| Library / Tipiṭaka / ཏིཔིཊཀ • Tipiṭaka / ནེཏྟིཔྤཀརཎཔཱལི༹ • Nettippakaraṇapāḷi |
༡༦. སམཱརོཔནཧཱརཝིབྷངྒོ
16. Samāropanahāravibhaṅgo
༥༠. ཏཏྠ ཀཏམོ སམཱརོཔནོ ཧཱརོ? ‘‘ཡེ དྷམྨཱ ཡཾམཱུལཱ, ཡེ ཙེཀཏྠཱ པཀཱསིཏཱ མུནིནཱ’’ཏི།
50. Tattha katamo samāropano hāro? ‘‘Ye dhammā yaṃmūlā, ye cekatthā pakāsitā muninā’’ti.
ཨེཀསྨིཾ པདཊྛཱནེ ཡཏྟཀཱནི པདཊྛཱནཱནི ཨོཏརནྟི, སབྦཱནི ཏཱནི སམཱརོཔཡིཏབྦཱནི། ཡཐཱ ཨཱཝཊྚེ ཧཱརེ བཧུཀཱནི པདཊྛཱནཱནི ཨོཏརནྟཱིཏི། ཏཏྠ སམཱརོཔནཱ ཙཏུབྦིདྷཱ པདཊྛཱནཾ, ཝེཝཙནཾ, བྷཱཝནཱ, པཧཱནམིཏི།
Ekasmiṃ padaṭṭhāne yattakāni padaṭṭhānāni otaranti, sabbāni tāni samāropayitabbāni. Yathā āvaṭṭe hāre bahukāni padaṭṭhānāni otarantīti. Tattha samāropanā catubbidhā padaṭṭhānaṃ, vevacanaṃ, bhāvanā, pahānamiti.
ཏཏྠ ཀཏམཱ པདཊྛཱནེན སམཱརོཔནཱ?
Tattha katamā padaṭṭhānena samāropanā?
‘‘སབྦཔཱཔསྶ ཨཀརཎཾ, ཀུསལསྶ ཨུཔསམྤདཱ།
‘‘Sabbapāpassa akaraṇaṃ, kusalassa upasampadā;
སཙིཏྟཔརིཡོདཔནཾ, ཨེཏཾ བུདྡྷཱན སཱསན’’ནྟི༎
Sacittapariyodapanaṃ, etaṃ buddhāna sāsana’’nti.
ཏསྶ ཀིཾ པདཊྛཱནཾ? ཏཱིཎི སུཙརིཏཱནི – ཀཱཡསུཙརིཏཾ ཝཙཱིསུཙརིཏཾ མནོསུཙརིཏཾ – ཨིདཾ པདཊྛཱནཾ; ཏཏྠ ཡཾ ཀཱཡིཀཉྩ ཝཱཙསིཀཉྩ སུཙརིཏཾ, ཨཡཾ སཱིལཀྑནྡྷོ། མནོསུཙརིཏེ ཡཱ ཨནབྷིཛ྄ཛྷཱ ཨབྱཱཔཱདོ ཙ, ཨཡཾ སམཱདྷིཀྑནྡྷོ། ཡཱ སམྨཱདིཊྛི, ཨཡཾ པཉྙཱཀྑནྡྷོ། ཨིདཾ པདཊྛཱནཾ, ཏཏྠ སཱིལཀྑནྡྷོ ཙ སམཱདྷིཀྑནྡྷོ ཙ སམཐོ, པཉྙཱཀྑནྡྷོ ཝིཔསྶནཱ། ཨིདཾ པདཊྛཱནཾ, ཏཏྠ སམཐསྶ ཕལཾ རཱགཝིརཱགཱ ཙེཏོཝིམུཏྟི, ཝིཔསྶནཱ ཕལཾ ཨཝིཛྫཱཝིརཱགཱ པཉྙཱཝིམུཏྟི། ཨིདཾ པདཊྛཱནཾ།
Tassa kiṃ padaṭṭhānaṃ? Tīṇi sucaritāni – kāyasucaritaṃ vacīsucaritaṃ manosucaritaṃ – idaṃ padaṭṭhānaṃ; tattha yaṃ kāyikañca vācasikañca sucaritaṃ, ayaṃ sīlakkhandho. Manosucarite yā anabhijjhā abyāpādo ca, ayaṃ samādhikkhandho. Yā sammādiṭṭhi, ayaṃ paññākkhandho. Idaṃ padaṭṭhānaṃ, tattha sīlakkhandho ca samādhikkhandho ca samatho, paññākkhandho vipassanā. Idaṃ padaṭṭhānaṃ, tattha samathassa phalaṃ rāgavirāgā cetovimutti, vipassanā phalaṃ avijjāvirāgā paññāvimutti. Idaṃ padaṭṭhānaṃ.
