| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৭. সমসীসকথা
7. Samasīsakathā
৩৩. সব্বধম্মানং 1 সম্মাসমুচ্ছেদে নিরোধে চ অনুপট্ঠানতা পঞ্ঞা সমসীসট্ঠে ঞাণং।
33. Sabbadhammānaṃ 2 sammāsamucchede nirodhe ca anupaṭṭhānatā paññā samasīsaṭṭhe ñāṇaṃ.
সব্বধম্মানন্তি পঞ্চক্খন্ধা, দ্ৰাদসাযতনানি, অট্ঠারস ধাতুযো, কুসলা ধম্মা, অকুসলা ধম্মা, অব্যাকতা ধম্মা, কামাৰচরা ধম্মা, রূপাৰচরা ধম্মা, অরূপাৰচরা ধম্মা, অপরিযাপন্না ধম্মা। সম্মা সমুচ্ছেদেতি নেক্খম্মেন কামচ্ছন্দং সম্মা সমুচ্ছিন্দতি, অব্যাপাদেন ব্যাপাদং সম্মা সমুচ্ছিন্দতি, আলোকসঞ্ঞায থিনমিদ্ধং সম্মা সমুচ্ছিন্দতি, অৰিক্খেপেন উদ্ধচ্চং সম্মা সমুচ্ছিন্দতি, ধম্মৰৰত্থানেন ৰিচিকিচ্ছং সম্মা সমুচ্ছিন্দতি, ঞাণেন অৰিজ্জং সম্মা সমুচ্ছিন্দতি, পামোজ্জেন অরতিং সম্মা সমুচ্ছিন্দতি, পঠমেন ঝানেন নীৰরণে সম্মা সমুচ্ছিন্দতি…পে॰… অরহত্তমগ্গেন সব্বকিলেসে সম্মা সমুচ্ছিন্দতি।
Sabbadhammānanti pañcakkhandhā, dvādasāyatanāni, aṭṭhārasa dhātuyo, kusalā dhammā, akusalā dhammā, abyākatā dhammā, kāmāvacarā dhammā, rūpāvacarā dhammā, arūpāvacarā dhammā, apariyāpannā dhammā. Sammā samucchedeti nekkhammena kāmacchandaṃ sammā samucchindati, abyāpādena byāpādaṃ sammā samucchindati, ālokasaññāya thinamiddhaṃ sammā samucchindati, avikkhepena uddhaccaṃ sammā samucchindati, dhammavavatthānena vicikicchaṃ sammā samucchindati, ñāṇena avijjaṃ sammā samucchindati, pāmojjena aratiṃ sammā samucchindati, paṭhamena jhānena nīvaraṇe sammā samucchindati…pe… arahattamaggena sabbakilese sammā samucchindati.
নিরোধেতি নেক্খম্মেন কামচ্ছন্দং নিরোধেতি, অব্যাপাদেন ব্যাপাদং নিরোধেতি, আলোকসঞ্ঞায থিনমিদ্ধং নিরোধেতি, অৰিক্খেপেন উদ্ধচ্চং নিরোধেতি, ধম্মৰৰত্থানেন ৰিচিকিচ্ছং নিরোধেতি, ঞাণেন অৰিজ্জং নিরোধেতি, পামোজ্জেন অরতিং নিরোধেতি, পঠমেন ঝানেন নীৰরণে নিরোধেতি…পে॰… অরহত্তমগ্গেন সব্বকিলেসে নিরোধেতি।
Nirodheti nekkhammena kāmacchandaṃ nirodheti, abyāpādena byāpādaṃ nirodheti, ālokasaññāya thinamiddhaṃ nirodheti, avikkhepena uddhaccaṃ nirodheti, dhammavavatthānena vicikicchaṃ nirodheti, ñāṇena avijjaṃ nirodheti, pāmojjena aratiṃ nirodheti, paṭhamena jhānena nīvaraṇe nirodheti…pe… arahattamaggena sabbakilese nirodheti.
