| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
(೧೫) ೫. ಸಮಾಪತ್ತಿವಗ್ಗವಣ್ಣನಾ
(15) 5. Samāpattivaggavaṇṇanā
೧೬೪. ಪಞ್ಚಮಸ್ಸ ಪಠಮೇ ಸಮಾಪತ್ತಿಕುಸಲತಾತಿ ಆಹಾರಸಪ್ಪಾಯಂ ಉತುಸಪ್ಪಾಯಂ ಪರಿಗ್ಗಣ್ಹಿತ್ವಾ ಸಮಾಪತ್ತಿಸಮಾಪಜ್ಜನೇ ಛೇಕತಾ। ಸಮಾಪತ್ತಿವುಟ್ಠಾನಕುಸಲತಾತಿ ಯಥಾಪರಿಚ್ಛೇದೇನ ಗತೇ ಕಾಲೇ ವಿಯತ್ತೋ ಹುತ್ವಾ ಉಟ್ಠಹನ್ತೋ ವುಟ್ಠಾನಕುಸಲೋ ನಾಮ ಹೋತಿ, ಏವಂ ಕುಸಲತಾ।
164. Pañcamassa paṭhame samāpattikusalatāti āhārasappāyaṃ utusappāyaṃ pariggaṇhitvā samāpattisamāpajjane chekatā. Samāpattivuṭṭhānakusalatāti yathāparicchedena gate kāle viyatto hutvā uṭṭhahanto vuṭṭhānakusalo nāma hoti, evaṃ kusalatā.
೧೬೫. ದುತಿಯೇ ಅಜ್ಜವನ್ತಿ ಉಜುಭಾವೋ। ಮದ್ದವನ್ತಿ ಮುದುಭಾವೋ।
165. Dutiye ajjavanti ujubhāvo. Maddavanti mudubhāvo.
೧೬೬. ತತಿಯೇ ಖನ್ತೀತಿ ಅಧಿವಾಸನಖನ್ತಿ। ಸೋರಚ್ಚನ್ತಿ ಸುಸೀಲ್ಯಭಾವೇನ ಸುರತಭಾವೋ।
166. Tatiye khantīti adhivāsanakhanti. Soraccanti susīlyabhāvena suratabhāvo.
೧೬೭. ಚತುತ್ಥೇ ಸಾಖಲ್ಯನ್ತಿ ಸಣ್ಹವಾಚಾವಸೇನ ಸಮ್ಮೋದಮಾನಭಾವೋ। ಪಟಿಸನ್ಥಾರೋತಿ ಆಮಿಸೇನ ವಾ ಧಮ್ಮೇನ ವಾ ಪಟಿಸನ್ಥರಣಂ।
167. Catutthe sākhalyanti saṇhavācāvasena sammodamānabhāvo. Paṭisanthāroti āmisena vā dhammena vā paṭisantharaṇaṃ.
೧೬೮. ಪಞ್ಚಮೇ ಅವಿಹಿಂಸಾತಿ ಕರುಣಾಪುಬ್ಬಭಾಗೋ। ಸೋಚೇಯ್ಯನ್ತಿ ಸೀಲವಸೇನ ಸುಚಿಭಾವೋ। ಛಟ್ಠಸತ್ತಮಾನಿ ಉತ್ತಾನತ್ಥಾನೇವ।
168. Pañcame avihiṃsāti karuṇāpubbabhāgo. Soceyyanti sīlavasena sucibhāvo. Chaṭṭhasattamāni uttānatthāneva.
೧೭೧. ಅಟ್ಠಮೇ ಪಟಿಸಙ್ಖಾನಬಲನ್ತಿ ಪಚ್ಚವೇಕ್ಖಣಬಲಂ।
171. Aṭṭhame paṭisaṅkhānabalanti paccavekkhaṇabalaṃ.
೧೭೨. ನವಮೇ ಮುಟ್ಠಸ್ಸಚ್ಚೇ ಅಕಮ್ಪನೇನ ಸತಿಯೇವ ಸತಿಬಲಂ। ಉದ್ಧಚ್ಚೇ ಅಕಮ್ಪನೇನ ಸಮಾಧಿಯೇವ ಸಮಾಧಿಬಲಂ।
