| Library / Tipiṭaka / তিপিটক • Tipiṭaka / নেত্তিপ্পকরণ-টীকা • Nettippakaraṇa-ṭīkā |
১৬. সমারোপনহারৰিভঙ্গৰণ্ণনা
16. Samāropanahāravibhaṅgavaṇṇanā
৫০. সুত্তেন গহিতেতি সুত্তে ৰুত্তে। পদট্ঠানগ্গহণং অধিট্ঠানৰিসযদস্সনত্থং, ৰেৰচনগ্গহণং অধিৰচনৰিভাগদস্সনত্থন্তি যোজনা। ৰিসযাধিট্ঠানভাৰতোতি ৰিসযসঙ্খাতপৰত্তিট্ঠানভাৰতো। ৰনীযতীতি ভজীযতি। ৰনতীতি ভজতি সেৰতি। ৰনুতেতি যাচতি, পত্থেতীতি অত্থো । পঞ্চ কামগুণা কামতণ্হায কারণং হোতি আরম্মণপচ্চযতায। নিমিত্তগ্গাহো অনুব্যঞ্জনগ্গাহস্স কারণং হোতি উপনিস্সযতাযাতি এৰং সেসেসুপি যথারহং কারণতা ৰত্তব্বা।
50.Suttena gahiteti sutte vutte. Padaṭṭhānaggahaṇaṃ adhiṭṭhānavisayadassanatthaṃ, vevacanaggahaṇaṃ adhivacanavibhāgadassanatthanti yojanā. Visayādhiṭṭhānabhāvatoti visayasaṅkhātapavattiṭṭhānabhāvato. Vanīyatīti bhajīyati. Vanatīti bhajati sevati. Vanuteti yācati, patthetīti attho . Pañca kāmaguṇā kāmataṇhāya kāraṇaṃ hoti ārammaṇapaccayatāya. Nimittaggāho anubyañjanaggāhassa kāraṇaṃ hoti upanissayatāyāti evaṃ sesesupi yathārahaṃ kāraṇatā vattabbā.
৫১. ‘‘কাযে কাযানুপস্সী ৰিহরাহী’’তিআদীসু যং ৰত্তব্বং, তং হেট্ঠা লক্খণহারৰিভঙ্গৰণ্ণনাযং (নেত্তি॰ অট্ঠ॰ ২৩) ৰুত্তনযেনেৰ ৰেদিতব্বং। অযং পন ৰিসেসো – রূপধম্মপরিঞ্ঞাযাতি রূপূপিকৰিঞ্ঞাণট্ঠিতিপরিঞ্ঞায।
51.‘‘Kāye kāyānupassī viharāhī’’tiādīsu yaṃ vattabbaṃ, taṃ heṭṭhā lakkhaṇahāravibhaṅgavaṇṇanāyaṃ (netti. aṭṭha. 23) vuttanayeneva veditabbaṃ. Ayaṃ pana viseso – rūpadhammapariññāyāti rūpūpikaviññāṇaṭṭhitipariññāya.
‘‘দুক্খ’’ন্তি পস্সন্তী সা ৰেদনানুপস্সনাতি যোজেতব্বং। ৰেদনাহেতুপরিঞ্ঞাযাতি ফস্সপরিঞ্ঞায। ‘‘ৰেদনাৰসেনা’’তি পদেন অত্তনা উপ্পাদিতদুক্খৰসেন। ৰেদনাপরিঞ্ঞাযাতি ৰেদনূপিকৰিঞ্ঞাণট্ঠিতিপরিঞ্ঞায। নিচ্চাভিনিৰেসপটিপক্খতো অনিচ্চানুপস্সনাযাতি অধিপ্পাযো। নিচ্চসঞ্ঞানিমিত্তস্সাতি নিচ্চসঞ্ঞাহেতুকস্স। সঞ্ঞাপরিঞ্ঞাযাতি সঞ্ঞূপিকৰিঞ্ঞাণট্ঠিতিপরিঞ্ঞায। পঠমমগ্গৰজ্ঝত্তা অগতিগমনস্স ৰুত্তং ‘‘দিট্ঠাভিনিৰেসস্স…পে॰… অগতিগমনস্স চা’’তি।
‘‘Dukkha’’nti passantī sā vedanānupassanāti yojetabbaṃ. Vedanāhetupariññāyāti phassapariññāya. ‘‘Vedanāvasenā’’ti padena attanā uppāditadukkhavasena. Vedanāpariññāyāti vedanūpikaviññāṇaṭṭhitipariññāya. Niccābhinivesapaṭipakkhato aniccānupassanāyāti adhippāyo. Niccasaññānimittassāti niccasaññāhetukassa. Saññāpariññāyāti saññūpikaviññāṇaṭṭhitipariññāya. Paṭhamamaggavajjhattā agatigamanassa vuttaṃ ‘‘diṭṭhābhinivesassa…pe… agatigamanassa cā’’ti.
সঙ্খারপরিঞ্ঞাযাতি সঙ্খারূপিকৰিঞ্ঞাণট্ঠিতিপরিঞ্ঞায।
Saṅkhārapariññāyāti saṅkhārūpikaviññāṇaṭṭhitipariññāya.
সমারোপনহারৰিভঙ্গৰণ্ণনা নিট্ঠিতা।
Samāropanahāravibhaṅgavaṇṇanā niṭṭhitā.
নিট্ঠিতা চ হারৰিভঙ্গৰণ্ণনা।
Niṭṭhitā ca hāravibhaṅgavaṇṇanā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / নেত্তিপ্পকরণপাল়ি • Nettippakaraṇapāḷi / ১৬. সমারোপনহারৰিভঙ্গো • 16. Samāropanahāravibhaṅgo
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ১৬. সমারোপনহারৰিভঙ্গৰণ্ণনা • 16. Samāropanahāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ১৬. সমারোপনহারৰিভঙ্গৰিভাৰনা • 16. Samāropanahāravibhaṅgavibhāvanā
