| Library / Tipiṭaka / തിപിടക • Tipiṭaka / പടിസമ്ഭിദാമഗ്ഗപാളി • Paṭisambhidāmaggapāḷi |
൭. സമസീസകഥാ
7. Samasīsakathā
൩൩. സബ്ബധമ്മാനം 1 സമ്മാസമുച്ഛേദേ നിരോധേ ച അനുപട്ഠാനതാ പഞ്ഞാ സമസീസട്ഠേ ഞാണം.
33. Sabbadhammānaṃ 2 sammāsamucchede nirodhe ca anupaṭṭhānatā paññā samasīsaṭṭhe ñāṇaṃ.
സബ്ബധമ്മാനന്തി പഞ്ചക്ഖന്ധാ, ദ്വാദസായതനാനി, അട്ഠാരസ ധാതുയോ, കുസലാ ധമ്മാ, അകുസലാ ധമ്മാ, അബ്യാകതാ ധമ്മാ, കാമാവചരാ ധമ്മാ, രൂപാവചരാ ധമ്മാ, അരൂപാവചരാ ധമ്മാ, അപരിയാപന്നാ ധമ്മാ. സമ്മാ സമുച്ഛേദേതി നേക്ഖമ്മേന കാമച്ഛന്ദം സമ്മാ സമുച്ഛിന്ദതി, അബ്യാപാദേന ബ്യാപാദം സമ്മാ സമുച്ഛിന്ദതി, ആലോകസഞ്ഞായ ഥിനമിദ്ധം സമ്മാ സമുച്ഛിന്ദതി, അവിക്ഖേപേന ഉദ്ധച്ചം സമ്മാ സമുച്ഛിന്ദതി, ധമ്മവവത്ഥാനേന വിചികിച്ഛം സമ്മാ സമുച്ഛിന്ദതി, ഞാണേന അവിജ്ജം സമ്മാ സമുച്ഛിന്ദതി, പാമോജ്ജേന അരതിം സമ്മാ സമുച്ഛിന്ദതി, പഠമേന ഝാനേന നീവരണേ സമ്മാ സമുച്ഛിന്ദതി…പേ॰… അരഹത്തമഗ്ഗേന സബ്ബകിലേസേ സമ്മാ സമുച്ഛിന്ദതി.
Sabbadhammānanti pañcakkhandhā, dvādasāyatanāni, aṭṭhārasa dhātuyo, kusalā dhammā, akusalā dhammā, abyākatā dhammā, kāmāvacarā dhammā, rūpāvacarā dhammā, arūpāvacarā dhammā, apariyāpannā dhammā. Sammā samucchedeti nekkhammena kāmacchandaṃ sammā samucchindati, abyāpādena byāpādaṃ sammā samucchindati, ālokasaññāya thinamiddhaṃ sammā samucchindati, avikkhepena uddhaccaṃ sammā samucchindati, dhammavavatthānena vicikicchaṃ sammā samucchindati, ñāṇena avijjaṃ sammā samucchindati, pāmojjena aratiṃ sammā samucchindati, paṭhamena jhānena nīvaraṇe sammā samucchindati…pe… arahattamaggena sabbakilese sammā samucchindati.
നിരോധേതി നേക്ഖമ്മേന കാമച്ഛന്ദം നിരോധേതി, അബ്യാപാദേന ബ്യാപാദം നിരോധേതി, ആലോകസഞ്ഞായ ഥിനമിദ്ധം നിരോധേതി, അവിക്ഖേപേന ഉദ്ധച്ചം നിരോധേതി, ധമ്മവവത്ഥാനേന വിചികിച്ഛം നിരോധേതി, ഞാണേന അവിജ്ജം നിരോധേതി, പാമോജ്ജേന അരതിം നിരോധേതി, പഠമേന ഝാനേന നീവരണേ നിരോധേതി…പേ॰… അരഹത്തമഗ്ഗേന സബ്ബകിലേസേ നിരോധേതി.
Nirodheti nekkhammena kāmacchandaṃ nirodheti, abyāpādena byāpādaṃ nirodheti, ālokasaññāya thinamiddhaṃ nirodheti, avikkhepena uddhaccaṃ nirodheti, dhammavavatthānena vicikicchaṃ nirodheti, ñāṇena avijjaṃ nirodheti, pāmojjena aratiṃ nirodheti, paṭhamena jhānena nīvaraṇe nirodheti…pe… arahattamaggena sabbakilese nirodheti.