172. Navame muṭṭhassacce akampanena satiyeva satibalaṃ. Uddhacce akampanena samādhiyeva samādhibalaṃ.
೧೭೩. ದಸಮೇ ಸಮಥೋತಿ ಚಿತ್ತೇಕಗ್ಗತಾ। ವಿಪಸ್ಸನಾತಿ ಸಙ್ಖಾರಪರಿಗ್ಗಾಹಕಞ್ಞಾಣಂ।
173. Dasame samathoti cittekaggatā. Vipassanāti saṅkhārapariggāhakaññāṇaṃ.
೧೭೪. ಏಕಾದಸಮೇ ಸೀಲವಿಪತ್ತೀತಿ ದುಸ್ಸೀಲ್ಯಂ। ದಿಟ್ಠಿವಿಪತ್ತೀತಿ ಮಿಚ್ಛಾದಿಟ್ಠಿ।
174. Ekādasame sīlavipattīti dussīlyaṃ. Diṭṭhivipattīti micchādiṭṭhi.
೧೭೫. ದ್ವಾದಸಮೇ ಸೀಲಸಮ್ಪದಾತಿ ಪರಿಪುಣ್ಣಸೀಲತಾ। ದಿಟ್ಠಿಸಮ್ಪದಾತಿ ಸಮ್ಮಾದಿಟ್ಠಿಕಭಾವೋ। ತೇನ ಕಮ್ಮಸ್ಸಕತಸಮ್ಮಾದಿಟ್ಠಿ, ಝಾನಸಮ್ಮಾದಿಟ್ಠಿ, ವಿಪಸ್ಸನಾಸಮ್ಮಾದಿಟ್ಠಿ, ಮಗ್ಗಸಮ್ಮಾದಿಟ್ಠಿ, ಫಲಸಮ್ಮಾದಿಟ್ಠೀತಿ ಸಬ್ಬಾಪಿ ಪಞ್ಚವಿಧಾ ಸಮ್ಮಾದಿಟ್ಠಿ ಸಙ್ಗಹಿತಾ ಹೋತಿ।
175. Dvādasame sīlasampadāti paripuṇṇasīlatā. Diṭṭhisampadāti sammādiṭṭhikabhāvo. Tena kammassakatasammādiṭṭhi, jhānasammādiṭṭhi, vipassanāsammādiṭṭhi, maggasammādiṭṭhi, phalasammādiṭṭhīti sabbāpi pañcavidhā sammādiṭṭhi saṅgahitā hoti.
೧೭೬. ತೇರಸಮೇ ಸೀಲವಿಸುದ್ಧೀತಿ ವಿಸುದ್ಧಿಸಮ್ಪಾಪಕಂ ಸೀಲಂ। ದಿಟ್ಠಿವಿಸುದ್ಧೀತಿ ವಿಸುದ್ಧಿಸಮ್ಪಾಪಿಕಾ ಚತುಮಗ್ಗಸಮ್ಮಾದಿಟ್ಠಿ, ಪಞ್ಚವಿಧಾಪಿ ವಾ ಸಮ್ಮಾದಿಟ್ಠಿ।
176. Terasame sīlavisuddhīti visuddhisampāpakaṃ sīlaṃ. Diṭṭhivisuddhīti visuddhisampāpikā catumaggasammādiṭṭhi, pañcavidhāpi vā sammādiṭṭhi.
೧೭೭. ಚುದ್ದಸಮೇ ದಿಟ್ಠಿವಿಸುದ್ಧೀತಿ ವಿಸುದ್ಧಿಸಮ್ಪಾಪಿಕಾ ಸಮ್ಮಾದಿಟ್ಠಿಯೇವ। ಯಥಾದಿಟ್ಠಿಸ್ಸ ಚ ಪಧಾನನ್ತಿ ಹೇಟ್ಠಿಮಮಗ್ಗಸಮ್ಪಯುತ್ತಂ ವೀರಿಯಂ। ತಞ್ಹಿ ತಸ್ಸಾ ದಿಟ್ಠಿಯಾ ಅನುರೂಪತ್ತಾ ‘‘ಯಥಾದಿಟ್ಠಿಸ್ಸ ಚ ಪಧಾನ’’ನ್ತಿ ವುತ್ತಂ।
177. Cuddasame diṭṭhivisuddhīti visuddhisampāpikā sammādiṭṭhiyeva. Yathādiṭṭhissa ca padhānanti heṭṭhimamaggasampayuttaṃ vīriyaṃ. Tañhi tassā diṭṭhiyā anurūpattā ‘‘yathādiṭṭhissa ca padhāna’’nti vuttaṃ.
೧೭೮. ಪನ್ನರಸಮೇ ಅಸನ್ತುಟ್ಠಿತಾ ಚ ಕುಸಲೇಸು ಧಮ್ಮೇಸೂತಿ ಅಞ್ಞತ್ರ ಅರಹತ್ತಮಗ್ಗಾ ಕುಸಲೇಸು ಧಮ್ಮೇಸು ಅಸನ್ತುಟ್ಠಿಭಾವೋ।
178. Pannarasame asantuṭṭhitā ca kusalesu dhammesūti aññatra arahattamaggā kusalesu dhammesu asantuṭṭhibhāvo.
೧೭೯. ಸೋಳಸಮೇ ಮುಟ್ಠಸ್ಸಚ್ಚನ್ತಿ ಮುಟ್ಠಸ್ಸತಿಭಾವೋ। ಅಸಮ್ಪಜಞ್ಞನ್ತಿ ಅಞ್ಞಾಣಭಾವೋ।
179. Soḷasame muṭṭhassaccanti muṭṭhassatibhāvo. Asampajaññanti aññāṇabhāvo.
೧೮೦. ಸತ್ತರಸಮೇ ಅಪಿಲಾಪನಲಕ್ಖಣಾ ಸತಿ। ಸಮ್ಮಾ ಪಜಾನನಲಕ್ಖಣಂ ಸಮ್ಪಜಞ್ಞನ್ತಿ।
180. Sattarasame apilāpanalakkhaṇā sati. Sammā pajānanalakkhaṇaṃ sampajaññanti.
ಸಮಾಪತ್ತಿವಗ್ಗೋ ಪಞ್ಚಮೋ। ತತಿಯಪಣ್ಣಾಸಕಂ ನಿಟ್ಠಿತಂ।
Samāpattivaggo pañcamo. Tatiyapaṇṇāsakaṃ niṭṭhitaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / (೧೫) ೫. ಸಮಾಪತ್ತಿವಗ್ಗೋ • (15) 5. Samāpattivaggo
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / (೧೫) ೫. ಸಮಾಪತ್ತಿವಗ್ಗವಣ್ಣನಾ • (15) 5. Samāpattivaggavaṇṇanā
