| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
(១៥) ៥. សមាបត្តិវគ្គវណ្ណនា
(15) 5. Samāpattivaggavaṇṇanā
១៦៤. បញ្ចមស្ស បឋមេ សមាបត្តិកុសលតាតិ អាហារសប្បាយំ ឧតុសប្បាយំ បរិគ្គណ្ហិត្វា សមាបត្តិសមាបជ្ជនេ ឆេកតា។ សមាបត្តិវុដ្ឋានកុសលតាតិ យថាបរិច្ឆេទេន គតេ កាលេ វិយត្តោ ហុត្វា ឧដ្ឋហន្តោ វុដ្ឋានកុសលោ នាម ហោតិ, ឯវំ កុសលតា។
164. Pañcamassa paṭhame samāpattikusalatāti āhārasappāyaṃ utusappāyaṃ pariggaṇhitvā samāpattisamāpajjane chekatā. Samāpattivuṭṭhānakusalatāti yathāparicchedena gate kāle viyatto hutvā uṭṭhahanto vuṭṭhānakusalo nāma hoti, evaṃ kusalatā.
១៦៥. ទុតិយេ អជ្ជវន្តិ ឧជុភាវោ។ មទ្ទវន្តិ មុទុភាវោ។
165. Dutiye ajjavanti ujubhāvo. Maddavanti mudubhāvo.
១៦៦. តតិយេ ខន្តីតិ អធិវាសនខន្តិ។ សោរច្ចន្តិ សុសីល្យភាវេន សុរតភាវោ។
166. Tatiye khantīti adhivāsanakhanti. Soraccanti susīlyabhāvena suratabhāvo.
១៦៧. ចតុត្ថេ សាខល្យន្តិ សណ្ហវាចាវសេន សម្មោទមានភាវោ។ បដិសន្ថារោតិ អាមិសេន វា ធម្មេន វា បដិសន្ថរណំ។
167. Catutthe sākhalyanti saṇhavācāvasena sammodamānabhāvo. Paṭisanthāroti āmisena vā dhammena vā paṭisantharaṇaṃ.
១៦៨. បញ្ចមេ អវិហិំសាតិ ករុណាបុព្ពភាគោ។ សោចេយ្យន្តិ សីលវសេន សុចិភាវោ។ ឆដ្ឋសត្តមានិ ឧត្តានត្ថានេវ។
168. Pañcame avihiṃsāti karuṇāpubbabhāgo. Soceyyanti sīlavasena sucibhāvo. Chaṭṭhasattamāni uttānatthāneva.
១៧១. អដ្ឋមេ បដិសង្ខានពលន្តិ បច្ចវេក្ខណពលំ។
171. Aṭṭhame paṭisaṅkhānabalanti paccavekkhaṇabalaṃ.
១៧២. នវមេ មុដ្ឋស្សច្ចេ អកម្បនេន សតិយេវ សតិពលំ។ ឧទ្ធច្ចេ អកម្បនេន សមាធិយេវ សមាធិពលំ។
