| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
(15) 5. සමාපත්‌තිවග්‌ගවණ්‌ණනා
(15) 5. Samāpattivaggavaṇṇanā
164. පඤ්‌චමස්‌ස පඨමෙ සමාපත්‌තිකුසලතාති ආහාරසප්‌පායං උතුසප්‌පායං පරිග්‌ගණ්‌හිත්‌වා සමාපත්‌තිසමාපජ්‌ජනෙ ඡෙකතා. සමාපත්‌තිවුට්‌ඨානකුසලතාති යථාපරිච්‌ඡෙදෙන ගතෙ කාලෙ වියත්‌තො හුත්‌වා උට්‌ඨහන්‌තො වුට්‌ඨානකුසලො නාම හොති, එවං කුසලතා.
164. Pañcamassa paṭhame samāpattikusalatāti āhārasappāyaṃ utusappāyaṃ pariggaṇhitvā samāpattisamāpajjane chekatā. Samāpattivuṭṭhānakusalatāti yathāparicchedena gate kāle viyatto hutvā uṭṭhahanto vuṭṭhānakusalo nāma hoti, evaṃ kusalatā.
165. දුතියෙ අජ්‌ජවන්‌ති උජුභාවො. මද්‌දවන්‌ති මුදුභාවො.
165. Dutiye ajjavanti ujubhāvo. Maddavanti mudubhāvo.
166. තතියෙ ඛන්‌තීති අධිවාසනඛන්‌ති. සොරච්‌චන්‌ති සුසීල්‍යභාවෙන සුරතභාවො.
166. Tatiye khantīti adhivāsanakhanti. Soraccanti susīlyabhāvena suratabhāvo.
167. චතුත්‌ථෙ සාඛල්‍යන්‌ති සණ්‌හවාචාවසෙන සම්‌මොදමානභාවො. පටිසන්‌ථාරොති ආමිසෙන වා ධම්‌මෙන වා පටිසන්‌ථරණං.
167. Catutthe sākhalyanti saṇhavācāvasena sammodamānabhāvo. Paṭisanthāroti āmisena vā dhammena vā paṭisantharaṇaṃ.
168. පඤ්‌චමෙ අවිහිංසාති කරුණාපුබ්‌බභාගො. සොචෙය්‍යන්‌ති සීලවසෙන සුචිභාවො. ඡට්‌ඨසත්‌තමානි උත්‌තානත්‌ථානෙව.
168. Pañcame avihiṃsāti karuṇāpubbabhāgo. Soceyyanti sīlavasena sucibhāvo. Chaṭṭhasattamāni uttānatthāneva.
171. අට්‌ඨමෙ පටිසඞ්‌ඛානබලන්‌ති පච්‌චවෙක්‌ඛණබලං.
171. Aṭṭhame paṭisaṅkhānabalanti paccavekkhaṇabalaṃ.
172. නවමෙ මුට්‌ඨස්‌සච්‌චෙ අකම්‌පනෙන සතියෙව සතිබලං. උද්‌ධච්‌චෙ අකම්‌පනෙන සමාධියෙව සමාධිබලං.
172. Navame muṭṭhassacce akampanena satiyeva satibalaṃ. Uddhacce akampanena samādhiyeva samādhibalaṃ.
173. දසමෙ සමථොති චිත්‌තෙකග්‌ගතා. විපස්‌සනාති සඞ්‌ඛාරපරිග්‌ගාහකඤ්‌ඤාණං.
173. Dasame samathoti cittekaggatā. Vipassanāti saṅkhārapariggāhakaññāṇaṃ.
174. එකාදසමෙ සීලවිපත්‌තීති දුස්‌සීල්‍යං. දිට්‌ඨිවිපත්‌තීති මිච්‌ඡාදිට්‌ඨි.