ཝནཾ ཝནཐསྶ པདཊྛཱནཾ། ཀིཉྩ ཝནཾ? ཀོ ཙ ཝནཐོ? ཝནཾ ནཱམ པཉྩ ཀཱམགུཎཱ, ཏཎྷཱ ཝནཐོ། ཨིདཾ པདཊྛཱནཾ། ཝནཾ ནཱམ ནིམིཏྟགྒཱཧོ ‘‘ཨིཏྠཱི’’ཏི ཝཱ ‘‘པུརིསོ’’ཏི ཝཱ། ཝནཐོ ནཱམ ཏེསཾ ཏེསཾ ཨངྒཔཙྩངྒཱནཾ ཨནུབྱཉྫནགྒཱཧོ ‘‘ཨཧོ ཙཀྑུ, ཨཧོ སོཏཾ, ཨཧོ གྷཱནཾ, ཨཧོ ཛིཝ྄ཧཱ, ཨཧོ ཀཱཡོ, ཨིཏི། ཨིདཾ པདཊྛཱནཾ། ཝནཾ ནཱམ ཚ ཨཛ྄ཛྷཏྟིཀབཱཧིརཱནི ཨཱཡཏནཱནི ཨཔརིཉྙཱཏཱནི། ཡཾ ཏདུབྷཡཾ པཊིཙྩ ཨུཔྤཛྫཏི སཾཡོཛནཾ, ཨཡཾ ཝནཐོ། ཨིདཾ པདཊྛཱནཾ། ཝནཾ ནཱམ ཨནུསཡོ། ཝནཐོ ནཱམ པརིཡུཊྛཱནཾ། ཨིདཾ པདཊྛཱནཾ། ཏེནཱཧ བྷགཝཱ ‘‘ཚེཏྭཱ ཝནཉྩ ཝནཐཉྩཱ’’ཏི། ཨཡཾ པདཊྛཱནེན སམཱརོཔནཱ།
Vanaṃ vanathassa padaṭṭhānaṃ. Kiñca vanaṃ? Ko ca vanatho? Vanaṃ nāma pañca kāmaguṇā, taṇhā vanatho. Idaṃ padaṭṭhānaṃ. Vanaṃ nāma nimittaggāho ‘‘itthī’’ti vā ‘‘puriso’’ti vā. Vanatho nāma tesaṃ tesaṃ aṅgapaccaṅgānaṃ anubyañjanaggāho ‘‘aho cakkhu, aho sotaṃ, aho ghānaṃ, aho jivhā, aho kāyo, iti. Idaṃ padaṭṭhānaṃ. Vanaṃ nāma cha ajjhattikabāhirāni āyatanāni apariññātāni. Yaṃ tadubhayaṃ paṭicca uppajjati saṃyojanaṃ, ayaṃ vanatho. Idaṃ padaṭṭhānaṃ. Vanaṃ nāma anusayo. Vanatho nāma pariyuṭṭhānaṃ. Idaṃ padaṭṭhānaṃ. Tenāha bhagavā ‘‘chetvā vanañca vanathañcā’’ti. Ayaṃ padaṭṭhānena samāropanā.
