| Library / Tipiṭaka / තිපිටක • Tipiṭaka / නෙත්‌තිප්‌පකරණපාළි • Nettippakaraṇapāḷi |
16. සමාරොපනහාරසම්‌පාතො
16. Samāropanahārasampāto
78. තත්‌ථ කතමො සමාරොපනො හාරසම්‌පාතො?
78. Tattha katamo samāropano hārasampāto?
‘‘තස්‌මා රක්‌ඛිතචිත්‌තස්‌ස, සම්‌මාසඞ්‌කප්‌පගොචරො;
‘‘Tasmā rakkhitacittassa, sammāsaṅkappagocaro;
සම්‌මාදිට්‌ඨිපුරෙක්‌ඛාරො, ඤත්‌වාන උදයබ්‌බයං;
Sammādiṭṭhipurekkhāro, ñatvāna udayabbayaṃ;
ථිනමිද්‌ධාභිභූ භික්‌ඛු, සබ්‌බා දුග්‌ගතියො ජහෙ’’ති.
Thinamiddhābhibhū bhikkhu, sabbā duggatiyo jahe’’ti.
තස්‌මා රක්‌ඛිතචිත්‌තස්‌සාති තිණ්‌ණං සුචරිතානං පදට්‌ඨානං, චිත්‌තෙ රක්‌ඛිතෙ තං රක්‌ඛිතං භවති කායකම්‌මං වචීකම්‌මං මනොකම්‌මං. සම්‌මාදිට්‌ඨිපුරෙක්‌ඛාරොති සම්‌මාදිට්‌ඨියා භාවිතාය භාවිතො භවති අරියො අට්‌ඨඞ්‌ගිකො මග්‌ගො. කෙන කාරණෙන? සම්‌මාදිට්‌ඨිතො හි සම්‌මාසඞ්‌කප්‌පො පභවති, සම්‌මාසඞ්‌කප්‌පතො සම්‌මාවාචා පභවති, සම්‌මාවාචාතො සම්‌මාකම්‌මන්‌තො පභවති, සම්‌මාකම්‌මන්‌තතො සම්‌මාආජීවො පභවති, සම්‌මාආජීවතො සම්‌මාවායාමො පභවති, සම්‌මාවායාමතො සම්‌මාසති පභවති, සම්‌මාසතිතො සම්‌මාසමාධි පභවති, සම්‌මාසමාධිතො සම්‌මාවිමුත්‌ති පභවති, සම්‌මාවිමුත්‌තිතො සම්‌මාවිමුත්‌තිඤාණදස්‌සනං පභවති. අයං අනුපාදිසෙසො පුග්‌ගලො අනුපාදිසෙසා ච නිබ්‌බානධාතු.
Tasmā rakkhitacittassāti tiṇṇaṃ sucaritānaṃ padaṭṭhānaṃ, citte rakkhite taṃ rakkhitaṃ bhavati kāyakammaṃ vacīkammaṃ manokammaṃ. Sammādiṭṭhipurekkhāroti sammādiṭṭhiyā bhāvitāya bhāvito bhavati ariyo aṭṭhaṅgiko maggo. Kena kāraṇena? Sammādiṭṭhito hi sammāsaṅkappo pabhavati, sammāsaṅkappato sammāvācā pabhavati, sammāvācāto sammākammanto pabhavati, sammākammantato sammāājīvo pabhavati, sammāājīvato sammāvāyāmo pabhavati, sammāvāyāmato sammāsati pabhavati, sammāsatito sammāsamādhi pabhavati, sammāsamādhito sammāvimutti pabhavati, sammāvimuttito sammāvimuttiñāṇadassanaṃ pabhavati. Ayaṃ anupādiseso puggalo anupādisesā ca nibbānadhātu.
නියුත්‌තො සමාරොපනො හාරසම්‌පාතො.
Niyutto samāropano hārasampāto.
තෙනාහ ආයස්‌මා මහාකච්‌චායනො –
Tenāha āyasmā mahākaccāyano –
‘‘සොළස හාරා පඨමං, දිසලොචනතො දිසා විලොකෙත්‌වා;
‘‘Soḷasa hārā paṭhamaṃ, disalocanato disā viloketvā;
සඞ්‌ඛිපිය අඞ්‌කුසෙන හි, නයෙහි තීහි නිද්‌දිසෙ සුත්‌ත’’න්‌ති.
Saṅkhipiya aṅkusena hi, nayehi tīhi niddise sutta’’nti.
නියුත්‌තො හාරසම්‌පාතො.
Niyutto hārasampāto.
Related texts:
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / ඛුද්‌දකනිකාය (ටීකා) • Khuddakanikāya (ṭīkā) / නෙත්‌තිවිභාවිනී • Nettivibhāvinī / 16. සමාරොපනහාරසම්‌පාතවිභාවනා • 16. Samāropanahārasampātavibhāvanā
