| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༧. སམསཱིསཀཐཱ
7. Samasīsakathā
༣༣. སབྦདྷམྨཱནཾ 1 སམྨཱསམུཙྪེདེ ནིརོདྷེ ཙ ཨནུཔཊྛཱནཏཱ པཉྙཱ སམསཱིསཊྛེ ཉཱཎཾ།
33. Sabbadhammānaṃ 2 sammāsamucchede nirodhe ca anupaṭṭhānatā paññā samasīsaṭṭhe ñāṇaṃ.
སབྦདྷམྨཱནནྟི པཉྩཀྑནྡྷཱ, དྭཱདསཱཡཏནཱནི, ཨཊྛཱརས དྷཱཏུཡོ, ཀུསལཱ དྷམྨཱ, ཨཀུསལཱ དྷམྨཱ, ཨབྱཱཀཏཱ དྷམྨཱ, ཀཱམཱཝཙརཱ དྷམྨཱ, རཱུཔཱཝཙརཱ དྷམྨཱ, ཨརཱུཔཱཝཙརཱ དྷམྨཱ, ཨཔརིཡཱཔནྣཱ དྷམྨཱ། སམྨཱ སམུཙྪེདེཏི ནེཀྑམྨེན ཀཱམཙྪནྡཾ སམྨཱ སམུཙྪིནྡཏི, ཨབྱཱཔཱདེན བྱཱཔཱདཾ སམྨཱ སམུཙྪིནྡཏི, ཨཱལོཀསཉྙཱཡ ཐིནམིདྡྷཾ སམྨཱ སམུཙྪིནྡཏི, ཨཝིཀྑེཔེན ཨུདྡྷཙྩཾ སམྨཱ སམུཙྪིནྡཏི, དྷམྨཝཝཏྠཱནེན ཝིཙིཀིཙྪཾ སམྨཱ སམུཙྪིནྡཏི, ཉཱཎེན ཨཝིཛྫཾ སམྨཱ སམུཙྪིནྡཏི, པཱམོཛྫེན ཨརཏིཾ སམྨཱ སམུཙྪིནྡཏི, པཋམེན ཛྷཱནེན ནཱིཝརཎེ སམྨཱ སམུཙྪིནྡཏི…པེ॰… ཨརཧཏྟམགྒེན སབྦཀིལེསེ སམྨཱ སམུཙྪིནྡཏི།
Sabbadhammānanti pañcakkhandhā, dvādasāyatanāni, aṭṭhārasa dhātuyo, kusalā dhammā, akusalā dhammā, abyākatā dhammā, kāmāvacarā dhammā, rūpāvacarā dhammā, arūpāvacarā dhammā, apariyāpannā dhammā. Sammā samucchedeti nekkhammena kāmacchandaṃ sammā samucchindati, abyāpādena byāpādaṃ sammā samucchindati, ālokasaññāya thinamiddhaṃ sammā samucchindati, avikkhepena uddhaccaṃ sammā samucchindati, dhammavavatthānena vicikicchaṃ sammā samucchindati, ñāṇena avijjaṃ sammā samucchindati, pāmojjena aratiṃ sammā samucchindati, paṭhamena jhānena nīvaraṇe sammā samucchindati…pe… arahattamaggena sabbakilese sammā samucchindati.
ནིརོདྷེཏི ནེཀྑམྨེན ཀཱམཙྪནྡཾ ནིརོདྷེཏི, ཨབྱཱཔཱདེན བྱཱཔཱདཾ ནིརོདྷེཏི, ཨཱལོཀསཉྙཱཡ ཐིནམིདྡྷཾ ནིརོདྷེཏི, ཨཝིཀྑེཔེན ཨུདྡྷཙྩཾ ནིརོདྷེཏི, དྷམྨཝཝཏྠཱནེན ཝིཙིཀིཙྪཾ ནིརོདྷེཏི, ཉཱཎེན ཨཝིཛྫཾ ནིརོདྷེཏི, པཱམོཛྫེན ཨརཏིཾ ནིརོདྷེཏི, པཋམེན ཛྷཱནེན ནཱིཝརཎེ ནིརོདྷེཏི…པེ॰… ཨརཧཏྟམགྒེན སབྦཀིལེསེ ནིརོདྷེཏི།
Nirodheti nekkhammena kāmacchandaṃ nirodheti, abyāpādena byāpādaṃ nirodheti, ālokasaññāya thinamiddhaṃ nirodheti, avikkhepena uddhaccaṃ nirodheti, dhammavavatthānena vicikicchaṃ nirodheti, ñāṇena avijjaṃ nirodheti, pāmojjena aratiṃ nirodheti, paṭhamena jhānena nīvaraṇe nirodheti…pe… arahattamaggena sabbakilese nirodheti.
