| Library / Tipiṭaka / तिपिटक • Tipiṭaka / नेत्तिप्पकरणपाळि • Nettippakaraṇapāḷi |
१६. समारोपनहारसम्पातो
16. Samāropanahārasampāto
७८. तत्थ कतमो समारोपनो हारसम्पातो?
78. Tattha katamo samāropano hārasampāto?
‘‘तस्मा रक्खितचित्तस्स, सम्मासङ्कप्पगोचरो।
‘‘Tasmā rakkhitacittassa, sammāsaṅkappagocaro;
सम्मादिट्ठिपुरेक्खारो, ञत्वान उदयब्बयं।
Sammādiṭṭhipurekkhāro, ñatvāna udayabbayaṃ;
थिनमिद्धाभिभू भिक्खु, सब्बा दुग्गतियो जहे’’ति॥
Thinamiddhābhibhū bhikkhu, sabbā duggatiyo jahe’’ti.
तस्मा रक्खितचित्तस्साति तिण्णं सुचरितानं पदट्ठानं, चित्ते रक्खिते तं रक्खितं भवति कायकम्मं वचीकम्मं मनोकम्मं। सम्मादिट्ठिपुरेक्खारोति सम्मादिट्ठिया भाविताय भावितो भवति अरियो अट्ठङ्गिको मग्गो। केन कारणेन? सम्मादिट्ठितो हि सम्मासङ्कप्पो पभवति, सम्मासङ्कप्पतो सम्मावाचा पभवति, सम्मावाचातो सम्माकम्मन्तो पभवति, सम्माकम्मन्ततो सम्माआजीवो पभवति, सम्माआजीवतो सम्मावायामो पभवति, सम्मावायामतो सम्मासति पभवति, सम्मासतितो सम्मासमाधि पभवति, सम्मासमाधितो सम्माविमुत्ति पभवति, सम्माविमुत्तितो सम्माविमुत्तिञाणदस्सनं पभवति। अयं अनुपादिसेसो पुग्गलो अनुपादिसेसा च निब्बानधातु।
Tasmā rakkhitacittassāti tiṇṇaṃ sucaritānaṃ padaṭṭhānaṃ, citte rakkhite taṃ rakkhitaṃ bhavati kāyakammaṃ vacīkammaṃ manokammaṃ. Sammādiṭṭhipurekkhāroti sammādiṭṭhiyā bhāvitāya bhāvito bhavati ariyo aṭṭhaṅgiko maggo. Kena kāraṇena? Sammādiṭṭhito hi sammāsaṅkappo pabhavati, sammāsaṅkappato sammāvācā pabhavati, sammāvācāto sammākammanto pabhavati, sammākammantato sammāājīvo pabhavati, sammāājīvato sammāvāyāmo pabhavati, sammāvāyāmato sammāsati pabhavati, sammāsatito sammāsamādhi pabhavati, sammāsamādhito sammāvimutti pabhavati, sammāvimuttito sammāvimuttiñāṇadassanaṃ pabhavati. Ayaṃ anupādiseso puggalo anupādisesā ca nibbānadhātu.
नियुत्तो समारोपनो हारसम्पातो।
Niyutto samāropano hārasampāto.
तेनाह आयस्मा महाकच्चायनो –
Tenāha āyasmā mahākaccāyano –
‘‘सोळस हारा पठमं, दिसलोचनतो दिसा विलोकेत्वा।
‘‘Soḷasa hārā paṭhamaṃ, disalocanato disā viloketvā;
सङ्खिपिय अङ्कुसेन हि, नयेहि तीहि निद्दिसे सुत्त’’न्ति॥
Saṅkhipiya aṅkusena hi, nayehi tīhi niddise sutta’’nti.
नियुत्तो हारसम्पातो।
Niyutto hārasampāto.
Related texts:
टीका • Tīkā / सुत्तपिटक (टीका) • Suttapiṭaka (ṭīkā) / खुद्दकनिकाय (टीका) • Khuddakanikāya (ṭīkā) / नेत्तिविभाविनी • Nettivibhāvinī / १६. समारोपनहारसम्पातविभावना • 16. Samāropanahārasampātavibhāvanā