༥༡. ཏཏྠ ཀཏམཱ ཝེཝཙནེན སམཱརོཔནཱ? རཱགཝིརཱགཱ ཙེཏོཝིམུཏྟི སེཀྑཕལཾ; ཨཝིཛྫཱཝིརཱགཱ པཉྙཱཝིམུཏྟི ཨསེཀྑཕལཾ། ཨིདཾ ཝེཝཙནཾ། རཱགཝིརཱགཱ ཙེཏོཝིམུཏྟི ཨནཱགཱམིཕལཾ; ཨཝིཛྫཱཝིརཱགཱ པཉྙཱཝིམུཏྟི ཨགྒཕལཾ ཨརཧཏྟཾ། ཨིདཾ ཝེཝཙནཾ། རཱགཝིརཱགཱ ཙེཏོཝིམུཏྟི ཀཱམདྷཱཏུསམཏིཀྐམནཾ; ཨཝིཛྫཱཝིརཱགཱ པཉྙཱཝིམུཏྟི ཏེདྷཱཏུསམཏིཀྐམནཾ། ཨིདཾ ཝེཝཙནཾ། པཉྙིནྡྲིཡཾ, པཉྙཱབལཾ, ཨདྷིཔཉྙཱསིཀྑཱ, པཉྙཱཀྑནྡྷོ, དྷམྨཝིཙཡསམྦོཛ྄ཛྷངྒོ, ཨུཔེཀྑཱསམྦོཛ྄ཛྷངྒོ, ཉཱཎཾ, སམྨཱདིཊྛི, ཏཱིརཎཱ, སནྟཱིརཎཱ, ཧིརཱི, ཝིཔསྶནཱ, དྷམྨེ ཉཱཎཾ, སབྦཾ, ཨིདཾ ཝེཝཙནཾ། ཨཡཾ ཝེཝཙནེན སམཱརོཔནཱ།
51. Tattha katamā vevacanena samāropanā? Rāgavirāgā cetovimutti sekkhaphalaṃ; avijjāvirāgā paññāvimutti asekkhaphalaṃ. Idaṃ vevacanaṃ. Rāgavirāgā cetovimutti anāgāmiphalaṃ; avijjāvirāgā paññāvimutti aggaphalaṃ arahattaṃ. Idaṃ vevacanaṃ. Rāgavirāgā cetovimutti kāmadhātusamatikkamanaṃ; avijjāvirāgā paññāvimutti tedhātusamatikkamanaṃ. Idaṃ vevacanaṃ. Paññindriyaṃ, paññābalaṃ, adhipaññāsikkhā, paññākkhandho, dhammavicayasambojjhaṅgo, upekkhāsambojjhaṅgo, ñāṇaṃ, sammādiṭṭhi, tīraṇā, santīraṇā, hirī, vipassanā, dhamme ñāṇaṃ, sabbaṃ, idaṃ vevacanaṃ. Ayaṃ vevacanena samāropanā.
ཏཏྠ ཀཏམཱ བྷཱཝནཱཡ སམཱརོཔནཱ? ཡཐཱཧ བྷགཝཱ ‘‘ཏསྨཱཏིཧ ཏྭཾ བྷིཀྑུ ཀཱཡེ ཀཱཡཱནུཔསྶཱི ཝིཧརཱཧི, ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ’’། ཨཱཏཱཔཱིཏི ཝཱིརིཡིནྡྲིཡཾ། སམྤཛཱནོཏི པཉྙིནྡྲིཡཾ། སཏིམཱཏི སཏིནྡྲིཡཾ། ཝིནེཡྻ ལོཀེ ཨབྷིཛ྄ཛྷཱདོམནསྶནྟི སམཱདྷིནྡྲིཡཾ། ཨེཝཾ ཀཱཡེ ཀཱཡཱནུཔསྶིནོ ཝིཧརཏོ ཙཏྟཱརོ སཏིཔཊྛཱནཱ བྷཱཝནཱཔཱརིཔཱུརིཾ གཙྪནྟི། ཀེན ཀཱརཎེན? ཨེཀལཀྑཎཏྟཱ ཙཏུནྣཾ ཨིནྡྲིཡཱནཾ། ཙཏཱུསུ སཏིཔཊྛཱནེསུ བྷཱཝིཡམཱནེསུ ཙཏྟཱརོ སམྨཔྤདྷཱནཱ བྷཱཝནཱཔཱརིཔཱུརིཾ གཙྪནྟི། ཙཏཱུསུ སམྨཔྤདྷཱནེསུ བྷཱཝིཡམཱནེསུ ཙཏྟཱརོ ཨིདྡྷིཔཱདཱ བྷཱཝནཱཔཱརིཔཱུརིཾ གཙྪནྟི། ཙཏཱུསུ ཨིདྡྷིཔཱདེསུ བྷཱཝིཡམཱནེསུ པཉྩིནྡྲིཡཱནི བྷཱཝནཱཔཱརིཔཱུརིཾ གཙྪནྟི། ཨེཝཾ སབྦེ ། ཀེན ཀཱརཎེན? སབྦེ ཧི བོདྷངྒམཱ དྷམྨཱ བོདྷིཔཀྑིཡཱ ནིཡྻཱནིཀལཀྑཎེན ཨེཀལཀྑཎཱ, ཏེ ཨེཀལཀྑཎཏྟཱ བྷཱཝནཱཔཱརིཔཱུརིཾ གཙྪནྟི། ཨཡཾ བྷཱཝནཱཡ སམཱརོཔནཱ།
Tattha katamā bhāvanāya samāropanā? Yathāha bhagavā ‘‘tasmātiha tvaṃ bhikkhu kāye kāyānupassī viharāhi, ātāpī sampajāno satimā vineyya loke abhijjhādomanassaṃ’’. Ātāpīti vīriyindriyaṃ. Sampajānoti paññindriyaṃ. Satimāti satindriyaṃ. Vineyya loke abhijjhādomanassanti samādhindriyaṃ. Evaṃ kāye kāyānupassino viharato cattāro satipaṭṭhānā bhāvanāpāripūriṃ gacchanti. Kena kāraṇena? Ekalakkhaṇattā catunnaṃ indriyānaṃ. Catūsu satipaṭṭhānesu bhāviyamānesu cattāro sammappadhānā bhāvanāpāripūriṃ gacchanti. Catūsu sammappadhānesu bhāviyamānesu cattāro iddhipādā bhāvanāpāripūriṃ gacchanti. Catūsu iddhipādesu bhāviyamānesu pañcindriyāni bhāvanāpāripūriṃ gacchanti. Evaṃ sabbe . Kena kāraṇena? Sabbe hi bodhaṅgamā dhammā bodhipakkhiyā niyyānikalakkhaṇena ekalakkhaṇā, te ekalakkhaṇattā bhāvanāpāripūriṃ gacchanti. Ayaṃ bhāvanāya samāropanā.
ཏཏྠ ཀཏམཱ པཧཱནེན སམཱརོཔནཱ? ཀཱཡེ ཀཱཡཱནུཔསྶཱི ཝིཧརནྟོ ‘‘ཨསུབྷེ སུབྷ’’ནྟི ཝིཔལླཱསཾ པཛཧཏི, ཀབལཱི༹ཀཱརོ ཙསྶ ཨཱཧཱརོ པརིཉྙཾ གཙྪཏི, ཀཱམུཔཱདཱནེན ཙ ཨནུཔཱདཱནོ བྷཝཏི, ཀཱམཡོགེན ཙ ཝིསཾཡུཏྟོ བྷཝཏི, ཨབྷིཛ྄ཛྷཱཀཱཡགནྠེན ཙ ཝིཔྤཡུཛྫཏི, ཀཱམཱསཝེན ཙ ཨནཱསཝོ བྷཝཏི, ཀཱམོགྷཉྩ ཨུཏྟིཎྞོ བྷཝཏི, རཱགསལླེན ཙ ཝིསལློ བྷཝཏི, རཱུཔཱུཔིཀཱ 1 ཙསྶ ཝིཉྙཱཎཊྛིཏི པརིཉྙཾ གཙྪཏི, རཱུཔདྷཱཏུཡཾ ཙསྶ རཱགོ པཧཱིནོ བྷཝཏི, ན ཙ ཚནྡཱགཏིཾ གཙྪཏི།
Tattha katamā pahānena samāropanā? Kāye kāyānupassī viharanto ‘‘asubhe subha’’nti vipallāsaṃ pajahati, kabaḷīkāro cassa āhāro pariññaṃ gacchati, kāmupādānena ca anupādāno bhavati, kāmayogena ca visaṃyutto bhavati, abhijjhākāyaganthena ca vippayujjati, kāmāsavena ca anāsavo bhavati, kāmoghañca uttiṇṇo bhavati, rāgasallena ca visallo bhavati, rūpūpikā 2 cassa viññāṇaṭṭhiti pariññaṃ gacchati, rūpadhātuyaṃ cassa rāgo pahīno bhavati, na ca chandāgatiṃ gacchati.
ཝེདནཱསུ ཝེདནཱནུཔསྶཱི ཝིཧརནྟོ ‘‘དུཀྑེ སུཁ’’ནྟི ཝིཔལླཱསཾ པཛཧཏི, ཕསྶོ ཙསྶ ཨཱཧཱརོ པརིཉྙཾ གཙྪཏི, བྷཝཱུཔཱདཱནེན ཙ ཨནུཔཱདཱནོ བྷཝཏི, བྷཝཡོགེན ཙ ཝིསཾཡུཏྟོ བྷཝཏི, བྱཱཔཱདཀཱཡགནྠེན ཙ ཝིཔྤཡུཛྫཏི, བྷཝཱསཝེན ཙ ཨནཱསཝོ བྷཝཏི, བྷཝོགྷཉྩ ཨུཏྟིཎྞོ བྷཝཏི, དོསསལླེན ཙ ཝིསལློ བྷཝཏི, ཝེདནཱུཔིཀཱ ཙསྶ ཝིཉྙཱཎཊྛིཏི པརིཉྙཾ གཙྪཏི, ཝེདནཱདྷཱཏུཡཾ ཙསྶ རཱགོ པཧཱིནོ བྷཝཏི, ན ཙ དོསཱགཏིཾ གཙྪཏི།
Vedanāsu vedanānupassī viharanto ‘‘dukkhe sukha’’nti vipallāsaṃ pajahati, phasso cassa āhāro pariññaṃ gacchati, bhavūpādānena ca anupādāno bhavati, bhavayogena ca visaṃyutto bhavati, byāpādakāyaganthena ca vippayujjati, bhavāsavena ca anāsavo bhavati, bhavoghañca uttiṇṇo bhavati, dosasallena ca visallo bhavati, vedanūpikā cassa viññāṇaṭṭhiti pariññaṃ gacchati, vedanādhātuyaṃ cassa rāgo pahīno bhavati, na ca dosāgatiṃ gacchati.
ཙིཏྟེ ཙིཏྟཱནུཔསྶཱི ཝིཧརནྟོ ‘‘ཨནིཙྩེ ནིཙྩ’’ནྟི ཝིཔལླཱསཾ པཛཧཏི, ཝིཉྙཱཎཾ ཙསྶ ཨཱཧཱརོ པརིཉྙཾ གཙྪཏི, དིཊྛུཔཱདཱནེན ཙ ཨནུཔཱདཱནོ བྷཝཏི, དིཊྛིཡོགེན ཙ ཝིསཾཡུཏྟོ བྷཝཏི, སཱིལབྦཏཔརཱམཱསཀཱཡགནྠེན ཙ ཝིཔྤཡུཛྫཏི, དིཊྛཱསཝེན ཙ ཨནཱསཝོ བྷཝཏི, དིཊྛོགྷཉྩ ཨུཏྟིཎྞོ བྷཝཏི, མཱནསལླེན ཙ ཝིསལློ བྷཝཏི, སཉྙཱུཔིཀཱ ཙསྶ ཝིཉྙཱཎཊྛིཏི པརིཉྙཾ གཙྪཏི, སཉྙཱདྷཱཏུཡཾ ཙསྶ རཱགོ པཧཱིནོ བྷཝཏི, ན ཙ བྷཡཱགཏིཾ གཙྪཏི།
Citte cittānupassī viharanto ‘‘anicce nicca’’nti vipallāsaṃ pajahati, viññāṇaṃ cassa āhāro pariññaṃ gacchati, diṭṭhupādānena ca anupādāno bhavati, diṭṭhiyogena ca visaṃyutto bhavati, sīlabbataparāmāsakāyaganthena ca vippayujjati, diṭṭhāsavena ca anāsavo bhavati, diṭṭhoghañca uttiṇṇo bhavati, mānasallena ca visallo bhavati, saññūpikā cassa viññāṇaṭṭhiti pariññaṃ gacchati, saññādhātuyaṃ cassa rāgo pahīno bhavati, na ca bhayāgatiṃ gacchati.