അനുപട്ഠാനതാതി നേക്ഖമ്മം പടിലദ്ധസ്സ കാമച്ഛന്ദോ ന ഉപട്ഠാതി, അബ്യാപാദം പടിലദ്ധസ്സ ബ്യാപാദോ ന ഉപട്ഠാതി, ആലോകസഞ്ഞം പടിലദ്ധസ്സ ഥിനമിദ്ധം ന ഉപട്ഠാതി, അവിക്ഖേപം പടിലദ്ധസ്സ ഉദ്ധച്ചം ന ഉപട്ഠാതി, ധമ്മവവത്ഥാനം പടിലദ്ധസ്സ വിചികിച്ഛാ ന ഉപട്ഠാതി, ഞാണം പടിലദ്ധസ്സ അവിജ്ജാ ന ഉപട്ഠാതി, പാമോജ്ജം പടിലദ്ധസ്സ അരതി ന ഉപട്ഠാതി, പഠമം ഝാനം പടിലദ്ധസ്സ നീവരണാ ന ഉപട്ഠന്തി…പേ॰… അരഹത്തമഗ്ഗം പടിലദ്ധസ്സ സബ്ബകിലേസാ ന ഉപട്ഠന്തി.
Anupaṭṭhānatāti nekkhammaṃ paṭiladdhassa kāmacchando na upaṭṭhāti, abyāpādaṃ paṭiladdhassa byāpādo na upaṭṭhāti, ālokasaññaṃ paṭiladdhassa thinamiddhaṃ na upaṭṭhāti, avikkhepaṃ paṭiladdhassa uddhaccaṃ na upaṭṭhāti, dhammavavatthānaṃ paṭiladdhassa vicikicchā na upaṭṭhāti, ñāṇaṃ paṭiladdhassa avijjā na upaṭṭhāti, pāmojjaṃ paṭiladdhassa arati na upaṭṭhāti, paṭhamaṃ jhānaṃ paṭiladdhassa nīvaraṇā na upaṭṭhanti…pe… arahattamaggaṃ paṭiladdhassa sabbakilesā na upaṭṭhanti.
സമന്തി കാമച്ഛന്ദസ്സ പഹീനത്താ നേക്ഖമ്മം സമം, ബ്യാപാദസ്സ പഹീനത്താ അബ്യാപാദോ സമം, ഥിനമിദ്ധസ്സ പഹീനത്താ ആലോകസഞ്ഞാ സമം, ഉദ്ധച്ചസ്സ പഹീനത്താ അവിക്ഖേപോ സമം, വിചികിച്ഛായ പഹീനത്താ ധമ്മവവത്ഥാനം സമം, അവിജ്ജായ പഹീനത്താ ഞാണം സമം, അരതിയാ പഹീനത്താ പാമോജ്ജം സമം, നീവരണാനം പഹീനത്താ പഠമം ഝാനം സമം…പേ॰… സബ്ബകിലേസാനം പഹീനത്താ അരഹത്തമഗ്ഗോ സമം.
Samanti kāmacchandassa pahīnattā nekkhammaṃ samaṃ, byāpādassa pahīnattā abyāpādo samaṃ, thinamiddhassa pahīnattā ālokasaññā samaṃ, uddhaccassa pahīnattā avikkhepo samaṃ, vicikicchāya pahīnattā dhammavavatthānaṃ samaṃ, avijjāya pahīnattā ñāṇaṃ samaṃ, aratiyā pahīnattā pāmojjaṃ samaṃ, nīvaraṇānaṃ pahīnattā paṭhamaṃ jhānaṃ samaṃ…pe… sabbakilesānaṃ pahīnattā arahattamaggo samaṃ.
സീസന്തി തേരസ സീസാനി – പലിബോധസീസഞ്ച തണ്ഹാ, വിനിബന്ധനസീസഞ്ച മാനോ , പരാമാസസീസഞ്ച ദിട്ഠി, വിക്ഖേപസീസഞ്ച ഉദ്ധച്ചം, സംകിലേസസീസഞ്ച അവിജ്ജാ, അധിമോക്ഖസീസഞ്ച സദ്ധാ, പഗ്ഗഹസീസഞ്ച വീരിയം, ഉപട്ഠാനസീസഞ്ച സതി, അവിക്ഖേപസീസഞ്ച സമാധി, ദസ്സനസീസഞ്ച പഞ്ഞാ, പവത്തസീസഞ്ച ജീവിതിന്ദ്രിയം, ഗോചരസീസഞ്ച വിമോക്ഖോ, സങ്ഖാരസീസഞ്ച നിരോധോതി.
Sīsanti terasa sīsāni – palibodhasīsañca taṇhā, vinibandhanasīsañca māno , parāmāsasīsañca diṭṭhi, vikkhepasīsañca uddhaccaṃ, saṃkilesasīsañca avijjā, adhimokkhasīsañca saddhā, paggahasīsañca vīriyaṃ, upaṭṭhānasīsañca sati, avikkhepasīsañca samādhi, dassanasīsañca paññā, pavattasīsañca jīvitindriyaṃ, gocarasīsañca vimokkho, saṅkhārasīsañca nirodhoti.
സമസീസകഥാ നിട്ഠിതാ.
Samasīsakathā niṭṭhitā.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / ഖുദ്ദകനികായ (അട്ഠകഥാ) • Khuddakanikāya (aṭṭhakathā) / പടിസമ്ഭിദാമഗ്ഗ-അട്ഠകഥാ • Paṭisambhidāmagga-aṭṭhakathā / സമസീസകഥാവണ്ണനാ • Samasīsakathāvaṇṇanā
