| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
(15) 5. ஸமாபத்திவக்³க³வண்ணனா
(15) 5. Samāpattivaggavaṇṇanā
164. பஞ்சமஸ்ஸ பட²மே ஸமாபத்திகுஸலதாதி ஆஹாரஸப்பாயங் உதுஸப்பாயங் பரிக்³க³ண்ஹித்வா ஸமாபத்திஸமாபஜ்ஜனே சே²கதா. ஸமாபத்திவுட்டா²னகுஸலதாதி யதா²பரிச்சே²தே³ன க³தே காலே வியத்தோ ஹுத்வா உட்ட²ஹந்தோ வுட்டா²னகுஸலோ நாம ஹோதி, ஏவங் குஸலதா.
164. Pañcamassa paṭhame samāpattikusalatāti āhārasappāyaṃ utusappāyaṃ pariggaṇhitvā samāpattisamāpajjane chekatā. Samāpattivuṭṭhānakusalatāti yathāparicchedena gate kāle viyatto hutvā uṭṭhahanto vuṭṭhānakusalo nāma hoti, evaṃ kusalatā.
165. து³தியே அஜ்ஜவந்தி உஜுபா⁴வோ. மத்³த³வந்தி முது³பா⁴வோ.
165. Dutiye ajjavanti ujubhāvo. Maddavanti mudubhāvo.
166. ததியே க²ந்தீதி அதி⁴வாஸனக²ந்தி. ஸோரச்சந்தி ஸுஸீல்யபா⁴வேன ஸுரதபா⁴வோ.
166. Tatiye khantīti adhivāsanakhanti. Soraccanti susīlyabhāvena suratabhāvo.
167. சதுத்தே² ஸாக²ல்யந்தி ஸண்ஹவாசாவஸேன ஸம்மோத³மானபா⁴வோ. படிஸந்தா²ரோதி ஆமிஸேன வா த⁴ம்மேன வா படிஸந்த²ரணங்.
167. Catutthe sākhalyanti saṇhavācāvasena sammodamānabhāvo. Paṭisanthāroti āmisena vā dhammena vā paṭisantharaṇaṃ.
168. பஞ்சமே அவிஹிங்ஸாதி கருணாபுப்³ப³பா⁴கோ³. ஸோசெய்யந்தி ஸீலவஸேன ஸுசிபா⁴வோ. ச²ட்ட²ஸத்தமானி உத்தானத்தா²னேவ.
168. Pañcame avihiṃsāti karuṇāpubbabhāgo. Soceyyanti sīlavasena sucibhāvo. Chaṭṭhasattamāni uttānatthāneva.
171. அட்ட²மே படிஸங்கா²னப³லந்தி பச்சவெக்க²ணப³லங்.
171. Aṭṭhame paṭisaṅkhānabalanti paccavekkhaṇabalaṃ.
172. நவமே முட்ட²ஸ்ஸச்சே அகம்பனேன ஸதியேவ ஸதிப³லங். உத்³த⁴ச்சே அகம்பனேன ஸமாதி⁴யேவ ஸமாதி⁴ப³லங்.
172. Navame muṭṭhassacce akampanena satiyeva satibalaṃ. Uddhacce akampanena samādhiyeva samādhibalaṃ.
173. த³ஸமே ஸமதோ²தி சித்தேகக்³க³தா. விபஸ்ஸனாதி ஸங்கா²ரபரிக்³கா³ஹகஞ்ஞாணங்.
173. Dasame samathoti cittekaggatā. Vipassanāti saṅkhārapariggāhakaññāṇaṃ.
174. ஏகாத³ஸமே ஸீலவிபத்தீதி து³ஸ்ஸீல்யங். தி³ட்டி²விபத்தீதி மிச்சா²தி³ட்டி².
