| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
(१५) ५. समापत्तिवग्गवण्णना
(15) 5. Samāpattivaggavaṇṇanā
१६४. पञ्चमस्स पठमे समापत्तिकुसलताति आहारसप्पायं उतुसप्पायं परिग्गण्हित्वा समापत्तिसमापज्जने छेकता। समापत्तिवुट्ठानकुसलताति यथापरिच्छेदेन गते काले वियत्तो हुत्वा उट्ठहन्तो वुट्ठानकुसलो नाम होति, एवं कुसलता।
164. Pañcamassa paṭhame samāpattikusalatāti āhārasappāyaṃ utusappāyaṃ pariggaṇhitvā samāpattisamāpajjane chekatā. Samāpattivuṭṭhānakusalatāti yathāparicchedena gate kāle viyatto hutvā uṭṭhahanto vuṭṭhānakusalo nāma hoti, evaṃ kusalatā.
१६५. दुतिये अज्जवन्ति उजुभावो। मद्दवन्ति मुदुभावो।
165. Dutiye ajjavanti ujubhāvo. Maddavanti mudubhāvo.
१६६. ततिये खन्तीति अधिवासनखन्ति। सोरच्चन्ति सुसील्यभावेन सुरतभावो।
166. Tatiye khantīti adhivāsanakhanti. Soraccanti susīlyabhāvena suratabhāvo.
१६७. चतुत्थे साखल्यन्ति सण्हवाचावसेन सम्मोदमानभावो। पटिसन्थारोति आमिसेन वा धम्मेन वा पटिसन्थरणं।
167. Catutthe sākhalyanti saṇhavācāvasena sammodamānabhāvo. Paṭisanthāroti āmisena vā dhammena vā paṭisantharaṇaṃ.
१६८. पञ्चमे अविहिंसाति करुणापुब्बभागो। सोचेय्यन्ति सीलवसेन सुचिभावो। छट्ठसत्तमानि उत्तानत्थानेव।
168. Pañcame avihiṃsāti karuṇāpubbabhāgo. Soceyyanti sīlavasena sucibhāvo. Chaṭṭhasattamāni uttānatthāneva.
१७१. अट्ठमे पटिसङ्खानबलन्ति पच्चवेक्खणबलं।
171. Aṭṭhame paṭisaṅkhānabalanti paccavekkhaṇabalaṃ.
१७२. नवमे मुट्ठस्सच्चे अकम्पनेन सतियेव सतिबलं। उद्धच्चे अकम्पनेन समाधियेव समाधिबलं।
172. Navame muṭṭhassacce akampanena satiyeva satibalaṃ. Uddhacce akampanena samādhiyeva samādhibalaṃ.
१७३. दसमे समथोति चित्तेकग्गता। विपस्सनाति सङ्खारपरिग्गाहकञ्ञाणं।
173. Dasame samathoti cittekaggatā. Vipassanāti saṅkhārapariggāhakaññāṇaṃ.
१७४. एकादसमे सीलविपत्तीति दुस्सील्यं। दिट्ठिविपत्तीति मिच्छादिट्ठि।
174. Ekādasame sīlavipattīti dussīlyaṃ. Diṭṭhivipattīti micchādiṭṭhi.
१७५. द्वादसमे सीलसम्पदाति परिपुण्णसीलता। दिट्ठिसम्पदाति सम्मादिट्ठिकभावो। तेन कम्मस्सकतसम्मादिट्ठि, झानसम्मादिट्ठि, विपस्सनासम्मादिट्ठि, मग्गसम्मादिट्ठि, फलसम्मादिट्ठीति सब्बापि पञ्चविधा सम्मादिट्ठि सङ्गहिता होति।
175. Dvādasame sīlasampadāti paripuṇṇasīlatā. Diṭṭhisampadāti sammādiṭṭhikabhāvo. Tena kammassakatasammādiṭṭhi, jhānasammādiṭṭhi, vipassanāsammādiṭṭhi, maggasammādiṭṭhi, phalasammādiṭṭhīti sabbāpi pañcavidhā sammādiṭṭhi saṅgahitā hoti.
१७६. तेरसमे सीलविसुद्धीति विसुद्धिसम्पापकं सीलं। दिट्ठिविसुद्धीति विसुद्धिसम्पापिका चतुमग्गसम्मादिट्ठि, पञ्चविधापि वा सम्मादिट्ठि।
176. Terasame sīlavisuddhīti visuddhisampāpakaṃ sīlaṃ. Diṭṭhivisuddhīti visuddhisampāpikā catumaggasammādiṭṭhi, pañcavidhāpi vā sammādiṭṭhi.
१७७. चुद्दसमे दिट्ठिविसुद्धीति विसुद्धिसम्पापिका सम्मादिट्ठियेव। यथादिट्ठिस्स च पधानन्ति हेट्ठिममग्गसम्पयुत्तं वीरियं। तञ्हि तस्सा दिट्ठिया अनुरूपत्ता ‘‘यथादिट्ठिस्स च पधान’’न्ति वुत्तं।
177. Cuddasame diṭṭhivisuddhīti visuddhisampāpikā sammādiṭṭhiyeva. Yathādiṭṭhissa ca padhānanti heṭṭhimamaggasampayuttaṃ vīriyaṃ. Tañhi tassā diṭṭhiyā anurūpattā ‘‘yathādiṭṭhissa ca padhāna’’nti vuttaṃ.
१७८. पन्नरसमे असन्तुट्ठिता च कुसलेसु धम्मेसूति अञ्ञत्र अरहत्तमग्गा कुसलेसु धम्मेसु असन्तुट्ठिभावो।
178. Pannarasame asantuṭṭhitā ca kusalesu dhammesūti aññatra arahattamaggā kusalesu dhammesu asantuṭṭhibhāvo.
१७९. सोळसमे मुट्ठस्सच्चन्ति मुट्ठस्सतिभावो। असम्पजञ्ञन्ति अञ्ञाणभावो।
179. Soḷasame muṭṭhassaccanti muṭṭhassatibhāvo. Asampajaññanti aññāṇabhāvo.
१८०. सत्तरसमे अपिलापनलक्खणा सति। सम्मा पजाननलक्खणं सम्पजञ्ञन्ति।
180. Sattarasame apilāpanalakkhaṇā sati. Sammā pajānanalakkhaṇaṃ sampajaññanti.
समापत्तिवग्गो पञ्चमो। ततियपण्णासकं निट्ठितं।
Samāpattivaggo pañcamo. Tatiyapaṇṇāsakaṃ niṭṭhitaṃ.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / (१५) ५. समापत्तिवग्गो • (15) 5. Samāpattivaggo
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / (१५) ५. समापत्तिवग्गवण्णना • (15) 5. Samāpattivaggavaṇṇanā
