| Library / Tipiṭaka / তিপিটক • Tipiṭaka / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā |
৩৬. সমসীসট্ঠঞাণনিদ্দেসৰণ্ণনা
36. Samasīsaṭṭhañāṇaniddesavaṇṇanā
৮৭. সমসীসট্ঠঞাণনিদ্দেসে পঞ্চক্খন্ধাতিআদীহি দসহি রাসীহি সব্বধম্মসঙ্গহো ৰেদিতব্বো। ন হি একেকস্স ৰসেন আযতনধাতুরাসিৰজ্জেহি সেসেহি অট্ঠহি রাসীহি ৰিসুং ৰিসুং সব্বধম্মো সঙ্গয্হতীতি। যস্মা পন লোকুত্তরধম্মা হেতুসমুচ্ছেদেন সমুচ্ছিন্দিতব্বা ন হোন্তি, তস্মা সব্বধম্মসদ্দেন সঙ্গহিতাপি লোকুত্তরধম্মা সমুচ্ছেদৰসেন সম্ভৰতো ইধ ন গহেতব্বা, হেতুসমুচ্ছেদেন সমুচ্ছিন্দিতব্বা এৰ তেভূমকধম্মা গহেতব্বা। সম্মা সমুচ্ছিন্দতীতি যথাযোগং ৰিক্খম্ভনতদঙ্গসমুচ্ছেদপহানৰসেন পরিযুট্ঠানং অনুসযঞ্চ নিরোধেন্তো সম্মা সমুচ্ছিন্দতি। এৰং পুগ্গলাধিট্ঠানায দেসনায সম্মা সমুচ্ছেদো নিদ্দিট্ঠো। নিরোধেতীতি অনুপ্পাদনিরোধেন নিরোধেতি। ইমিনা সমুচ্ছেদত্থো ৰুত্তো। ন উপট্ঠাতীতি এৰং নিরোধে কতে সো সো ধম্মো পুন ন উপতিট্ঠতি, ন উপ্পজ্জতীতি অত্থো। ইমিনা নিরোধত্থো ৰুত্তো। এৰং অনুপট্ঠহনধম্মৰসেন অনুপট্ঠানভাৰো নিদ্দিট্ঠো। সমন্তি কামচ্ছন্দাদীনং সমিতত্তা সমং। তানি পন নেক্খম্মাদীনি সত্ত, রূপারূপজ্ঝানানি অট্ঠ, মহাৰিপস্সনা অট্ঠারস, অরিযমগ্গা চত্তারোতি সত্ততিংস হোন্তি।
87. Samasīsaṭṭhañāṇaniddese pañcakkhandhātiādīhi dasahi rāsīhi sabbadhammasaṅgaho veditabbo. Na hi ekekassa vasena āyatanadhāturāsivajjehi sesehi aṭṭhahi rāsīhi visuṃ visuṃ sabbadhammo saṅgayhatīti. Yasmā pana lokuttaradhammā hetusamucchedena samucchinditabbā na honti, tasmā sabbadhammasaddena saṅgahitāpi lokuttaradhammā samucchedavasena sambhavato idha na gahetabbā, hetusamucchedena samucchinditabbā eva tebhūmakadhammā gahetabbā. Sammā samucchindatīti yathāyogaṃ vikkhambhanatadaṅgasamucchedapahānavasena pariyuṭṭhānaṃ anusayañca nirodhento sammā samucchindati. Evaṃ puggalādhiṭṭhānāya desanāya sammā samucchedo niddiṭṭho. Nirodhetīti anuppādanirodhena nirodheti. Iminā samucchedattho vutto. Na upaṭṭhātīti evaṃ nirodhe kate so so dhammo puna na upatiṭṭhati, na uppajjatīti attho. Iminā nirodhattho vutto. Evaṃ anupaṭṭhahanadhammavasena anupaṭṭhānabhāvo niddiṭṭho. Samanti kāmacchandādīnaṃ samitattā samaṃ. Tāni pana nekkhammādīni satta, rūpārūpajjhānāni aṭṭha, mahāvipassanā aṭṭhārasa, ariyamaggā cattāroti sattatiṃsa honti.
