| Library / Tipiṭaka / তিপিটক • Tipiṭaka / নেত্তিপ্পকরণপাল়ি • Nettippakaraṇapāḷi |
১৬. সমারোপনহারসম্পাতো
16. Samāropanahārasampāto
৭৮. তত্থ কতমো সমারোপনো হারসম্পাতো?
78. Tattha katamo samāropano hārasampāto?
‘‘তস্মা রক্খিতচিত্তস্স, সম্মাসঙ্কপ্পগোচরো।
‘‘Tasmā rakkhitacittassa, sammāsaṅkappagocaro;
সম্মাদিট্ঠিপুরেক্খারো, ঞত্ৰান উদযব্বযং।
Sammādiṭṭhipurekkhāro, ñatvāna udayabbayaṃ;
থিনমিদ্ধাভিভূ ভিক্খু, সব্বা দুগ্গতিযো জহে’’তি॥
Thinamiddhābhibhū bhikkhu, sabbā duggatiyo jahe’’ti.
তস্মা রক্খিতচিত্তস্সাতি তিণ্ণং সুচরিতানং পদট্ঠানং, চিত্তে রক্খিতে তং রক্খিতং ভৰতি কাযকম্মং ৰচীকম্মং মনোকম্মং। সম্মাদিট্ঠিপুরেক্খারোতি সম্মাদিট্ঠিযা ভাৰিতায ভাৰিতো ভৰতি অরিযো অট্ঠঙ্গিকো মগ্গো। কেন কারণেন? সম্মাদিট্ঠিতো হি সম্মাসঙ্কপ্পো পভৰতি, সম্মাসঙ্কপ্পতো সম্মাৰাচা পভৰতি, সম্মাৰাচাতো সম্মাকম্মন্তো পভৰতি, সম্মাকম্মন্ততো সম্মাআজীৰো পভৰতি, সম্মাআজীৰতো সম্মাৰাযামো পভৰতি, সম্মাৰাযামতো সম্মাসতি পভৰতি, সম্মাসতিতো সম্মাসমাধি পভৰতি, সম্মাসমাধিতো সম্মাৰিমুত্তি পভৰতি, সম্মাৰিমুত্তিতো সম্মাৰিমুত্তিঞাণদস্সনং পভৰতি। অযং অনুপাদিসেসো পুগ্গলো অনুপাদিসেসা চ নিব্বানধাতু।
Tasmā rakkhitacittassāti tiṇṇaṃ sucaritānaṃ padaṭṭhānaṃ, citte rakkhite taṃ rakkhitaṃ bhavati kāyakammaṃ vacīkammaṃ manokammaṃ. Sammādiṭṭhipurekkhāroti sammādiṭṭhiyā bhāvitāya bhāvito bhavati ariyo aṭṭhaṅgiko maggo. Kena kāraṇena? Sammādiṭṭhito hi sammāsaṅkappo pabhavati, sammāsaṅkappato sammāvācā pabhavati, sammāvācāto sammākammanto pabhavati, sammākammantato sammāājīvo pabhavati, sammāājīvato sammāvāyāmo pabhavati, sammāvāyāmato sammāsati pabhavati, sammāsatito sammāsamādhi pabhavati, sammāsamādhito sammāvimutti pabhavati, sammāvimuttito sammāvimuttiñāṇadassanaṃ pabhavati. Ayaṃ anupādiseso puggalo anupādisesā ca nibbānadhātu.
নিযুত্তো সমারোপনো হারসম্পাতো।
Niyutto samāropano hārasampāto.
তেনাহ আযস্মা মহাকচ্চাযনো –
Tenāha āyasmā mahākaccāyano –
‘‘সোল়স হারা পঠমং, দিসলোচনতো দিসা ৰিলোকেত্ৰা।
‘‘Soḷasa hārā paṭhamaṃ, disalocanato disā viloketvā;
সঙ্খিপিয অঙ্কুসেন হি, নযেহি তীহি নিদ্দিসে সুত্ত’’ন্তি॥
Saṅkhipiya aṅkusena hi, nayehi tīhi niddise sutta’’nti.
নিযুত্তো হারসম্পাতো।
Niyutto hārasampāto.
Related texts:
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ১৬. সমারোপনহারসম্পাতৰিভাৰনা • 16. Samāropanahārasampātavibhāvanā
