| Library / Tipiṭaka / ཏིཔིཊཀ • Tipiṭaka / ནེཏྟིཔྤཀརཎ-ཊཱིཀཱ • Nettippakaraṇa-ṭīkā |
༡༦. སམཱརོཔནཧཱརཝིབྷངྒཝཎྞནཱ
16. Samāropanahāravibhaṅgavaṇṇanā
༥༠. སུཏྟེན གཧིཏེཏི སུཏྟེ ཝུཏྟེ། པདཊྛཱནགྒཧཎཾ ཨདྷིཊྛཱནཝིསཡདསྶནཏྠཾ, ཝེཝཙནགྒཧཎཾ ཨདྷིཝཙནཝིབྷཱགདསྶནཏྠནྟི ཡོཛནཱ། ཝིསཡཱདྷིཊྛཱནབྷཱཝཏོཏི ཝིསཡསངྑཱཏཔཝཏྟིཊྛཱནབྷཱཝཏོ། ཝནཱིཡཏཱིཏི བྷཛཱིཡཏི། ཝནཏཱིཏི བྷཛཏི སེཝཏི། ཝནུཏེཏི ཡཱཙཏི, པཏྠེཏཱིཏི ཨཏྠོ ། པཉྩ ཀཱམགུཎཱ ཀཱམཏཎྷཱཡ ཀཱརཎཾ ཧོཏི ཨཱརམྨཎཔཙྩཡཏཱཡ། ནིམིཏྟགྒཱཧོ ཨནུབྱཉྫནགྒཱཧསྶ ཀཱརཎཾ ཧོཏི ཨུཔནིསྶཡཏཱཡཱཏི ཨེཝཾ སེསེསུཔི ཡཐཱརཧཾ ཀཱརཎཏཱ ཝཏྟབྦཱ།
50.Suttena gahiteti sutte vutte. Padaṭṭhānaggahaṇaṃ adhiṭṭhānavisayadassanatthaṃ, vevacanaggahaṇaṃ adhivacanavibhāgadassanatthanti yojanā. Visayādhiṭṭhānabhāvatoti visayasaṅkhātapavattiṭṭhānabhāvato. Vanīyatīti bhajīyati. Vanatīti bhajati sevati. Vanuteti yācati, patthetīti attho . Pañca kāmaguṇā kāmataṇhāya kāraṇaṃ hoti ārammaṇapaccayatāya. Nimittaggāho anubyañjanaggāhassa kāraṇaṃ hoti upanissayatāyāti evaṃ sesesupi yathārahaṃ kāraṇatā vattabbā.
༥༡. ‘‘ཀཱཡེ ཀཱཡཱནུཔསྶཱི ཝིཧརཱཧཱི’’ཏིཨཱདཱིསུ ཡཾ ཝཏྟབྦཾ, ཏཾ ཧེཊྛཱ ལཀྑཎཧཱརཝིབྷངྒཝཎྞནཱཡཾ (ནེཏྟི॰ ཨཊྛ॰ ༢༣) ཝུཏྟནཡེནེཝ ཝེདིཏབྦཾ། ཨཡཾ པན ཝིསེསོ – རཱུཔདྷམྨཔརིཉྙཱཡཱཏི རཱུཔཱུཔིཀཝིཉྙཱཎཊྛིཏིཔརིཉྙཱཡ།
51.‘‘Kāye kāyānupassī viharāhī’’tiādīsu yaṃ vattabbaṃ, taṃ heṭṭhā lakkhaṇahāravibhaṅgavaṇṇanāyaṃ (netti. aṭṭha. 23) vuttanayeneva veditabbaṃ. Ayaṃ pana viseso – rūpadhammapariññāyāti rūpūpikaviññāṇaṭṭhitipariññāya.
‘‘དུཀྑ’’ནྟི པསྶནྟཱི སཱ ཝེདནཱནུཔསྶནཱཏི ཡོཛེཏབྦཾ། ཝེདནཱཧེཏུཔརིཉྙཱཡཱཏི ཕསྶཔརིཉྙཱཡ། ‘‘ཝེདནཱཝསེནཱ’’ཏི པདེན ཨཏྟནཱ ཨུཔྤཱདིཏདུཀྑཝསེན། ཝེདནཱཔརིཉྙཱཡཱཏི ཝེདནཱུཔིཀཝིཉྙཱཎཊྛིཏིཔརིཉྙཱཡ། ནིཙྩཱབྷིནིཝེསཔཊིཔཀྑཏོ ཨནིཙྩཱནུཔསྶནཱཡཱཏི ཨདྷིཔྤཱཡོ། ནིཙྩསཉྙཱནིམིཏྟསྶཱཏི ནིཙྩསཉྙཱཧེཏུཀསྶ། སཉྙཱཔརིཉྙཱཡཱཏི སཉྙཱུཔིཀཝིཉྙཱཎཊྛིཏིཔརིཉྙཱཡ། པཋམམགྒཝཛ྄ཛྷཏྟཱ ཨགཏིགམནསྶ ཝུཏྟཾ ‘‘དིཊྛཱབྷིནིཝེསསྶ…པེ॰… ཨགཏིགམནསྶ ཙཱ’’ཏི།
‘‘Dukkha’’nti passantī sā vedanānupassanāti yojetabbaṃ. Vedanāhetupariññāyāti phassapariññāya. ‘‘Vedanāvasenā’’ti padena attanā uppāditadukkhavasena. Vedanāpariññāyāti vedanūpikaviññāṇaṭṭhitipariññāya. Niccābhinivesapaṭipakkhato aniccānupassanāyāti adhippāyo. Niccasaññānimittassāti niccasaññāhetukassa. Saññāpariññāyāti saññūpikaviññāṇaṭṭhitipariññāya. Paṭhamamaggavajjhattā agatigamanassa vuttaṃ ‘‘diṭṭhābhinivesassa…pe… agatigamanassa cā’’ti.
སངྑཱརཔརིཉྙཱཡཱཏི སངྑཱརཱུཔིཀཝིཉྙཱཎཊྛིཏིཔརིཉྙཱཡ།
Saṅkhārapariññāyāti saṅkhārūpikaviññāṇaṭṭhitipariññāya.
སམཱརོཔནཧཱརཝིབྷངྒཝཎྞནཱ ནིཊྛིཏཱ།
Samāropanahāravibhaṅgavaṇṇanā niṭṭhitā.
ནིཊྛིཏཱ ཙ ཧཱརཝིབྷངྒཝཎྞནཱ།
Niṭṭhitā ca hāravibhaṅgavaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ནེཏྟིཔྤཀརཎཔཱལི༹ • Nettippakaraṇapāḷi / ༡༦. སམཱརོཔནཧཱརཝིབྷངྒོ • 16. Samāropanahāravibhaṅgo
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / ནེཏྟིཔྤཀརཎ-ཨཊྛཀཐཱ • Nettippakaraṇa-aṭṭhakathā / ༡༦. སམཱརོཔནཧཱརཝིབྷངྒཝཎྞནཱ • 16. Samāropanahāravibhaṅgavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཝིབྷཱཝིནཱི • Nettivibhāvinī / ༡༦. སམཱརོཔནཧཱརཝིབྷངྒཝིབྷཱཝནཱ • 16. Samāropanahāravibhaṅgavibhāvanā