174. Ekādasame sīlavipattīti dussīlyaṃ. Diṭṭhivipattīti micchādiṭṭhi.
175. ද්‌වාදසමෙ සීලසම්‌පදාති පරිපුණ්‌ණසීලතා. දිට්‌ඨිසම්‌පදාති සම්‌මාදිට්‌ඨිකභාවො. තෙන කම්‌මස්‌සකතසම්‌මාදිට්‌ඨි, ඣානසම්‌මාදිට්‌ඨි, විපස්‌සනාසම්‌මාදිට්‌ඨි, මග්‌ගසම්‌මාදිට්‌ඨි, ඵලසම්‌මාදිට්‌ඨීති සබ්‌බාපි පඤ්‌චවිධා සම්‌මාදිට්‌ඨි සඞ්‌ගහිතා හොති.
175. Dvādasame sīlasampadāti paripuṇṇasīlatā. Diṭṭhisampadāti sammādiṭṭhikabhāvo. Tena kammassakatasammādiṭṭhi, jhānasammādiṭṭhi, vipassanāsammādiṭṭhi, maggasammādiṭṭhi, phalasammādiṭṭhīti sabbāpi pañcavidhā sammādiṭṭhi saṅgahitā hoti.
176. තෙරසමෙ සීලවිසුද්‌ධීති විසුද්‌ධිසම්‌පාපකං සීලං. දිට්‌ඨිවිසුද්‌ධීති විසුද්‌ධිසම්‌පාපිකා චතුමග්‌ගසම්‌මාදිට්‌ඨි, පඤ්‌චවිධාපි වා සම්‌මාදිට්‌ඨි.
176. Terasame sīlavisuddhīti visuddhisampāpakaṃ sīlaṃ. Diṭṭhivisuddhīti visuddhisampāpikā catumaggasammādiṭṭhi, pañcavidhāpi vā sammādiṭṭhi.
177. චුද්‌දසමෙ දිට්‌ඨිවිසුද්‌ධීති විසුද්‌ධිසම්‌පාපිකා සම්‌මාදිට්‌ඨියෙව. යථාදිට්‌ඨිස්‌ස ච පධානන්‌ති හෙට්‌ඨිමමග්‌ගසම්‌පයුත්‌තං වීරියං. තඤ්‌හි තස්‌සා දිට්‌ඨියා අනුරූපත්‌තා ‘‘යථාදිට්‌ඨිස්‌ස ච පධාන’’න්‌ති වුත්‌තං.
177. Cuddasame diṭṭhivisuddhīti visuddhisampāpikā sammādiṭṭhiyeva. Yathādiṭṭhissa ca padhānanti heṭṭhimamaggasampayuttaṃ vīriyaṃ. Tañhi tassā diṭṭhiyā anurūpattā ‘‘yathādiṭṭhissa ca padhāna’’nti vuttaṃ.
178. පන්‌නරසමෙ අසන්‌තුට්‌ඨිතා ච කුසලෙසු ධම්‌මෙසූති අඤ්‌ඤත්‍ර අරහත්‌තමග්‌ගා කුසලෙසු ධම්‌මෙසු අසන්‌තුට්‌ඨිභාවො.
178. Pannarasame asantuṭṭhitā ca kusalesu dhammesūti aññatra arahattamaggā kusalesu dhammesu asantuṭṭhibhāvo.
179. සොළසමෙ මුට්‌ඨස්‌සච්‌චන්‌ති මුට්‌ඨස්‌සතිභාවො. අසම්‌පජඤ්‌ඤන්‌ති අඤ්‌ඤාණභාවො.
179. Soḷasame muṭṭhassaccanti muṭṭhassatibhāvo. Asampajaññanti aññāṇabhāvo.
180. සත්‌තරසමෙ අපිලාපනලක්‌ඛණා සති. සම්‌මා පජානනලක්‌ඛණං සම්‌පජඤ්‌ඤන්‌ති.
180. Sattarasame apilāpanalakkhaṇā sati. Sammā pajānanalakkhaṇaṃ sampajaññanti.
සමාපත්‌තිවග්‌ගො පඤ්‌චමො. තතියපණ්‌ණාසකං නිට්‌ඨිතං.
Samāpattivaggo pañcamo. Tatiyapaṇṇāsakaṃ niṭṭhitaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / (15) 5. සමාපත්‌තිවග්‌ගො • (15) 5. Samāpattivaggo
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / (15) 5. සමාපත්‌තිවග්‌ගවණ්‌ණනා • (15) 5. Samāpattivaggavaṇṇanā
