| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
19. ஸமாபத்திமூலகஸப்பாயகாரீஸுத்தங்
19. Samāpattimūlakasappāyakārīsuttaṃ
680. ஸாவத்தி²னிதா³னங் . ‘‘சத்தாரோமே, பி⁴க்க²வே, ஜா²யீ. கதமே சத்தாரோ? இத⁴ , பி⁴க்க²வே, ஏகச்சோ ஜா²யீ ஸமாதி⁴ஸ்மிங் ஸமாபத்திகுஸலோ ஹோதி, ந ஸமாதி⁴ஸ்மிங் ஸப்பாயகாரீ. இத⁴ பன, பி⁴க்க²வே, ஏகச்சோ ஜா²யீ ஸமாதி⁴ஸ்மிங் ஸப்பாயகாரீ ஹோதி, ந ஸமாதி⁴ஸ்மிங் ஸமாபத்திகுஸலோ. இத⁴ பன, பி⁴க்க²வே, ஏகச்சோ ஜா²யீ நேவ ஸமாதி⁴ஸ்மிங் ஸமாபத்திகுஸலோ ஹோதி, ந ச ஸமாதி⁴ஸ்மிங் ஸப்பாயகாரீ. இத⁴ பன, பி⁴க்க²வே, ஏகச்சோ ஜா²யீ ஸமாதி⁴ஸ்மிங் ஸமாபத்திகுஸலோ ச ஹோதி, ஸமாதி⁴ஸ்மிங் ஸப்பாயகாரீ ச. தத்ர, பி⁴க்க²வே, ய்வாயங் ஜா²யீ ஸமாதி⁴ஸ்மிங் ஸமாபத்திகுஸலோ ச ஹோதி ஸமாதி⁴ஸ்மிங் ஸப்பாயகாரீ ச அயங் இமேஸங் சதுன்னங் ஜா²யீனங் அக்³கோ³ ச ஸெட்டோ² ச மொக்கோ² ச உத்தமோ ச பவரோ ச. ஸெய்யதா²பி, பி⁴க்க²வே, க³வா கீ²ரங், கீ²ரம்ஹா த³தி⁴, த³தி⁴ம்ஹா நவனீதங், நவனீதம்ஹா ஸப்பி, ஸப்பிம்ஹா ஸப்பிமண்டோ³ தத்ர அக்³க³மக்கா²யதி; ஏவமேவ கோ², பி⁴க்க²வே, ய்வாயங் ஜா²யீ ஸமாதி⁴ஸ்மிங் ஸமாபத்திகுஸலோ ச ஹோதி ஸமாதி⁴ஸ்மிங் ஸப்பாயகாரீ ச அயங் இமேஸங் சதுன்னங் ஜா²யீனங் அக்³கோ³ ச ஸெட்டோ² ச மொக்கோ² ச உத்தமோ ச பவரோ சா’’தி. ஏகூனவீஸதிமங். (ஸமாபத்திமூலகங்.)
680. Sāvatthinidānaṃ . ‘‘Cattārome, bhikkhave, jhāyī. Katame cattāro? Idha , bhikkhave, ekacco jhāyī samādhismiṃ samāpattikusalo hoti, na samādhismiṃ sappāyakārī. Idha pana, bhikkhave, ekacco jhāyī samādhismiṃ sappāyakārī hoti, na samādhismiṃ samāpattikusalo. Idha pana, bhikkhave, ekacco jhāyī neva samādhismiṃ samāpattikusalo hoti, na ca samādhismiṃ sappāyakārī. Idha pana, bhikkhave, ekacco jhāyī samādhismiṃ samāpattikusalo ca hoti, samādhismiṃ sappāyakārī ca. Tatra, bhikkhave, yvāyaṃ jhāyī samādhismiṃ samāpattikusalo ca hoti samādhismiṃ sappāyakārī ca ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro ca. Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo tatra aggamakkhāyati; evameva kho, bhikkhave, yvāyaṃ jhāyī samādhismiṃ samāpattikusalo ca hoti samādhismiṃ sappāyakārī ca ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro cā’’ti. Ekūnavīsatimaṃ. (Samāpattimūlakaṃ.)
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2-55. ஸமாதி⁴மூலகடி²திஸுத்தாதி³வண்ணனா • 2-55. Samādhimūlakaṭhitisuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2-55. ஸமாதி⁴மூலகடி²திஸுத்தாதி³வண்ணனா • 2-55. Samādhimūlakaṭhitisuttādivaṇṇanā