174. Ekādasame sīlavipattīti dussīlyaṃ. Diṭṭhivipattīti micchādiṭṭhi.
175. த்³வாத³ஸமே ஸீலஸம்பதா³தி பரிபுண்ணஸீலதா. தி³ட்டி²ஸம்பதா³தி ஸம்மாதி³ட்டி²கபா⁴வோ. தேன கம்மஸ்ஸகதஸம்மாதி³ட்டி², ஜா²னஸம்மாதி³ட்டி², விபஸ்ஸனாஸம்மாதி³ட்டி², மக்³க³ஸம்மாதி³ட்டி², ப²லஸம்மாதி³ட்டீ²தி ஸப்³பா³பி பஞ்சவிதா⁴ ஸம்மாதி³ட்டி² ஸங்க³ஹிதா ஹோதி.
175. Dvādasame sīlasampadāti paripuṇṇasīlatā. Diṭṭhisampadāti sammādiṭṭhikabhāvo. Tena kammassakatasammādiṭṭhi, jhānasammādiṭṭhi, vipassanāsammādiṭṭhi, maggasammādiṭṭhi, phalasammādiṭṭhīti sabbāpi pañcavidhā sammādiṭṭhi saṅgahitā hoti.
176. தேரஸமே ஸீலவிஸுத்³தீ⁴தி விஸுத்³தி⁴ஸம்பாபகங் ஸீலங். தி³ட்டி²விஸுத்³தீ⁴தி விஸுத்³தி⁴ஸம்பாபிகா சதுமக்³க³ஸம்மாதி³ட்டி², பஞ்சவிதா⁴பி வா ஸம்மாதி³ட்டி².
176. Terasame sīlavisuddhīti visuddhisampāpakaṃ sīlaṃ. Diṭṭhivisuddhīti visuddhisampāpikā catumaggasammādiṭṭhi, pañcavidhāpi vā sammādiṭṭhi.
177. சுத்³த³ஸமே தி³ட்டி²விஸுத்³தீ⁴தி விஸுத்³தி⁴ஸம்பாபிகா ஸம்மாதி³ட்டி²யேவ. யதா²தி³ட்டி²ஸ்ஸ ச பதா⁴னந்தி ஹெட்டி²மமக்³க³ஸம்பயுத்தங் வீரியங். தஞ்ஹி தஸ்ஸா தி³ட்டி²யா அனுரூபத்தா ‘‘யதா²தி³ட்டி²ஸ்ஸ ச பதா⁴ன’’ந்தி வுத்தங்.
177. Cuddasame diṭṭhivisuddhīti visuddhisampāpikā sammādiṭṭhiyeva. Yathādiṭṭhissa ca padhānanti heṭṭhimamaggasampayuttaṃ vīriyaṃ. Tañhi tassā diṭṭhiyā anurūpattā ‘‘yathādiṭṭhissa ca padhāna’’nti vuttaṃ.
178. பன்னரஸமே அஸந்துட்டி²தா ச குஸலேஸு த⁴ம்மேஸூதி அஞ்ஞத்ர அரஹத்தமக்³கா³ குஸலேஸு த⁴ம்மேஸு அஸந்துட்டி²பா⁴வோ.
178. Pannarasame asantuṭṭhitā ca kusalesu dhammesūti aññatra arahattamaggā kusalesu dhammesu asantuṭṭhibhāvo.
179. ஸோளஸமே முட்ட²ஸ்ஸச்சந்தி முட்ட²ஸ்ஸதிபா⁴வோ. அஸம்பஜஞ்ஞந்தி அஞ்ஞாணபா⁴வோ.
179. Soḷasame muṭṭhassaccanti muṭṭhassatibhāvo. Asampajaññanti aññāṇabhāvo.
180. ஸத்தரஸமே அபிலாபனலக்க²ணா ஸதி. ஸம்மா பஜானநலக்க²ணங் ஸம்பஜஞ்ஞந்தி.
180. Sattarasame apilāpanalakkhaṇā sati. Sammā pajānanalakkhaṇaṃ sampajaññanti.
ஸமாபத்திவக்³கோ³ பஞ்சமோ. ததியபண்ணாஸகங் நிட்டி²தங்.
Samāpattivaggo pañcamo. Tatiyapaṇṇāsakaṃ niṭṭhitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / (15) 5. ஸமாபத்திவக்³கோ³ • (15) 5. Samāpattivaggo
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / (15) 5. ஸமாபத்திவக்³க³வண்ணனா • (15) 5. Samāpattivaggavaṇṇanā
