| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
(১৫) ৫. সমাপত্তিৰগ্গৰণ্ণনা
(15) 5. Samāpattivaggavaṇṇanā
১৬৪. পঞ্চমস্স পঠমে সমাপত্তিকুসলতাতি আহারসপ্পাযং উতুসপ্পাযং পরিগ্গণ্হিত্ৰা সমাপত্তিসমাপজ্জনে ছেকতা। সমাপত্তিৰুট্ঠানকুসলতাতি যথাপরিচ্ছেদেন গতে কালে ৰিযত্তো হুত্ৰা উট্ঠহন্তো ৰুট্ঠানকুসলো নাম হোতি, এৰং কুসলতা।
164. Pañcamassa paṭhame samāpattikusalatāti āhārasappāyaṃ utusappāyaṃ pariggaṇhitvā samāpattisamāpajjane chekatā. Samāpattivuṭṭhānakusalatāti yathāparicchedena gate kāle viyatto hutvā uṭṭhahanto vuṭṭhānakusalo nāma hoti, evaṃ kusalatā.
১৬৫. দুতিযে অজ্জৰন্তি উজুভাৰো। মদ্দৰন্তি মুদুভাৰো।
165. Dutiye ajjavanti ujubhāvo. Maddavanti mudubhāvo.
১৬৬. ততিযে খন্তীতি অধিৰাসনখন্তি। সোরচ্চন্তি সুসীল্যভাৰেন সুরতভাৰো।
166. Tatiye khantīti adhivāsanakhanti. Soraccanti susīlyabhāvena suratabhāvo.
১৬৭. চতুত্থে সাখল্যন্তি সণ্হৰাচাৰসেন সম্মোদমানভাৰো। পটিসন্থারোতি আমিসেন ৰা ধম্মেন ৰা পটিসন্থরণং।
167. Catutthe sākhalyanti saṇhavācāvasena sammodamānabhāvo. Paṭisanthāroti āmisena vā dhammena vā paṭisantharaṇaṃ.
১৬৮. পঞ্চমে অৰিহিংসাতি করুণাপুব্বভাগো। সোচেয্যন্তি সীলৰসেন সুচিভাৰো। ছট্ঠসত্তমানি উত্তানত্থানেৰ।
168. Pañcame avihiṃsāti karuṇāpubbabhāgo. Soceyyanti sīlavasena sucibhāvo. Chaṭṭhasattamāni uttānatthāneva.
১৭১. অট্ঠমে পটিসঙ্খানবলন্তি পচ্চৰেক্খণবলং।
171. Aṭṭhame paṭisaṅkhānabalanti paccavekkhaṇabalaṃ.
১৭২. নৰমে মুট্ঠস্সচ্চে অকম্পনেন সতিযেৰ সতিবলং। উদ্ধচ্চে অকম্পনেন সমাধিযেৰ সমাধিবলং।
172. Navame muṭṭhassacce akampanena satiyeva satibalaṃ. Uddhacce akampanena samādhiyeva samādhibalaṃ.
১৭৩. দসমে সমথোতি চিত্তেকগ্গতা। ৰিপস্সনাতি সঙ্খারপরিগ্গাহকঞ্ঞাণং।
173. Dasame samathoti cittekaggatā. Vipassanāti saṅkhārapariggāhakaññāṇaṃ.
১৭৪. একাদসমে সীলৰিপত্তীতি দুস্সীল্যং। দিট্ঠিৰিপত্তীতি মিচ্ছাদিট্ঠি।
174. Ekādasame sīlavipattīti dussīlyaṃ. Diṭṭhivipattīti micchādiṭṭhi.
১৭৫. দ্ৰাদসমে সীলসম্পদাতি পরিপুণ্ণসীলতা। দিট্ঠিসম্পদাতি সম্মাদিট্ঠিকভাৰো। তেন কম্মস্সকতসম্মাদিট্ঠি, ঝানসম্মাদিট্ঠি, ৰিপস্সনাসম্মাদিট্ঠি, মগ্গসম্মাদিট্ঠি, ফলসম্মাদিট্ঠীতি সব্বাপি পঞ্চৰিধা সম্মাদিট্ঠি সঙ্গহিতা হোতি।
175. Dvādasame sīlasampadāti paripuṇṇasīlatā. Diṭṭhisampadāti sammādiṭṭhikabhāvo. Tena kammassakatasammādiṭṭhi, jhānasammādiṭṭhi, vipassanāsammādiṭṭhi, maggasammādiṭṭhi, phalasammādiṭṭhīti sabbāpi pañcavidhā sammādiṭṭhi saṅgahitā hoti.
১৭৬. তেরসমে সীলৰিসুদ্ধীতি ৰিসুদ্ধিসম্পাপকং সীলং। দিট্ঠিৰিসুদ্ধীতি ৰিসুদ্ধিসম্পাপিকা চতুমগ্গসম্মাদিট্ঠি, পঞ্চৰিধাপি ৰা সম্মাদিট্ঠি।
176. Terasame sīlavisuddhīti visuddhisampāpakaṃ sīlaṃ. Diṭṭhivisuddhīti visuddhisampāpikā catumaggasammādiṭṭhi, pañcavidhāpi vā sammādiṭṭhi.
১৭৭. চুদ্দসমে দিট্ঠিৰিসুদ্ধীতি ৰিসুদ্ধিসম্পাপিকা সম্মাদিট্ঠিযেৰ। যথাদিট্ঠিস্স চ পধানন্তি হেট্ঠিমমগ্গসম্পযুত্তং ৰীরিযং। তঞ্হি তস্সা দিট্ঠিযা অনুরূপত্তা ‘‘যথাদিট্ঠিস্স চ পধান’’ন্তি ৰুত্তং।
177. Cuddasame diṭṭhivisuddhīti visuddhisampāpikā sammādiṭṭhiyeva. Yathādiṭṭhissa ca padhānanti heṭṭhimamaggasampayuttaṃ vīriyaṃ. Tañhi tassā diṭṭhiyā anurūpattā ‘‘yathādiṭṭhissa ca padhāna’’nti vuttaṃ.
১৭৮. পন্নরসমে অসন্তুট্ঠিতা চ কুসলেসু ধম্মেসূতি অঞ্ঞত্র অরহত্তমগ্গা কুসলেসু ধম্মেসু অসন্তুট্ঠিভাৰো।
178. Pannarasame asantuṭṭhitā ca kusalesu dhammesūti aññatra arahattamaggā kusalesu dhammesu asantuṭṭhibhāvo.
১৭৯. সোল়সমে মুট্ঠস্সচ্চন্তি মুট্ঠস্সতিভাৰো। অসম্পজঞ্ঞন্তি অঞ্ঞাণভাৰো।
179. Soḷasame muṭṭhassaccanti muṭṭhassatibhāvo. Asampajaññanti aññāṇabhāvo.
১৮০. সত্তরসমে অপিলাপনলক্খণা সতি। সম্মা পজাননলক্খণং সম্পজঞ্ঞন্তি।
180. Sattarasame apilāpanalakkhaṇā sati. Sammā pajānanalakkhaṇaṃ sampajaññanti.
সমাপত্তিৰগ্গো পঞ্চমো। ততিযপণ্ণাসকং নিট্ঠিতং।
Samāpattivaggo pañcamo. Tatiyapaṇṇāsakaṃ niṭṭhitaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / (১৫) ৫. সমাপত্তিৰগ্গো • (15) 5. Samāpattivaggo
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / (১৫) ৫. সমাপত্তিৰগ্গৰণ্ণনা • (15) 5. Samāpattivaggavaṇṇanā
