཱཡ པཉྙཱཡ ཏཾ པཉྙཾ པཛཱནཱཏཱིཏི? ན ཧེཝཾ ཝཏྟབྦེ…པེ॰…།
671. Samāpanno assādeti, jhānanikanti jhānārammaṇāti? Āmantā. Taṃ jhānaṃ tassa jhānassa ārammaṇanti? Na hevaṃ vattabbe…pe… taṃ jhānaṃ tassa jhānassa ārammaṇanti? Āmantā. Tena phassena taṃ phassaṃ phusati, tāya vedanāya taṃ vedanaṃ vedeti, tāya saññāya taṃ saññaṃ sañjānāti, tāya cetanāya taṃ cetanaṃ ceteti, tena cittena taṃ cittaṃ cinteti, tena vitakkena taṃ vitakkaṃ vitakketi, tena vicārena taṃ vicāraṃ vicāreti , tāya pītiyā taṃ pīti piyāyati, tāya satiyā taṃ satiṃ sarati, tāya paññāya taṃ paññaṃ pajānātīti? Na hevaṃ vattabbe…pe….
ཛྷཱནནིཀནྟི ཙིཏྟསམྤཡུཏྟཱ, ཛྷཱནཾ ཙིཏྟསམྤཡུཏྟནྟི? ཨཱམནྟཱ། དྭིནྣཾ ཕསྶཱནཾ…པེ॰… དྭིནྣཾ ཙིཏྟཱནཾ སམོདྷཱནཾ ཧོཏཱིཏི? ན ཧེཝཾ ཝཏྟབྦེ…པེ॰…།
Jhānanikanti cittasampayuttā, jhānaṃ cittasampayuttanti? Āmantā. Dvinnaṃ phassānaṃ…pe… dvinnaṃ cittānaṃ samodhānaṃ hotīti? Na hevaṃ vattabbe…pe….
ཛྷཱནནིཀནྟི ཨཀུསལཾ, ཛྷཱནཾ ཀུསལནྟི? ཨཱམནྟཱ། ཀུསལཱཀུསལཱ སཱཝཛྫཱནཝཛྫཱ ཧཱིནཔཎཱིཏཱ ཀཎྷསུཀྐསཔྤཊིབྷཱགཱ དྷམྨཱ སམྨུཁཱིབྷཱཝཾ ཨཱགཙྪནྟཱིཏི? ན ཧེཝཾ ཝཏྟབྦེ…པེ॰…།
Jhānanikanti akusalaṃ, jhānaṃ kusalanti? Āmantā. Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Na hevaṃ vattabbe…pe….
༦༧༢. ཀུསལཱཀུསལཱ སཱཝཛྫཱནཝཛྫཱ ཧཱིནཔཎཱིཏཱ ཀཎྷསུཀྐསཔྤཊིབྷཱགཱ དྷམྨཱ སམྨུཁཱིབྷཱཝཾ ཨཱགཙྪནྟཱིཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘ཙཏྟཱརིམཱནི, བྷིཀྑཝེ, སུཝིདཱུརཝིདཱུརཱནི! ཀཏམཱནི ཙཏྟཱརི? ནབྷཉྩ, བྷིཀྑཝེ, པཐཝཱི ཙ – ཨིདཾ པཋམཾ སུཝིདཱུརཝིདཱུརཾ…པེ॰… ཏསྨཱ སཏཾ དྷམྨོ ཨསབྦྷི ཨཱརཀཱ’’ཏི། ཨཏྠེཝ སུཏྟནྟོཏི? ཨཱམནྟཱ། ཏེན ཧི ན ཝཏྟབྦཾ – ‘‘ཀུསལཱཀུསལཱ སཱཝཛྫཱནཝཛྫཱ ཧཱིནཔཎཱིཏཱ ཀཎྷསུཀྐསཔྤཊིབྷཱགཱ དྷམྨཱ སམྨུཁཱིབྷཱཝཾ ཨཱགཙྪནྟཱི’’ཏི།
672. Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Āmantā. Nanu vuttaṃ bhagavatā – ‘‘cattārimāni, bhikkhave, suvidūravidūrāni! Katamāni cattāri? Nabhañca, bhikkhave, pathavī ca – idaṃ paṭhamaṃ suvidūravidūraṃ…pe… tasmā sataṃ dhammo asabbhi ārakā’’ti. Attheva suttantoti? Āmantā. Tena hi na vattabbaṃ – ‘‘kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantī’’ti.
༦༧༣. ན ཝཏྟབྦཾ – ‘‘སམཱཔནྣོ ཨསྶཱདེཏི, ཛྷཱནནིཀནྟི ཛྷཱནཱརམྨཎཱ’’ཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘ཨིདྷ, བྷིཀྑཝེ, བྷིཀྑུ ཝིཝིཙྩེཝ ཀཱམེཧི ཝིཝིཙྩ ཨཀུསལེཧི དྷམྨེཧི པཋམཾ ཛྷཱནཾ ཨུཔསམྤཛྫ ཝིཧརཏི, སོ ཏཾ ཨསྶཱདེཏི ཏཾ ནིཀཱམེཏི ཏེན ཙ ཝིཏྟིཾ ཨཱཔཛྫཏི; ཝིཏཀྐཝིཙཱརཱནཾ ཝཱུཔསམཱ…པེ॰… དུཏིཡཾ ཛྷཱནཾ…པེ॰… ཏཏིཡཾ ཛྷཱནཾ…པེ॰… ཙཏུཏྠཾ ཛྷཱནཾ ཨུཔསམྤཛྫ ཝིཧརཏི , སོ ཏཾ ཨསྶཱདེཏི ཏཾ ནིཀཱམེཏི ཏེན ཙ ཝིཏྟིཾ ཨཱཔཛྫཏཱི’’ཏི 1! ཨཏྠེཝ སུཏྟནྟོཏི? ཨཱམནྟཱ། ཏེན ཧི སམཱཔནྣོ ཨསྶཱདེཏི, ཛྷཱནནིཀནྟི ཛྷཱནཱརམྨཎཱཏི།
673. Na vattabbaṃ – ‘‘samāpanno assādeti, jhānanikanti jhānārammaṇā’’ti? Āmantā. Nanu vuttaṃ bhagavatā – ‘‘idha, bhikkhave, bhikkhu vivicceva kāmehi vivicca akusalehi dhammehi paṭhamaṃ jhānaṃ upasampajja viharati, so taṃ assādeti taṃ nikāmeti tena ca vittiṃ āpajjati; vitakkavicārānaṃ vūpasamā…pe… dutiyaṃ jhānaṃ…pe… tatiyaṃ jhānaṃ…pe… catutthaṃ jhānaṃ upasampajja viharati , so taṃ assādeti taṃ nikāmeti tena ca vittiṃ āpajjatī’’ti 2! Attheva suttantoti? Āmantā. Tena hi samāpanno assādeti, jhānanikanti jhānārammaṇāti.
སམཱཔནྣོ ཨསྶཱདེཏིཀཐཱ ནིཊྛིཏཱ།
Samāpanno assādetikathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༧. སམཱཔནྣོ ཨསྶཱདེཏཱིཏིཀཐཱཝཎྞནཱ • 7. Samāpanno assādetītikathāvaṇṇanā
