Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya

    ༦. སམཱཔཏྟིསུཏྟཾ

    6. Samāpattisuttaṃ

    ༦. ‘‘ན ཏཱཝ, བྷིཀྑཝེ, ཨཀུསལསྶ སམཱཔཏྟི ཧོཏི ཡཱཝ སདྡྷཱ པཙྩུཔཊྛིཏཱ ཧོཏི ཀུསལེསུ དྷམྨེསུ། ཡཏོ ཙ ཁོ, བྷིཀྑཝེ, སདྡྷཱ ཨནྟརཧིཏཱ ཧོཏི, ཨསདྡྷིཡཾ པརིཡུཊྛཱཡ ཏིཊྛཏི; ཨཐ ཨཀུསལསྶ སམཱཔཏྟི ཧོཏི།

    6. ‘‘Na tāva, bhikkhave, akusalassa samāpatti hoti yāva saddhā paccupaṭṭhitā hoti kusalesu dhammesu. Yato ca kho, bhikkhave, saddhā antarahitā hoti, asaddhiyaṃ pariyuṭṭhāya tiṭṭhati; atha akusalassa samāpatti hoti.

    ‘‘ན ཏཱཝ, བྷིཀྑཝེ, ཨཀུསལསྶ སམཱཔཏྟི ཧོཏི ཡཱཝ ཧིརཱི པཙྩུཔཊྛིཏཱ ཧོཏི ཀུསལེསུ དྷམྨེསུ། ཡཏོ ཙ ཁོ, བྷིཀྑཝེ, ཧིརཱི ཨནྟརཧིཏཱ ཧོཏི, ཨཧིརིཀཾ པརིཡུཊྛཱཡ ཏིཊྛཏི; ཨཐ ཨཀུསལསྶ སམཱཔཏྟི ཧོཏི།

    ‘‘Na tāva, bhikkhave, akusalassa samāpatti hoti yāva hirī paccupaṭṭhitā hoti kusalesu dhammesu. Yato ca kho, bhikkhave, hirī antarahitā hoti, ahirikaṃ pariyuṭṭhāya tiṭṭhati; atha akusalassa samāpatti hoti.

    ‘‘ན ཏཱཝ, བྷིཀྑཝེ, ཨཀུསལསྶ སམཱཔཏྟི ཧོཏི ཡཱཝ ཨོཏྟཔྤཾ པཙྩུཔཊྛིཏཾ ཧོཏི ཀུསལེསུ དྷམྨེསུ། ཡཏོ ཙ ཁོ, བྷིཀྑཝེ, ཨོཏྟཔྤཾ ཨནྟརཧིཏཾ ཧོཏི, ཨནོཏྟཔྤཾ པརིཡུཊྛཱཡ ཏིཊྛཏི; ཨཐ ཨཀུསལསྶ སམཱཔཏྟི ཧོཏི།

    ‘‘Na tāva, bhikkhave, akusalassa samāpatti hoti yāva ottappaṃ paccupaṭṭhitaṃ hoti kusalesu dhammesu. Yato ca kho, bhikkhave, ottappaṃ antarahitaṃ hoti, anottappaṃ pariyuṭṭhāya tiṭṭhati; atha akusalassa samāpatti hoti.

    ‘‘ན ཏཱཝ, བྷིཀྑཝེ, ཨཀུསལསྶ སམཱཔཏྟི ཧོཏི ཡཱཝ ཝཱིརིཡཾ པཙྩུཔཊྛིཏཾ ཧོཏི ཀུསལེསུ དྷམྨེསུ། ཡཏོ ཙ ཁོ, བྷིཀྑཝེ, ཝཱིརིཡཾ ཨནྟརཧིཏཾ ཧོཏི, ཀོསཛྫཾ པརིཡུཊྛཱཡ ཏིཊྛཏི; ཨཐ ཨཀུསལསྶ སམཱཔཏྟི ཧོཏི།

    ‘‘Na tāva, bhikkhave, akusalassa samāpatti hoti yāva vīriyaṃ paccupaṭṭhitaṃ hoti kusalesu dhammesu. Yato ca kho, bhikkhave, vīriyaṃ antarahitaṃ hoti, kosajjaṃ pariyuṭṭhāya tiṭṭhati; atha akusalassa samāpatti hoti.

    ‘‘ན ཏཱཝ, བྷིཀྑཝེ, ཨཀུསལསྶ སམཱཔཏྟི ཧོཏི ཡཱཝ པཉྙཱ པཙྩུཔཊྛིཏཱ ཧོཏི ཀུསལེསུ དྷམྨེསུ། ཡཏོ ཙ ཁོ, བྷིཀྑཝེ, པཉྙཱ ཨནྟརཧིཏཱ ཧོཏི, དུཔྤཉྙཱ 1 པརིཡུཊྛཱཡ ཏིཊྛཏི; ཨཐ ཨཀུསལསྶ སམཱཔཏྟི ཧོཏཱི’’ཏི། ཚཊྛཾ།

    ‘‘Na tāva, bhikkhave, akusalassa samāpatti hoti yāva paññā paccupaṭṭhitā hoti kusalesu dhammesu. Yato ca kho, bhikkhave, paññā antarahitā hoti, duppaññā 2 pariyuṭṭhāya tiṭṭhati; atha akusalassa samāpatti hotī’’ti. Chaṭṭhaṃ.




    Next: ༧. ཀཱམསུཏྟཾ • 7. Kāmasuttaṃ




    Footnotes:
    1. དུཔྤཉྙཾ (ཀ॰)
    2. duppaññaṃ (ka.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༦. སམཱཔཏྟིསུཏྟཝཎྞནཱ • 6. Samāpattisuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༦. མཧཱསུཔིནསུཏྟཝཎྞནཱ • 6. Mahāsupinasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact