| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
7. ஸமஸீஸகதா²
7. Samasīsakathā
33. ஸப்³ப³த⁴ம்மானங் 1 ஸம்மாஸமுச்சே²தே³ நிரோதே⁴ ச அனுபட்டா²னதா பஞ்ஞா ஸமஸீஸட்டே² ஞாணங்.
33. Sabbadhammānaṃ 2 sammāsamucchede nirodhe ca anupaṭṭhānatā paññā samasīsaṭṭhe ñāṇaṃ.
ஸப்³ப³த⁴ம்மானந்தி பஞ்சக்க²ந்தா⁴, த்³வாத³ஸாயதனானி, அட்டா²ரஸ தா⁴துயோ, குஸலா த⁴ம்மா, அகுஸலா த⁴ம்மா, அப்³யாகதா த⁴ம்மா, காமாவசரா த⁴ம்மா, ரூபாவசரா த⁴ம்மா, அரூபாவசரா த⁴ம்மா, அபரியாபன்னா த⁴ம்மா. ஸம்மா ஸமுச்சே²தே³தி நெக்க²ம்மேன காமச்ச²ந்த³ங் ஸம்மா ஸமுச்சி²ந்த³தி, அப்³யாபாதே³ன ப்³யாபாத³ங் ஸம்மா ஸமுச்சி²ந்த³தி, ஆலோகஸஞ்ஞாய தி²னமித்³த⁴ங் ஸம்மா ஸமுச்சி²ந்த³தி, அவிக்கே²பேன உத்³த⁴ச்சங் ஸம்மா ஸமுச்சி²ந்த³தி, த⁴ம்மவவத்தா²னேன விசிகிச்ச²ங் ஸம்மா ஸமுச்சி²ந்த³தி, ஞாணேன அவிஜ்ஜங் ஸம்மா ஸமுச்சி²ந்த³தி, பாமோஜ்ஜேன அரதிங் ஸம்மா ஸமுச்சி²ந்த³தி, பட²மேன ஜா²னேன நீவரணே ஸம்மா ஸமுச்சி²ந்த³தி…பே॰… அரஹத்தமக்³கே³ன ஸப்³ப³கிலேஸே ஸம்மா ஸமுச்சி²ந்த³தி.
Sabbadhammānanti pañcakkhandhā, dvādasāyatanāni, aṭṭhārasa dhātuyo, kusalā dhammā, akusalā dhammā, abyākatā dhammā, kāmāvacarā dhammā, rūpāvacarā dhammā, arūpāvacarā dhammā, apariyāpannā dhammā. Sammā samucchedeti nekkhammena kāmacchandaṃ sammā samucchindati, abyāpādena byāpādaṃ sammā samucchindati, ālokasaññāya thinamiddhaṃ sammā samucchindati, avikkhepena uddhaccaṃ sammā samucchindati, dhammavavatthānena vicikicchaṃ sammā samucchindati, ñāṇena avijjaṃ sammā samucchindati, pāmojjena aratiṃ sammā samucchindati, paṭhamena jhānena nīvaraṇe sammā samucchindati…pe… arahattamaggena sabbakilese sammā samucchindati.
நிரோதே⁴தி நெக்க²ம்மேன காமச்ச²ந்த³ங் நிரோதே⁴தி, அப்³யாபாதே³ன ப்³யாபாத³ங் நிரோதே⁴தி, ஆலோகஸஞ்ஞாய தி²னமித்³த⁴ங் நிரோதே⁴தி, அவிக்கே²பேன உத்³த⁴ச்சங் நிரோதே⁴தி, த⁴ம்மவவத்தா²னேன விசிகிச்ச²ங் நிரோதே⁴தி, ஞாணேன அவிஜ்ஜங் நிரோதே⁴தி, பாமோஜ்ஜேன அரதிங் நிரோதே⁴தி, பட²மேன ஜா²னேன நீவரணே நிரோதே⁴தி…பே॰… அரஹத்தமக்³கே³ன ஸப்³ப³கிலேஸே நிரோதே⁴தி.
Nirodheti nekkhammena kāmacchandaṃ nirodheti, abyāpādena byāpādaṃ nirodheti, ālokasaññāya thinamiddhaṃ nirodheti, avikkhepena uddhaccaṃ nirodheti, dhammavavatthānena vicikicchaṃ nirodheti, ñāṇena avijjaṃ nirodheti, pāmojjena aratiṃ nirodheti, paṭhamena jhānena nīvaraṇe nirodheti…pe… arahattamaggena sabbakilese nirodheti.
அனுபட்டா²னதாதி நெக்க²ம்மங் படிலத்³த⁴ஸ்ஸ காமச்ச²ந்தோ³ ந உபட்டா²தி, அப்³யாபாத³ங் படிலத்³த⁴ஸ்ஸ ப்³யாபாதோ³ ந உபட்டா²தி, ஆலோகஸஞ்ஞங் படிலத்³த⁴ஸ்ஸ தி²னமித்³த⁴ங் ந உபட்டா²தி, அவிக்கே²பங் படிலத்³த⁴ஸ்ஸ உத்³த⁴ச்சங் ந உபட்டா²தி, த⁴ம்மவவத்தா²னங் படிலத்³த⁴ஸ்ஸ விசிகிச்சா² ந உபட்டா²தி, ஞாணங் படிலத்³த⁴ஸ்ஸ அவிஜ்ஜா ந உபட்டா²தி, பாமோஜ்ஜங் படிலத்³த⁴ஸ்ஸ அரதி ந உபட்டா²தி, பட²மங் ஜா²னங் படிலத்³த⁴ஸ்ஸ நீவரணா ந உபட்ட²ந்தி…பே॰… அரஹத்தமக்³க³ங் படிலத்³த⁴ஸ்ஸ ஸப்³ப³கிலேஸா ந உபட்ட²ந்தி.
Anupaṭṭhānatāti nekkhammaṃ paṭiladdhassa kāmacchando na upaṭṭhāti, abyāpādaṃ paṭiladdhassa byāpādo na upaṭṭhāti, ālokasaññaṃ paṭiladdhassa thinamiddhaṃ na upaṭṭhāti, avikkhepaṃ paṭiladdhassa uddhaccaṃ na upaṭṭhāti, dhammavavatthānaṃ paṭiladdhassa vicikicchā na upaṭṭhāti, ñāṇaṃ paṭiladdhassa avijjā na upaṭṭhāti, pāmojjaṃ paṭiladdhassa arati na upaṭṭhāti, paṭhamaṃ jhānaṃ paṭiladdhassa nīvaraṇā na upaṭṭhanti…pe… arahattamaggaṃ paṭiladdhassa sabbakilesā na upaṭṭhanti.
ஸமந்தி காமச்ச²ந்த³ஸ்ஸ பஹீனத்தா நெக்க²ம்மங் ஸமங், ப்³யாபாத³ஸ்ஸ பஹீனத்தா அப்³யாபாதோ³ ஸமங், தி²னமித்³த⁴ஸ்ஸ பஹீனத்தா ஆலோகஸஞ்ஞா ஸமங், உத்³த⁴ச்சஸ்ஸ பஹீனத்தா அவிக்கே²போ ஸமங், விசிகிச்சா²ய பஹீனத்தா த⁴ம்மவவத்தா²னங் ஸமங், அவிஜ்ஜாய பஹீனத்தா ஞாணங் ஸமங், அரதியா பஹீனத்தா பாமோஜ்ஜங் ஸமங், நீவரணானங் பஹீனத்தா பட²மங் ஜா²னங் ஸமங்…பே॰… ஸப்³ப³கிலேஸானங் பஹீனத்தா அரஹத்தமக்³கோ³ ஸமங்.
Samanti kāmacchandassa pahīnattā nekkhammaṃ samaṃ, byāpādassa pahīnattā abyāpādo samaṃ, thinamiddhassa pahīnattā ālokasaññā samaṃ, uddhaccassa pahīnattā avikkhepo samaṃ, vicikicchāya pahīnattā dhammavavatthānaṃ samaṃ, avijjāya pahīnattā ñāṇaṃ samaṃ, aratiyā pahīnattā pāmojjaṃ samaṃ, nīvaraṇānaṃ pahīnattā paṭhamaṃ jhānaṃ samaṃ…pe… sabbakilesānaṃ pahīnattā arahattamaggo samaṃ.
ஸீஸந்தி தேரஸ ஸீஸானி – பலிபோ³த⁴ஸீஸஞ்ச தண்ஹா, வினிப³ந்த⁴னஸீஸஞ்ச மானோ , பராமாஸஸீஸஞ்ச தி³ட்டி², விக்கே²பஸீஸஞ்ச உத்³த⁴ச்சங், ஸங்கிலேஸஸீஸஞ்ச அவிஜ்ஜா, அதி⁴மொக்க²ஸீஸஞ்ச ஸத்³தா⁴, பக்³க³ஹஸீஸஞ்ச வீரியங், உபட்டா²னஸீஸஞ்ச ஸதி, அவிக்கே²பஸீஸஞ்ச ஸமாதி⁴, த³ஸ்ஸனஸீஸஞ்ச பஞ்ஞா, பவத்தஸீஸஞ்ச ஜீவிதிந்த்³ரியங், கோ³சரஸீஸஞ்ச விமொக்கோ², ஸங்கா²ரஸீஸஞ்ச நிரோதோ⁴தி.
Sīsanti terasa sīsāni – palibodhasīsañca taṇhā, vinibandhanasīsañca māno , parāmāsasīsañca diṭṭhi, vikkhepasīsañca uddhaccaṃ, saṃkilesasīsañca avijjā, adhimokkhasīsañca saddhā, paggahasīsañca vīriyaṃ, upaṭṭhānasīsañca sati, avikkhepasīsañca samādhi, dassanasīsañca paññā, pavattasīsañca jīvitindriyaṃ, gocarasīsañca vimokkho, saṅkhārasīsañca nirodhoti.
ஸமஸீஸகதா² நிட்டி²தா.
Samasīsakathā niṭṭhitā.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / ஸமஸீஸகதா²வண்ணனா • Samasīsakathāvaṇṇanā