172. Navame muṭṭhassacce akampanena satiyeva satibalaṃ. Uddhacce akampanena samādhiyeva samādhibalaṃ.
១៧៣. ទសមេ សមថោតិ ចិត្តេកគ្គតា។ វិបស្សនាតិ សង្ខារបរិគ្គាហកញ្ញាណំ។
173. Dasame samathoti cittekaggatā. Vipassanāti saṅkhārapariggāhakaññāṇaṃ.
១៧៤. ឯកាទសមេ សីលវិបត្តីតិ ទុស្សីល្យំ។ ទិដ្ឋិវិបត្តីតិ មិច្ឆាទិដ្ឋិ។
174. Ekādasame sīlavipattīti dussīlyaṃ. Diṭṭhivipattīti micchādiṭṭhi.
១៧៥. ទ្វាទសមេ សីលសម្បទាតិ បរិបុណ្ណសីលតា។ ទិដ្ឋិសម្បទាតិ សម្មាទិដ្ឋិកភាវោ។ តេន កម្មស្សកតសម្មាទិដ្ឋិ, ឈានសម្មាទិដ្ឋិ, វិបស្សនាសម្មាទិដ្ឋិ, មគ្គសម្មាទិដ្ឋិ, ផលសម្មាទិដ្ឋីតិ សព្ពាបិ បញ្ចវិធា សម្មាទិដ្ឋិ សង្គហិតា ហោតិ។
175. Dvādasame sīlasampadāti paripuṇṇasīlatā. Diṭṭhisampadāti sammādiṭṭhikabhāvo. Tena kammassakatasammādiṭṭhi, jhānasammādiṭṭhi, vipassanāsammādiṭṭhi, maggasammādiṭṭhi, phalasammādiṭṭhīti sabbāpi pañcavidhā sammādiṭṭhi saṅgahitā hoti.
១៧៦. តេរសមេ សីលវិសុទ្ធីតិ វិសុទ្ធិសម្បាបកំ សីលំ។ ទិដ្ឋិវិសុទ្ធីតិ វិសុទ្ធិសម្បាបិកា ចតុមគ្គសម្មាទិដ្ឋិ, បញ្ចវិធាបិ វា សម្មាទិដ្ឋិ។
176. Terasame sīlavisuddhīti visuddhisampāpakaṃ sīlaṃ. Diṭṭhivisuddhīti visuddhisampāpikā catumaggasammādiṭṭhi, pañcavidhāpi vā sammādiṭṭhi.
១៧៧. ចុទ្ទសមេ ទិដ្ឋិវិសុទ្ធីតិ វិសុទ្ធិសម្បាបិកា សម្មាទិដ្ឋិយេវ។ យថាទិដ្ឋិស្ស ច បធានន្តិ ហេដ្ឋិមមគ្គសម្បយុត្តំ វីរិយំ។ តញ្ហិ តស្សា ទិដ្ឋិយា អនុរូបត្តា ‘‘យថាទិដ្ឋិស្ស ច បធាន’’ន្តិ វុត្តំ។
177. Cuddasame diṭṭhivisuddhīti visuddhisampāpikā sammādiṭṭhiyeva. Yathādiṭṭhissa ca padhānanti heṭṭhimamaggasampayuttaṃ vīriyaṃ. Tañhi tassā diṭṭhiyā anurūpattā ‘‘yathādiṭṭhissa ca padhāna’’nti vuttaṃ.
១៧៨. បន្នរសមេ អសន្តុដ្ឋិតា ច កុសលេសុ ធម្មេសូតិ អញ្ញត្រ អរហត្តមគ្គា កុសលេសុ ធម្មេសុ អសន្តុដ្ឋិភាវោ។
178. Pannarasame asantuṭṭhitā ca kusalesu dhammesūti aññatra arahattamaggā kusalesu dhammesu asantuṭṭhibhāvo.
១៧៩. សោឡសមេ មុដ្ឋស្សច្ចន្តិ មុដ្ឋស្សតិភាវោ។ អសម្បជញ្ញន្តិ អញ្ញាណភាវោ។
179. Soḷasame muṭṭhassaccanti muṭṭhassatibhāvo. Asampajaññanti aññāṇabhāvo.
១៨០. សត្តរសមេ អបិលាបនលក្ខណា សតិ។ សម្មា បជាននលក្ខណំ សម្បជញ្ញន្តិ។
180. Sattarasame apilāpanalakkhaṇā sati. Sammā pajānanalakkhaṇaṃ sampajaññanti.
សមាបត្តិវគ្គោ បញ្ចមោ។ តតិយបណ្ណាសកំ និដ្ឋិតំ។
Samāpattivaggo pañcamo. Tatiyapaṇṇāsakaṃ niṭṭhitaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / (១៥) ៥. សមាបត្តិវគ្គោ • (15) 5. Samāpattivaggo
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / (១៥) ៥. សមាបត្តិវគ្គវណ្ណនា • (15) 5. Samāpattivaggavaṇṇanā