অনুপট্ঠানতাতি নেক্খম্মং পটিলদ্ধস্স কামচ্ছন্দো ন উপট্ঠাতি, অব্যাপাদং পটিলদ্ধস্স ব্যাপাদো ন উপট্ঠাতি, আলোকসঞ্ঞং পটিলদ্ধস্স থিনমিদ্ধং ন উপট্ঠাতি, অৰিক্খেপং পটিলদ্ধস্স উদ্ধচ্চং ন উপট্ঠাতি, ধম্মৰৰত্থানং পটিলদ্ধস্স ৰিচিকিচ্ছা ন উপট্ঠাতি, ঞাণং পটিলদ্ধস্স অৰিজ্জা ন উপট্ঠাতি, পামোজ্জং পটিলদ্ধস্স অরতি ন উপট্ঠাতি, পঠমং ঝানং পটিলদ্ধস্স নীৰরণা ন উপট্ঠন্তি…পে॰… অরহত্তমগ্গং পটিলদ্ধস্স সব্বকিলেসা ন উপট্ঠন্তি।
Anupaṭṭhānatāti nekkhammaṃ paṭiladdhassa kāmacchando na upaṭṭhāti, abyāpādaṃ paṭiladdhassa byāpādo na upaṭṭhāti, ālokasaññaṃ paṭiladdhassa thinamiddhaṃ na upaṭṭhāti, avikkhepaṃ paṭiladdhassa uddhaccaṃ na upaṭṭhāti, dhammavavatthānaṃ paṭiladdhassa vicikicchā na upaṭṭhāti, ñāṇaṃ paṭiladdhassa avijjā na upaṭṭhāti, pāmojjaṃ paṭiladdhassa arati na upaṭṭhāti, paṭhamaṃ jhānaṃ paṭiladdhassa nīvaraṇā na upaṭṭhanti…pe… arahattamaggaṃ paṭiladdhassa sabbakilesā na upaṭṭhanti.
সমন্তি কামচ্ছন্দস্স পহীনত্তা নেক্খম্মং সমং, ব্যাপাদস্স পহীনত্তা অব্যাপাদো সমং, থিনমিদ্ধস্স পহীনত্তা আলোকসঞ্ঞা সমং, উদ্ধচ্চস্স পহীনত্তা অৰিক্খেপো সমং, ৰিচিকিচ্ছায পহীনত্তা ধম্মৰৰত্থানং সমং, অৰিজ্জায পহীনত্তা ঞাণং সমং, অরতিযা পহীনত্তা পামোজ্জং সমং, নীৰরণানং পহীনত্তা পঠমং ঝানং সমং…পে॰… সব্বকিলেসানং পহীনত্তা অরহত্তমগ্গো সমং।
Samanti kāmacchandassa pahīnattā nekkhammaṃ samaṃ, byāpādassa pahīnattā abyāpādo samaṃ, thinamiddhassa pahīnattā ālokasaññā samaṃ, uddhaccassa pahīnattā avikkhepo samaṃ, vicikicchāya pahīnattā dhammavavatthānaṃ samaṃ, avijjāya pahīnattā ñāṇaṃ samaṃ, aratiyā pahīnattā pāmojjaṃ samaṃ, nīvaraṇānaṃ pahīnattā paṭhamaṃ jhānaṃ samaṃ…pe… sabbakilesānaṃ pahīnattā arahattamaggo samaṃ.
সীসন্তি তেরস সীসানি – পলিবোধসীসঞ্চ তণ্হা, ৰিনিবন্ধনসীসঞ্চ মানো , পরামাসসীসঞ্চ দিট্ঠি, ৰিক্খেপসীসঞ্চ উদ্ধচ্চং, সংকিলেসসীসঞ্চ অৰিজ্জা, অধিমোক্খসীসঞ্চ সদ্ধা, পগ্গহসীসঞ্চ ৰীরিযং, উপট্ঠানসীসঞ্চ সতি, অৰিক্খেপসীসঞ্চ সমাধি, দস্সনসীসঞ্চ পঞ্ঞা, পৰত্তসীসঞ্চ জীৰিতিন্দ্রিযং, গোচরসীসঞ্চ ৰিমোক্খো, সঙ্খারসীসঞ্চ নিরোধোতি।
Sīsanti terasa sīsāni – palibodhasīsañca taṇhā, vinibandhanasīsañca māno , parāmāsasīsañca diṭṭhi, vikkhepasīsañca uddhaccaṃ, saṃkilesasīsañca avijjā, adhimokkhasīsañca saddhā, paggahasīsañca vīriyaṃ, upaṭṭhānasīsañca sati, avikkhepasīsañca samādhi, dassanasīsañca paññā, pavattasīsañca jīvitindriyaṃ, gocarasīsañca vimokkho, saṅkhārasīsañca nirodhoti.
সমসীসকথা নিট্ঠিতা।
Samasīsakathā niṭṭhitā.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / সমসীসকথাৰণ্ণনা • Samasīsakathāvaṇṇanā