ཨནུཔཊྛཱནཏཱཏི ནེཀྑམྨཾ པཊིལདྡྷསྶ ཀཱམཙྪནྡོ ན ཨུཔཊྛཱཏི, ཨབྱཱཔཱདཾ པཊིལདྡྷསྶ བྱཱཔཱདོ ན ཨུཔཊྛཱཏི, ཨཱལོཀསཉྙཾ པཊིལདྡྷསྶ ཐིནམིདྡྷཾ ན ཨུཔཊྛཱཏི, ཨཝིཀྑེཔཾ པཊིལདྡྷསྶ ཨུདྡྷཙྩཾ ན ཨུཔཊྛཱཏི, དྷམྨཝཝཏྠཱནཾ པཊིལདྡྷསྶ ཝིཙིཀིཙྪཱ ན ཨུཔཊྛཱཏི, ཉཱཎཾ པཊིལདྡྷསྶ ཨཝིཛྫཱ ན ཨུཔཊྛཱཏི, པཱམོཛྫཾ པཊིལདྡྷསྶ ཨརཏི ན ཨུཔཊྛཱཏི, པཋམཾ ཛྷཱནཾ པཊིལདྡྷསྶ ནཱིཝརཎཱ ན ཨུཔཊྛནྟི…པེ॰… ཨརཧཏྟམགྒཾ པཊིལདྡྷསྶ སབྦཀིལེསཱ ན ཨུཔཊྛནྟི།
Anupaṭṭhānatāti nekkhammaṃ paṭiladdhassa kāmacchando na upaṭṭhāti, abyāpādaṃ paṭiladdhassa byāpādo na upaṭṭhāti, ālokasaññaṃ paṭiladdhassa thinamiddhaṃ na upaṭṭhāti, avikkhepaṃ paṭiladdhassa uddhaccaṃ na upaṭṭhāti, dhammavavatthānaṃ paṭiladdhassa vicikicchā na upaṭṭhāti, ñāṇaṃ paṭiladdhassa avijjā na upaṭṭhāti, pāmojjaṃ paṭiladdhassa arati na upaṭṭhāti, paṭhamaṃ jhānaṃ paṭiladdhassa nīvaraṇā na upaṭṭhanti…pe… arahattamaggaṃ paṭiladdhassa sabbakilesā na upaṭṭhanti.
སམནྟི ཀཱམཙྪནྡསྶ པཧཱིནཏྟཱ ནེཀྑམྨཾ སམཾ, བྱཱཔཱདསྶ པཧཱིནཏྟཱ ཨབྱཱཔཱདོ སམཾ, ཐིནམིདྡྷསྶ པཧཱིནཏྟཱ ཨཱལོཀསཉྙཱ སམཾ, ཨུདྡྷཙྩསྶ པཧཱིནཏྟཱ ཨཝིཀྑེཔོ སམཾ, ཝིཙིཀིཙྪཱཡ པཧཱིནཏྟཱ དྷམྨཝཝཏྠཱནཾ སམཾ, ཨཝིཛྫཱཡ པཧཱིནཏྟཱ ཉཱཎཾ སམཾ, ཨརཏིཡཱ པཧཱིནཏྟཱ པཱམོཛྫཾ སམཾ, ནཱིཝརཎཱནཾ པཧཱིནཏྟཱ པཋམཾ ཛྷཱནཾ སམཾ…པེ॰… སབྦཀིལེསཱནཾ པཧཱིནཏྟཱ ཨརཧཏྟམགྒོ སམཾ།
Samanti kāmacchandassa pahīnattā nekkhammaṃ samaṃ, byāpādassa pahīnattā abyāpādo samaṃ, thinamiddhassa pahīnattā ālokasaññā samaṃ, uddhaccassa pahīnattā avikkhepo samaṃ, vicikicchāya pahīnattā dhammavavatthānaṃ samaṃ, avijjāya pahīnattā ñāṇaṃ samaṃ, aratiyā pahīnattā pāmojjaṃ samaṃ, nīvaraṇānaṃ pahīnattā paṭhamaṃ jhānaṃ samaṃ…pe… sabbakilesānaṃ pahīnattā arahattamaggo samaṃ.
སཱིསནྟི ཏེརས སཱིསཱནི – པལིབོདྷསཱིསཉྩ ཏཎྷཱ, ཝིནིབནྡྷནསཱིསཉྩ མཱནོ , པརཱམཱསསཱིསཉྩ དིཊྛི, ཝིཀྑེཔསཱིསཉྩ ཨུདྡྷཙྩཾ, སཾཀིལེསསཱིསཉྩ ཨཝིཛྫཱ, ཨདྷིམོཀྑསཱིསཉྩ སདྡྷཱ, པགྒཧསཱིསཉྩ ཝཱིརིཡཾ, ཨུཔཊྛཱནསཱིསཉྩ སཏི, ཨཝིཀྑེཔསཱིསཉྩ སམཱདྷི, དསྶནསཱིསཉྩ པཉྙཱ, པཝཏྟསཱིསཉྩ ཛཱིཝིཏིནྡྲིཡཾ, གོཙརསཱིསཉྩ ཝིམོཀྑོ, སངྑཱརསཱིསཉྩ ནིརོདྷོཏི།
Sīsanti terasa sīsāni – palibodhasīsañca taṇhā, vinibandhanasīsañca māno , parāmāsasīsañca diṭṭhi, vikkhepasīsañca uddhaccaṃ, saṃkilesasīsañca avijjā, adhimokkhasīsañca saddhā, paggahasīsañca vīriyaṃ, upaṭṭhānasīsañca sati, avikkhepasīsañca samādhi, dassanasīsañca paññā, pavattasīsañca jīvitindriyaṃ, gocarasīsañca vimokkho, saṅkhārasīsañca nirodhoti.
སམསཱིསཀཐཱ ནིཊྛིཏཱ།
Samasīsakathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / སམསཱིསཀཐཱཝཎྞནཱ • Samasīsakathāvaṇṇanā