তেরস সীসানি সীসভূতানং সব্বেসং সঙ্গহৰসেন ৰুত্তানি। ইধ পন সদ্ধাদীনি অট্ঠেৰ সীসানি যুজ্জন্তি। ন হি অরহতো তণ্হাদীনি পঞ্চ সীসানি সন্তি। পলিবোধসীসন্তি পলিবুন্ধনং পলিবোধো, নিব্বানমগ্গাৰরণন্তি অত্থো। সীসন্তি পধানং, অধিকন্তি অত্থো। পলিবোধোযেৰ সীসং, তংসম্পযুত্তাদিসব্বপলিবোধেসু ৰা সীসন্তি পলিবোধসীসং। এস নযো সেসেসু। ৰিসেসতো পন ৰিনিবন্ধনন্তি উন্নতিৰসেন সংসারে বন্ধনং। পরামাসোতি অভিনিৰেসো। ৰিক্খেপোতি ৰিপ্পকিণ্ণতা। কিলেসোতি কিলিস্সনং। অধিমোক্খোতি অধিমুচ্চনং। পগ্গহোতি উস্সাহনং। উপট্ঠানন্তি অপিলাপনং। অৰিক্খেপোতি অৰিপ্পকিণ্ণতা। দস্সনন্তি যথাসভাৰপটিৰেধো। পৰত্তন্তি উপাদিন্নক্খন্ধপৰত্তং। গোচরোতি আরম্মণং। ইমেসু দ্ৰাদসসুপি ৰারেসু পধানট্ঠো সীসট্ঠো। ৰিমোক্খোতি ৰিক্খম্ভনতদঙ্গসমুচ্ছেদপটিপ্পস্সদ্ধিনিস্সরণৰিমুত্তীসু পঞ্চসু নিস্সরণৰিমুত্তি নিব্বানং। সঙ্খারসীসন্তি সব্বসঙ্খতসঙ্খারানং সীসং, কোটি অৰসানন্তি অত্থো। এতেন অনুপাদিসেসপরিনিব্বানং ৰুত্তং। সঙ্খারাভাৰমত্তৰসেন ৰা খন্ধপরিনিব্বানমেৰ ৰুত্তং হোতি। নেক্খম্মাদিকং সমঞ্চ সদ্ধাদিকং সীসঞ্চ, সমসীসং ৰা অস্স অত্থীতি সমসীসীতি। অথ ৰা তেরসন্নং সীসানং তণ্হাদীনি পঞ্চ সীসানি সমুদযসচ্চং, সদ্ধাদীনি পঞ্চ মগ্গসচ্চং, পৰত্তসীসং জীৰিতিন্দ্রিযং দুক্খসচ্চং, গোচরসীসঞ্চ সঙ্খারসীসঞ্চ নিরোধসচ্চন্তি ইমেসং চতুন্নং অরিযসচ্চানং একস্মিং রোগে ৰা একস্মিং ইরিযাপথে ৰা একস্মিং সভাগজীৰিতিন্দ্রিযে ৰা অভিসমযো চ অনুপাদিসেসপরিনিব্বানঞ্চ যস্স হোতি, সো পুব্বে ৰুত্তসমানঞ্চ ইমেসঞ্চ সীসানং অত্থিতায সমসীসীতি ৰুচ্চতি।
Terasa sīsāni sīsabhūtānaṃ sabbesaṃ saṅgahavasena vuttāni. Idha pana saddhādīni aṭṭheva sīsāni yujjanti. Na hi arahato taṇhādīni pañca sīsāni santi. Palibodhasīsanti palibundhanaṃ palibodho, nibbānamaggāvaraṇanti attho. Sīsanti padhānaṃ, adhikanti attho. Palibodhoyeva sīsaṃ, taṃsampayuttādisabbapalibodhesu vā sīsanti palibodhasīsaṃ. Esa nayo sesesu. Visesato pana vinibandhananti unnativasena saṃsāre bandhanaṃ. Parāmāsoti abhiniveso. Vikkhepoti vippakiṇṇatā. Kilesoti kilissanaṃ. Adhimokkhoti adhimuccanaṃ. Paggahoti ussāhanaṃ. Upaṭṭhānanti apilāpanaṃ. Avikkhepoti avippakiṇṇatā. Dassananti yathāsabhāvapaṭivedho. Pavattanti upādinnakkhandhapavattaṃ. Gocaroti ārammaṇaṃ. Imesu dvādasasupi vāresu padhānaṭṭho sīsaṭṭho. Vimokkhoti vikkhambhanatadaṅgasamucchedapaṭippassaddhinissaraṇavimuttīsu pañcasu nissaraṇavimutti nibbānaṃ. Saṅkhārasīsanti sabbasaṅkhatasaṅkhārānaṃ sīsaṃ, koṭi avasānanti attho. Etena anupādisesaparinibbānaṃ vuttaṃ. Saṅkhārābhāvamattavasena vā khandhaparinibbānameva vuttaṃ hoti. Nekkhammādikaṃ samañca saddhādikaṃ sīsañca, samasīsaṃ vā assa atthīti samasīsīti. Atha vā terasannaṃ sīsānaṃ taṇhādīni pañca sīsāni samudayasaccaṃ, saddhādīni pañca maggasaccaṃ, pavattasīsaṃ jīvitindriyaṃ dukkhasaccaṃ, gocarasīsañca saṅkhārasīsañca nirodhasaccanti imesaṃ catunnaṃ ariyasaccānaṃ ekasmiṃ roge vā ekasmiṃ iriyāpathe vā ekasmiṃ sabhāgajīvitindriye vā abhisamayo ca anupādisesaparinibbānañca yassa hoti, so pubbe vuttasamānañca imesañca sīsānaṃ atthitāya samasīsīti vuccati.
সমসীসট্ঠঞাণনিদ্দেসৰণ্ণনা নিট্ঠিতা।
Samasīsaṭṭhañāṇaniddesavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পটিসম্ভিদামগ্গপাল়ি • Paṭisambhidāmaggapāḷi / ৩৬. সমসীসট্ঠঞাণনিদ্দেসো • 36. Samasīsaṭṭhañāṇaniddeso