དྷམྨེསུ དྷམྨཱནུཔསྶཱི ཝིཧརནྟོ ‘‘ཨནཏྟནི 3 ཨཏྟཱ’’ཏི ཝིཔལླཱསཾ པཛཧཏི, མནོསཉྩེཏནཱ ཙསྶ ཨཱཧཱརོ པརིཉྙཾ གཙྪཏི, ཨཏྟཝཱདུཔཱདཱནེན ཙ ཨནུཔཱདཱནོ བྷཝཏི, ཨཝིཛྫཱཡོགེན ཙ ཝིསཾཡུཏྟོ བྷཝཏི, ཨིདཾསཙྩཱབྷིནིཝེསཀཱཡགནྠེན ཙ ཝིཔྤཡུཛྫཏི, ཨཝིཛྫཱསཝེན ཙ ཨནཱསཝོ བྷཝཏི, ཨཝིཛྫོགྷཉྩ ཨུཏྟིཎྞོ བྷཝཏི, མོཧསལླེན ཙ ཝིསལློ བྷཝཏི , སངྑཱརཱུཔིཀཱ ཙསྶ ཝིཉྙཱཎཊྛིཏི པརིཉྙཾ གཙྪཏི, སངྑཱརདྷཱཏུཡཾ ཙསྶ རཱགོ པཧཱིནོ བྷཝཏི, ན ཙ མོཧཱགཏིཾ གཙྪཏི། ཨཡཾ པཧཱནེན སམཱརོཔནཱ།
Dhammesu dhammānupassī viharanto ‘‘anattani 4 attā’’ti vipallāsaṃ pajahati, manosañcetanā cassa āhāro pariññaṃ gacchati, attavādupādānena ca anupādāno bhavati, avijjāyogena ca visaṃyutto bhavati, idaṃsaccābhinivesakāyaganthena ca vippayujjati, avijjāsavena ca anāsavo bhavati, avijjoghañca uttiṇṇo bhavati, mohasallena ca visallo bhavati , saṅkhārūpikā cassa viññāṇaṭṭhiti pariññaṃ gacchati, saṅkhāradhātuyaṃ cassa rāgo pahīno bhavati, na ca mohāgatiṃ gacchati. Ayaṃ pahānena samāropanā.
ཏེནཱཧ ཨཱཡསྨཱ མཧཱཀཙྩཱཡནོ –
Tenāha āyasmā mahākaccāyano –
‘‘ཡེ དྷམྨཱ ཡཾ མཱུལཱ, ཡེ ཙེཀཏྠཱ པཀཱསིཏཱ མུནིནཱ།
‘‘Ye dhammā yaṃ mūlā, ye cekatthā pakāsitā muninā;
ཏེ སམཱརོཔཡིཏབྦཱ, ཨེས སམཱརོཔནོ ཧཱརོ’’ཏི༎
Te samāropayitabbā, esa samāropano hāro’’ti.
ནིཡུཏྟོ སམཱརོཔནོ ཧཱརོ།
Niyutto samāropano hāro.
ནིཊྛིཏོ ཙ ཧཱརཝིབྷངྒོ།
Niṭṭhito ca hāravibhaṅgo.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / ནེཏྟིཔྤཀརཎ-ཨཊྛཀཐཱ • Nettippakaraṇa-aṭṭhakathā / ༡༦. སམཱརོཔནཧཱརཝིབྷངྒཝཎྞནཱ • 16. Samāropanahāravibhaṅgavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཔྤཀརཎ-ཊཱིཀཱ • Nettippakaraṇa-ṭīkā / ༡༦. སམཱརོཔནཧཱརཝིབྷངྒཝཎྞནཱ • 16. Samāropanahāravibhaṅgavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཝིབྷཱཝིནཱི • Nettivibhāvinī / ༡༦. སམཱརོཔནཧཱརཝིབྷངྒཝིབྷཱཝནཱ • 16. Samāropanahāravibhaṅgavibhāvanā
